وڭىرلىك جەدەل شتابتىڭ مالىمەتىنشە, قوستاناي وبلىسىندا 3-ءساۋىر مەن 6-جەلتوقسان ارالىعىندا COVID-19 ىندەتىن جۇقتىرعان 5881 ادام تىركەلگەن. بۇگىنگە دەيىن 4 399 ناۋقاستىڭ ەمدەلىپ شىققانى بەلگىلى بولىپ وتىر.
وبلىستا كارانتين رەجىمى جاريالانعالى, سانيتارلىق ءتارتىپ-تالاپتىڭ ساقتالۋىن 91 مونيتورينگتىك توپ باقىلاۋدا. ونىڭ قۇرامىندا قالا-اۋدان اكىمدىكتەرىنىڭ, «اتامەكەن» ۇكپ-نىڭ ماماندارى, جەرگىلىكتى پوليتسيا قىزمەتكەرلەرى, باق وكىلدەرى بار.
مونيتورينگتىك توپ مۇشەلەرى وتكەن دەمالىس كۇندەرى ارنايى رەيد ۇيىمداستىرىپ, 436 بيزنەس-نىسانعا تەكسەرۋ جۇرگىزگەن. ناتيجەسىندە 9 نىساننىڭ كارانتين رەجىمىن بۇزعانى انىقتالىپ وتىر. ماسەلەن, قوستاناي قالاسىنداعى «لادوگا» كافەسى جۇمىس رەجىمىنىڭ شەكتەلۋىنە قاراماستان, دەمالىس كۇندەرى دە مەيمان قابىلداعان.
وكىنىشكە قاراي, كارانتين ءتارتىبى اۋىلدىق مەكەندەردە ءجيى بۇزىلۋدا. ماسەلەن, جانگەلدين اۋدانىنىڭ شەگەن اۋىلىندا, كوپشىلىك جيىندارعا تىيىم سالىنعانىنا قاراماستان, اس بەرىلگەن. ءدال وسى اۋدانعا قاراستى كوكالات اۋىلىنىڭ تۇرعىنى 30 ادامدى قوناق ەتىپ, 70 جاسقا تولعان مەرەيتويىن اتاپ وتكەن.
سونداي-اق, قوستاناي اۋدانىنىڭ ميچۋرين اۋىلىنداعى مونشانىڭ شەكتەۋ قويىلعان ۋاقىت ىشىندە 8 ادام قابىلداعانى انىقتالىپ وتىر. رەيد ناتيجەسى بويىنشا اكىمشىلىك حاتتامالار تولتىرىلدى. جالپى, 6 قاراشا مەن 7 جەلتوقتان ارالىعىنداعى رەيد شارالارى بارىسىندا 10 619 نىسان تەكسەرىلىپ, 1448 ءتارتىپ بۇزۋشىعا جالپى سوماسى 54 ملن تەڭگە بولاتىن 897 ايىپپۇل سالىنعان.
قوستاناي وبلىسى