"Nur Otan" پارتياcىنىڭ ورتالىق اپپاراتىندا پارتيا جانىنداعى قۇقىقتىق كەڭەستىڭ 2020 جىلدا اتقارعان جۇمىسىنىڭ قورىتىندىسى تالقىلانىپ, كەلەسى جىلدىڭ جوسپارى قاراستىرىلدى, دەپ حابارلايدى Egemen.kz.
كەڭەس توراعاسى, قازاقستان رەسپۋبليكاسى پارلامەنتى ءماجىلىسىنىڭ زاڭناما جانە سوت-قۇقىقتىق رەفورما كوميتەتىنىڭ جەتەكشىسى قانات مۋسين 10 جىل ىشىندە زاڭ كەڭەسى زاڭنامالىق نورمالاردى جەتىلدىرۋ بويىنشا ۇسىنىستاردى تالقىلاۋ مەن ازىرلەۋ ءۇشىن ءتيىمدى الاڭ بولعانىن ايتتى.
كەڭەس توراعاسى 2020 جىلى اتقارىلعان ىستەردى قورىتىندىلاي كەلە, 8 وتىرىس بارىسىندا اكىمشىلىك ءىس جۇرگىزۋ كودەكسى جوباسىنىڭ قولدانىستاعى ەرەجەلەرى, قوعامدىق كەڭەستەردىڭ تيىمدىلىگىن ارتتىرۋ ماسەلەلەرى, ەكولوگيالىق زاڭنامانىڭ جاڭاشىلدىعى, شاعىن جانە ورتا بيزنەستى زاڭنامالىق قولداۋ ماسەلەلەرى تالقىلاندى دەپ اتاپ ءوتتى.
اتاپ ايتقاندا, قازان ايىندا ەكولوگيالىق كودەكس جوباسىن تالقىلاۋ قورىتىندىسى بويىنشا قۇقىقتىق كەڭەس 13 ۇسىنىم ازىرلەپ, ۇكىمەتكە جولداعان, ونىڭ 4-ءۋى زاڭ جوباسىندا ەسكەرىلدى.
قۇقىقتىق كەڭەستىڭ بيىلعى كەڭەيتىلگەن قورىتىندى جيىنى پاندەميا مەن ەكونوميكالىق جاعدايدىڭ ناشارلاۋى جاعدايىندا شاعىن جانە ورتا بيزنەستى زاڭنامالىق قولداۋ ماسەلەلەرى بويىنشا ءوتتى. تالقىلاۋدان كەيىن زاڭناماعا ينۆەستيتسيالاردى تارتۋ جانە قولداۋ, ينۆەستيتسيالار تۋرالى ستراتەگيالىق كەلىسىمدى ەنگىزۋ ماسەلەلەرى بويىنشا وزگەرىستەر ۇسىنىلدى. ناتيجەسىندە ۇكىمەتكە 12 ۇسىنىس جىبەرىلدى.
2021 جىلعا ارنالعان جۇمىس جوسپارىن تالقىلاۋ كەزىندە قۇقىقتىق كەڭەس مۇشەلەرى ەلدىڭ جوعارى وقۋ ورىندارىندا قۇقىقتىق ءبىلىم دەڭگەيىن كوتەرۋگە, بىتىمگەرشىلىك راسىمدەرى مەن مەدياتسيانى جەتىلدىرۋگە نازار اۋدارۋ قاجەتتىگىن اتاپ ءوتتى.
سونداي-اق, كەڭەس قىزمەتىنىڭ 10 جىلدىعىنا وراي وتكەن جيىن بارىسىندا ونىڭ بەلسەندى مۇشەلەرى ازاماتتاردىڭ قۇقىقتارى مەن زاڭدى مۇددەلەرىن قورعاۋدى قامتاماسىز ەتۋگە قوسقان زور ۇلەسى ءۇشىن قۇرمەت گراموتالارىمەن ماراپاتتالدى.
ولاردىڭ قاتارىندا قر پارلامەنتى سەناتى توراعاسىنىڭ ورىنباسارى نۇرلان ءابدىروۆ, ءماجىلىس دەپۋتاتى گۇلنار بيجانوۆا, «استانا» حالىقارالىق عىلىمي كەشەنىنىڭ قىلمىستىق ادىلەت ورتالىعىنىڭ جەتەكشىسى, پروفەسسور يسيدور بورچاشۆيلي, م.نارىكباەۆ اتىنداعى قازمزۋ-دىڭ قىلمىستىق سوت تورەلىگى جانە عىلىمي-قۇقىقتىق ساراپتاما بويىنشا عىلىمي جوبالاردىڭ جەتەكشىسى, پروفەسسور مارات قوعاموۆ, جوعارعى سوت كەڭەسىنىڭ مۇشەسى بالگۇل رايسوۆا, كاسىپوداقتار فەدەراتسياسى توراعاسىنىڭ ورىنباسارى مۇحتار تىنىكەەۆ جانە تاعى باسقالار بار.