پەتروپاۆل پب ەكىنشى پوليتسيا ءبولىمىنىڭ ۋچاسكەلىك پوليتسيا ينسپەكتورلارى "جۇمىسشى كەنتىندەگى" كوپىردەن ءوتىپ بارا جاتادى. سول كەزدە كوپىر قاناتىنىڭ ارعى بەتىنە شىعىپ, استىندا ءوتىپ بارا جاتقان پوەزدىڭ استىنا سەكىرگەلى تۇرعان ايەلدى كورىپ قالادى. ماشينادان تۇسە سالعان جىگىتتەر ونى قۇتقارۋعا ۇمتىلادى. پوليتسەيلەرگە ءوتىپ بارا جاتقان قالالىق ازامات كومەككە كەلەدى, دەپ جازادى Egemen.kz
ولار بىرلەسىپ, ايەلدىڭ تەمىر جول رەلستەرىنە سەكىرۋىنە جول بەرمەي, كوپىردىڭ ۇستىنە سۋىرىپ الادى.
كەيىن انىقتالعانداي, ايەل سول كۇنى ۇرىپ-سوققانى ءۇشىن بىرگە تۇراتىن جىگىتىنە قاتىستى ارىزدانىپ, ۇيىنە قايتۋعا قورىققان ەكەن. "جۇمىسشى كەنتىندە" ايەل قۇربىسىنىڭ ۇيىندە تۇنەپ شىقپاقشى بولادى, الايدا قۇربىسى ونى كىرگىزبەيدى. سوعان اشىنعان ءارى قورىققان ايەل ەكى جاس بالاسىنا دا قاراماي ومىردەن باز كەشپەكشى بولعان ەكەن.
ايەلگە پسيحولوگيالىق كومەك كورسەتىلىپ, ءوزىن تۇرمىستىق زورلىق-زومبىلىق قۇرباندارىنا ارنالعان باسپاناعا ورنالاستىرىلدى. ال ونىڭ 36 جاستاعى بىرگە تۇرعان جىگىتىنە قاتىستى ماتەريالدار جينالىپ جاتىر.