كيپردىڭ «Invest Cyprus» ۇكىمەتتىك كومپانياسى قازاقستانمەن ينۆەستيتسيالىق ىنتىماقتاستىق ورناتۋعا ارنالعان «Roadshow 2020 – Kazakhstan» ونلاين بيزنەس فورۋم ۇيىمداستىردى, دەپ حابارلايدى Egemen.kz.
ءىس-شاراعا ەكى ەلدىڭ قارجى جانە ىسكەر توپتارىنىڭ, بانك قۇرىلىمدارىنىڭ, اۋديتورلىق جانە زاڭ كومپانيالارىنىڭ وكىلدەرى قاتىستى.
«Invest Cyprus» توراعاسى ميحاليس ميحاەل كيپرلىق-قازاقستاندىق ءوزارا ءىس-قيمىل الەۋەتىن جوعارى باعالاپ, ءوزىنىڭ 2019 جىلى كيپردىڭ سىرتقى ىستەر ءمينيسترى باستاعان بيزنەس-ميسسيا قۇرامىندا نۇر-سۇلتانعا جاساعان ساپارىنىڭ تابىستى ناتيجەلەرى تۋرالى ايتىپ بەردى.
فورۋمنىڭ نەگىزگى سپيكەرلەرى رەتىندە «Kazakh Invest» ۇلتتىق كومپانياسى» اق باسقارما توراعاسى باۋىرجان سارتباەۆ پەن قازاقستاننىڭ كيپر رەسپۋبليكاسىنداعى ەلشىسى (قىزمەتىن قوسا اتقارۋشى) ساتىبالدى بۇرشاقوۆ ءسوز سويلەدى.
ب.سارتباەۆ قاتىسۋشىلاردى ينۆەستيتسيالاردى قورعاۋ سالاسىندا قازاقستان ۇكىمەتى قابىلداپ جاتقان شارالار مەن شەتەلدىك ينۆەستورلار ءۇشىن سالىقتىق جەڭىلدىكتەر تۋرالى حاباردار ەتتى.
ەلشى ءىس-شارا قاتىسۋشىلارىن ەكىجاقتى ساۋدا-ەكونوميكالىق بايلانىستاردىڭ نەگىزگى باعىتتارىمەن تانىستىرىپ, كيپر قازاقستاننىڭ وڭتۇستىك ەۋروپاداعى ماڭىزدى سەرىكتەستەرىنىڭ ءبىرى ەكەنىن باسا ايتتى. ول بيزنەس قاۋىمداستىعىن ينۆەستيتسيالىق ىنتىماقتاستىقتىڭ الەۋەتىن ءتيىمدى پايدالانۋعا, سونىمەن قاتار, «استانا» حالىقارالىق قارجى ورتالىعى مەن ارنايى ەكونوميكالىق ايماقتاردىڭ, اسىرەسە 2021 جىلعى 1 قاڭتاردا ەكى ەل اراسىنداعى قوسارلانعان سالىق سالۋدى بولدىرماۋ تۋرالى كونۆەنتسيانىڭ كۇشىنە ەنۋىنە بايلانىستى شەتەلدىك ينۆەستورلارعا ۇسىنىلىپ وتىرعان جاعدايدى ەسكەرە وتىرىپ, پەرسپەكتيۆالىق جوبالاردى بىرلەسە ىسكە اسىرۋعا شاقىردى.
ديپلومات 2020 جىلدىڭ ءبىرىنشى جارتىجىلدىعىنىڭ قورىتىندىسى بويىنشا كيپر قازاقستان ەكونوميكاسىنا قۇيىلعان تىكەلەي شەتەلدىك ينۆەستيتسيا كولەمى بويىنشا العاشقى 10 ەلدىڭ قاتارىنلا ەكەنىن حابارلادى (165 ملن اقش دولل. استام). بۇل تۇرعىدا تاياۋدا ىسكەرلىك مۇمكىندىكتەردىڭ نەعۇرلىم كەڭەيتىلگەن كۇن ءتارتىبىن زەردەلەۋگە ىقپال ەتەتىن كيپر - قازاقستان بيزنەس-قاۋىمداستىعىنىڭ قۇرىلۋىن قۇپتادى.
ەلشى ينۆەستيتسيالىق ساياساتتى ىسكە اسىرۋدىڭ شارالارى مەن باسىمدىقتارى ناقتى بەلگىلەنگەن قازاقستان پرەزيدەنتى قاسىم-جومارت توقاەۆتىڭ 1 قىركۇيەكتەگى جولداۋىنىڭ نەگىزگى تەزيستەرىنە جەكە توقتالىپ ءوتتى.
بۇدان بولەك, س.بۇرشاقوۆ 2021 جىلعى 10 قاڭتاردا پارلامەنت ءماجىلىسىنىڭ جوسپارلانعان سايلاۋى وتەتىنى جايلى حابارلادى. وسىعان بايلانىستى پرەزيدەنت ق.توقاەۆتىڭ باستاماسىمەن قولعا الىنعان ساياسي رەفورمالاردى, ونىڭ ىشىندە كوپ پارتيالى جۇيەنى نىعايتۋدىڭ ماڭىزدىلىعىن اتاپ ءوتتى.