قازىرگى كيبەر وقۋ-جاتتىعۋلارىندا نەگە كيبەرقاۋىپسىزدىك سەرتيفيكاتى جاسالدى؟ وتكەن جىلى پرەزيدەنت بۇل جۇيە ەل قاۋىپسىزدىگىنە تىكەلەي قاۋىپ تونگەن جاعدايدا عانا قولدانىلادى دەپ ايتقان بولاتىن. قر ءتسدياوم اقپاراتتىق قاۋىپسىزدىك كوميتەتىنىڭ توراعاسى رۋسلان ابدىقالىقوۆتىڭ ايتۋىنشا, بۇل تەكسەرۋ ءۇشىن قاجەت.
«بۇگىنگى كيبەر وقۋ-جاتتىعۋلارىندا ءبىز فۋنكتسيونالدىڭ بار ەكەنىنە, ونىڭ جۇمىس ىستەيتىنىنە تاعى دا كوز جەتكىزدىك, ءوزىمىز ءۇشىن پروبلەمالىق ماسەلەلەردى انىقتادىق. وسى پروبلەمالىق ماسەلەلەردى شەشۋمەن اينالىساتىن بولامىز, ەگەر اياق استىنان ونى قولدانۋ قاجەت بولسا, وندا ازاماتتارىمىزعا قولايسىزدىق تۋعىزباي بارىنشا قولدانۋ ءۇشىن», - دەدى ۆەدومستۆو باسشىسى.
نەگە جەتەكشى شەتەلدىك پلاتفورمالار قازاقستاندىق قاۋىپسىزدىك سەرتيفيكاتىن قوسۋدان باس تارتتى؟ جۇيە ترافيكتى پايدالانادى, پارولدەردى ساقتايدى جانە دەرەكتەردى كوپشىلىككە تاراتۋ قاۋپى بار ما؟ ورتالىق كوممۋنيكاتسيالار قىزمەتىندە وتكەن بريفينگتە جۋرناليست ءوز وتانداستارىنىڭ الاڭداۋشىلىعىن جەتكىزدى. سپيكەر سەرتيفيكاتتىڭ قاۋىپسىز ەكەندىگىنە سەندىردى. ول بارلىق تەحنيكالىق ستاندارتتارعا سايكەس كەلەدى جانە باسقالاردان كەم ەمەس.
«كومپيۋتەرىڭىزدى نەمەسە سمارتفونىڭىزدى اشىپ, سەرتيفيكاتتار بولىمىنە كىرىڭىز. ول جەردەن بۇكىل الەم بويىنشا ورناتىلعان جۇزگە جۋىق سەرتيفيكاتى كورەسىز. نەمىس, برازيليالىق, جاپون, كورەي... بۇعان قوسا, قازاقستاندىق سەرتيفيكاتتى ورناتساق, تۇك تە بولمايدى. بۇل بىزدە زاڭمەن قاراستىرىلعان. ونىڭ ۇستىنە, جۇيە اۆتوماتتاندىرىلعان رەجيمدە جۇمىس ىستەيدى: پايدالانۋشىنىڭ قايدا بارعانىن, نە ىستەگەنىن, قانداي پارولدەردى ەنگىزگەنىن ەشكىم باقىلامايدى. جۇيە تىيىم سالىنعان كونتەنتتى نۇكتەلى بۇعاتتاۋعا عانا باعىتتالعان. بىلايشا ايتقاندا, ماشينا ترافيككە قولجەتكىزەدى جانە وسى ترافيكتە تەك قارا تىزىمگە ەنگەن سىلتەمەلەردى عانا تابۋعا تىرىسادى. ەگەر ول انىقتالسا, مۇنداي سۇراۋ ءۇزىلىپ, پايدالانۋشى جاۋاپ المايدى. بۇل جاعدايدا 404-ءشى پاراقشا اشىلادى, ياعني سەرۆەردەن جاۋاپ بەرىلمەيدى. ەگەر ادام سەرتيفيكات ورناتپاسا, وندا شەتەلدىك سەرۆيستەرمەن ءوزارا ءىس-قيمىل كەزىندە پروبلەمالار الدەقايدا كوپ بولادى», - دەپ ءتۇسىندىردى اقپاراتتىق قاۋىپسىزدىك كوميتەتىنىڭ باسشىسى.
ال ەگەر پايدالانۋشىلاردىڭ جەكە دەرەكتەرىنە قولجەتكىزە الاتىن ءۇشىنشى تۇلعالار ونى پايدالانباق بولسا شە؟
«بىرىنشىدەن, ادامدار ونىمەن جۇمىس ىستەمەيدى. ەكىنشىدەن, ءبىزدىڭ ازاماتتارىمىزدى كونستيتۋتسيا قورعايدى, جەدەل-ىزدەستىرۋ قىزمەتى تۋرالى زاڭ بار, قىلمىستىق ءىس جۇرگىزۋ كودەكسى بار, قۇقىق قورعاۋ جانە ارناۋلى مەملەكەتتىك ورگانداردىڭ بارلىق وسى ارەكەتتەرىن جوعارى قاداعالاۋ ورگانى باس پروكۋراتۋرا قاداعالايدى. مەنىڭ ويىمشا, ول بىرەۋگە مالىمەتتەردى ءوز ەركىمەن الىپ, زاڭسىز پايدالانۋعا جول بەرمەيدى. سونىمەن قاتار, ءوز وكىلەتتىكتەرىن تەرىس پايدالانعان قىزمەتكەرگە قاتىستى قىلمىستىق جازا قولدانىلادى. ءبىزدىڭ مەملەكەت بۇعان قاتاڭ قارايدى», - دەپ سەندىردى رۋسلان ابدىقالىقوۆ.