"YDD Corporation" فەرروقورىتپا زاۋىتى ەكسپورتتىق الەۋەتتى دامىتۋ جۇمىستارىن بەلسەندى جالعاستىرۋدا. وسى جىلى ءونىمدى ساتۋ گەوگرافياسى 15 ەلگە كەڭەيتىلدى. وسىلايشا, قازىرگى ۋاقىتتا زاۋىت الەمنىڭ 37-دەن استام ەلىنە ءونىم ەكسپورتتايدى, دەپ حابارلايدى Egemen.kz.
بۇگىندە ءوندىرىس وشاعى جوعارى ساپالى فەرروسيليتسي وندىرەتىن ءۇشىنشى پەشتى ىسكە قوسۋدا. ءۇشىنشى پەشتىڭ قۋاتى 85,5 مۆا قۇرايدى, ونى پايدالانۋعا ەنگىزۋمەن فەرروقورىتپا زاۋىتىنىڭ جالپى وندىرىستىك قۋاتى 30% - عا ارتىپ, جىلىنا 180 مىڭ توننانى قۇرايدى. بۇكىل الەمدەگى جاعدايعا قاراماستان, پەشتى ىسكە قوسۋ جوسپارلانعان كەستەگە سايكەس جۇرگىزىلدى. كومپانيا COVID-19 پاندەمياسى كەزىندە جۇمىس كەستەسىن ۆاحتالىق ادىسكە كوشىرىپ, بارلىق قاجەتتى جاعداي جاساعانىنىڭ ارقاسىندا قازىرگى ءوندىرىس كولەمىن ساقتاپ قالدى.
زاۋىتتىڭ ءونىمى-جوعارى ساپالى فەرروسيليتسي (FeSi75) ەلەكتر تەحنيكالىق, سەرىپپەلى, توتتانۋعا قارسى جانە ىستىققا ءتوزىمدى بولاتتاردى بالقىتۋ كەزىندە قىشقىلداندىراتىن جانە قوسپالايتىن قوسپا رەتىندە پايدالانىلادى. شىعارىلاتىن ءونىم ءار ءتۇرلى جانە كرەمنيدىڭ پايىزدىق مولشەرىنە بايلانىستى 45% - دان 75% - عا دەيىن وزگەرەدى. ۇنتاقتاۋ-سۇرىپتاۋ كەشەنىنىڭ جۇمىسىنىڭ ارقاسىندا ءونىم فراكتسيالاردىڭ كەڭ ارالىعىندا– 0-دەن 315 مم-گە دەيىن شىعارىلادى. زاۋىتتا گاز تازالاۋدىڭ جاڭا, زاماناۋي جۇيەسى ەنگىزىلگەن. بۇل كەشەن وندىرىستەن شاڭدى ۇستاپ, ونى جاناما ءونىم – ميكروكرەمنەزەمگە اينالدىرادى, سودان كەيىن ونى جوعارى ساپالى تسەمەنت پەن بەتون شىعارۋ ءۇشىن پايدالانۋعا بولادى. جوباداعى وتاندىق ءونىمنىڭ ۇلەسى 95 پايىزدان اسادى.
ەستەرىڭىزگە سالا كەتەيىك, "YDD Corporation" جشس زاۋىتىنىڭ اشىلۋى 2019 جىلدىڭ شىلدە ايىندا ءوتتى. زاۋىت جاڭا تەحنولوگيالاردى قولدانا وتىرىپ سالىنعان, ءوندىرىس پروتسەسى تولىعىمەن اۆتوماتتاندىرىلعان. جوبا يدمب شەڭبەرىندە قدب-نىڭ قارىز قارجىلاندىرۋىن تارتا وتىرىپ, قازاقستاندىق جانە ەۋروپالىق ينۆەستورلاردىڭ جەكە قاراجاتى ەسەبىنەن ىسكە اسىرىلدى.