قازاقستاندا ەلەكتر ەنەرگەتيكاسى سالاسىندا مانەۆرلىك قۋات كوزدەرىن سالۋدى ىنتالاندىراتىن زاڭ جوباسى قاراستىرىلماق. بۇل تۋرالى ەنەرگەتيكا ءمينيسترى نۇرلان نوعاەۆ الماتى وبلىسىنا جۇمىس ساپارى بارىسىندا ايتتى.
مينيستر قاپشاعاي سۋ قويماسى اۋدانىنداعى كۇن جانە گيدروەلەكتر ستانساسىنىڭ جۇمىسىمەن تانىسىپ, شەلەك اۋىلىنداعى جەل ەنەرگەتيكالىق ستانساسىنىڭ قۇرىلىس ورنىندا الماتى مەن الماتى وبلىسىن ەنەرگيامەن جابدىقتاۋ تۋرالى ماسەلەلەردى تالقىلادى.
ن.نوعاەۆ ۇكىمەت ەلەكتر ەنەرگەتيكاسى سەكتورىندا مانەۆرلىك قۋات كەشەندەرىنىڭ قۇرىلىسىن ىنتالاندىرۋعا نيەتتى ەكەنىن ايتتى.
بۇگىندە ەلىمىزدە ەلەكتر قۋاتىنىڭ ءپروفيتسيتى مانەۆرلىك قۋاتتاردىڭ تاپشىلىعىمەن سايكەس كەلىپ تۇر. ماسەلەن, تاۋلىك ىشىندە ەلەكتر ەنەرگياسىن تۇتىنۋ دەڭگەيى بىركەلكى ەمەس. اتاپ ايتقاندا كەشكى ۋاقىتتاردا جوعارىلاپ, تۇندە تومەندەگەن بويدا ەلەكتر ستانسالارى جەدەل اۋىسپالى جۇمىستى قاجەت ەتەدى. سول سەبەپتى جۇمىس ىستەپ تۇرعان ەلەكتر ستانسالارىنىڭ قازىرگى رەتتەۋ مۇمكىندىكتەرى جەتكىلىكسىز بولعان سوڭ, جۇيەلىك وپەراتورعا رەسەيدىڭ رەتتەۋشى ەنەرگيا جۇيەسىنە سۇيەنۋگە تۋرا كەلەدى.
مانەۆرلىك گەنەراتسيانى قۇرۋ جونىندەگى جوبالاردى انىقتاۋ اۋكتسيوندى ىرىكتەۋدى قولدانۋ ارقىلى جۇزەگە اسىرىلماق. ۆەدومستۆو باسشىسىنىڭ ايتۋىنشا, بۇل وسىنداي كوزدەردىڭ قۇرىلىسىنا سەرپىن بەرىپ, تۇتىنۋشىلارعا نەعۇرلىم ءتيىمدى جوبالاردى تاڭداۋعا جول اشادى. اتالعان شارالار قازاقستانداعى جاڭعىرمالى ەنەرگيا كوزدەرىنىڭ ينۆەستيتسيالىق تارتىمدىلىعىن ارتتىرۋعا مۇمكىندىك بەرىپ, وتاندىق ەنەرگەتيكالىق جۇيەگە قولايلى اسەر ەتەدى دەپ بولجانۋدا.