رەفورمالار جونىندەگى جوعارى كەڭەستىڭ كەزەكتى وتىرىسىندا مەملەكەتتىك جوسپارلاۋ جۇيەسىن قايتا قۇرۋ ادىستەرى قاراستىرىلىپ, ماكروەكونوميكالىق ساياسات, الەۋمەتتىك سالانى دامىتۋ, ەكونوميكانى ءارتاراپتاندىرۋ جانە بيزنەستى رەتتەۋ, سوت جانە قۇقىق قورعاۋ جۇيەلەرىن رەفورمالاۋ, مەملەكەتتىك باسقارۋ جانە مەملەكەتتىك قىزمەت كورسەتۋ جونىندەگى كونسۋلتاتيۆتىك كوميتەتتەردىڭ جەتەكشىلەرى بايانداما جاسادى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
جيىندا رەفورمالار جونىندەگى جوعارى كەڭەستىڭ مۇشەلەرى: ستراتەگيالىق جوسپارلاۋ جانە رەفورمالار اگەنتتىگىنىڭ توراعاسى قايرات كەلىمبەتوۆ, پرەزيدەنتتىڭ كەڭەسشىسى – رەفورمالار جونىندەگى جوعارى كەڭەس توراعاسىنىڭ ورىنباسارى سەر سۋما چاكرابارتي, پرەمەر-مينيستر اسقار مامين, پرەزيدەنت اكىمشىلىگىنىڭ باسشىسى ەرلان قوشانوۆ, پرەزيدەنت اكىمشىلىگى باسشىسىنىڭ ورىنباسارى تيمۋر سۇلەيمەنوۆ, «اتامەكەن» ۇلتتىق كاسىپكەرلەر پالاتاسى پرەزيديۋمىنىڭ توراعاسى تيمۋر ق ۇلىباەۆ ءسوز سويلەدى.
مەملەكەت باسشىسى ءوز سوزىندە مەملەكەتتىك جوسپارلاۋدىڭ جاڭا جۇيەسى باعدارلامالار مەن رەفورمالاردىڭ دايەكتىلىگىن جانە ءوزارا ساباقتاستىعىن قامتاماسىز ەتۋگە ءتيىس ەكەنىن اتاپ ءوتتى.
– مەملەكەتتىك جوسپارلاۋدىڭ جاڭا جۇيەسى دوگماتيزم مەن كوزبوياۋشىلىقتان تولىق ادا بولۋى قاجەت. سۇلۋ ءسوز قانشالىقتى از بولسا, مازمۇنى سونشالىق باي بولادى. ول اتقارۋشىلارعا ءىس-قيمىل ەركىندىگىن بەرۋ ءۇشىن وتە پراگماتيكالىق بولۋى ءتيىس. اتقارۋشىلارعا قوسىمشا جۇمىس جۇكتەمەۋ اسا ماڭىزدى. ياعني, باسقا ناقتى ىستەرگە نۇقسان كەلتىرمەۋ ءۇشىن بۇل باعىتتاعى جۇمىستارعا كۇش تۇسىرمەۋ كەرەك. ۇكىمەت ساراپشىلاردىڭ قوعامداستىعىمەن جانە جۇرتشىلىقپەن تىعىز ىقپالداستىقتا جۇمىس ىستەۋى ءتيىس, – دەدى مەملەكەت باسشىسى.
پرەزيدەنت مەملەكەتتىك جوسپارلاۋ رەفورماسى جۇيەسىندە تسيفرلاندىرۋدى جەدەلدەتۋ ماسەلەسىنە باسا ءمان بەرۋدى تاپسىردى. سونىمەن قاتار مەملەكەتتىك ورگاندار جۇزەگە اسىرىپ جاتقان قۇجاتتار مەن باعدارلامالاردىڭ بارلىق ساتىسىنا تالداۋ جاساۋ قاجەت.
– تاۋەلسىزدىك جىلدارىندا كوپتەگەن باعدارلاما جاسالدى. ونىڭ ءبىرازى كۇشىن جويدى, جاڭا باعدارلامالار مەن قۇجاتتار پايدا بولۋدا. ولاردىڭ ءبارىن ساتىلى تۇردە جۇيەلەپ, قاجەت ەمەستەرىنەن ارىلۋ كەرەك. جوسپارلاۋدىڭ اتقارۋشىلارعا جانە حالىققا مەيلىنشە تۇسىنىكتى ءارى اشىق جۇيەسىن جاساعان ءجون.
مەملەكەت باسشىسى كونسۋلتاتيۆتىك كوميتەتتەر جۇمىسىنىڭ ماڭىزدىلىعىنا نازار اۋدارىپ, ءبىرىنشى كەزەكتەگى رەفورمالاردىڭ ءتىزىمىن انىقتاۋعا جانە ولاردى جۇزەگە اسىرۋ جونىندەگى ۇسىنىستارعا بايلانىستى ناقتى مىندەت جۇكتەدى. سونداي-اق پرەزيدەنت الەۋمەتتىك كودەكس, «تسيفرلىق قازاقستان», «اوك-2025» سياقتى ءىرى رەفورمالاردىڭ ازىرلەنۋىنە ەرەكشە نازار اۋدارۋدى تاپسىردى. بارلىق تاراپتار ءۇشىن اشىق ءارى بىرىڭعاي ءتارتىپ ورناتۋدىڭ ءمانى زور. ءادىل باسەكەلەستىك قالىپتاستىرۋ, اكىمشىلىك قىسىمداردى بولدىرماۋ – ەكونوميكالىق ءوسىمنىڭ جۇيەلى شارتى.
پرەزيدەنت سوت جانە قۇقىق قورعاۋ جۇيەلەرىن رەفورمالاۋ ماسەلەسىنە دە نازار اۋداردى. ونىڭ پىكىرىنشە, سوت جانە قۇقىق قورعاۋ قىزمەتىنە وزىق IT-تەحنولوگيانى ەنگىزۋ جانە تسيفرلاندىرۋ جۇمىستارىن جالعاستىرۋ كەرەك. سۋديالار كورپۋسى مەن قۇقىق قورعاۋ ورگاندارىنداعى جەكە قۇرامنىڭ كاسىبي بىلىكتىلىگىن ارتتىرۋعا باسا ءمان بەرۋ قاجەت.
– بىزگە جۇيەلى, سونىڭ ىشىندە, كادرلىق سيپاتتاعى شارالار قابىلداۋ كەرەك. جوعارعى سوتتىڭ سۋدياسى نەمەسە وبلىستىق سوتتاردىڭ توراعاسى بولسىن سۋديا لاۋازىمىنا تاعايىنداعان كەزدە, ەڭ الدىمەن, سۋديالار كورپۋسىنىڭ وزىندە ۇلكەن ماسەلە تۋىندايدى. ولار ءبىر-ءبىرىن كاسىبي بىلىكسىز, جەكە جانە باسقا دا بايلانىستارىن پايدالانادى دەپ كىنالايدى. وسى ءتيىمسىز تەندەنتسيالاردى ءبىرجولا جويۋ قاجەت, – دەدى مەملەكەت باسشىسى.
قاسىم-جومارت توقاەۆ ءوز سوزىندە رەفورمالار جۇرگىزۋ بارىسىندا بارلىق زاڭنامالىق وزگەرىستەر مۇقيات ءارى ەگجەي-تەگجەيلى پىسىقتالۋى كەرەك ەكەنىن ايتتى.
– بۇل جەردە مىناداي ماسەلەلەردى ءتۇسىنۋ ماڭىزدى: قىلمىستىق جانە قىلمىستىق-پروتسەسسۋالدىق زاڭنامانىڭ ءجيى وزگەرۋى قۇقىق قولدانۋ تاجىريبەسىنىڭ تۇراقتىلىعىنا نۇقسان كەلتىرەدى. قاتەلەسۋ قاۋپىن ارتتىرادى. بۇل ازاماتتارىمىزدىڭ تاعدىرىنا اسەر ەتۋى مۇمكىن. سوندىقتان بۇل باعىتتاعى قادامىمىز دۇرىس. كەلەسى جىلى وسى سالاداعى رەفورمالار جاقسى قارقىن الىپ, ناقتى ناتيجەلەر كورسەتۋى ءتيىس, – دەدى مەملەكەت باسشىسى.
قاسىم-جومارت توقاەۆ جوعارى مەملەكەتتىك باسقارۋدىڭ بارلىق جۇيەسى قازاقستان حالقىنا ادال, شىنايى قىزمەت ەتۋى كەرەك ەكەنىن ايتتى. مەملەكەتتىك باسقارۋدىڭ بارلىق جۇيەسىن – مەملەكەتتىك قىزمەتتەن جەرگىلىكتى ءوزىن-ءوزى باسقارۋ دەڭگەيىنە دەيىن ءىس جۇزىندە قايتا قۇرۋ قاجەت.
جيىن قورىتىندىسى بويىنشا قر پرەزيدەنتى جانىنداعى رەفورمالار جونىندەگى جوعارى كەڭەستىڭ 2021 جىلعا ارنالعان جۇمىس جوسپارى جانە كونسۋلتاتيۆتىك كوميتەتتەردىڭ قۇرامى بەكىتىلدى.