فرانتسيانىڭ استاناسى پاريجدە قاۋىپسىزدىك تۋرالى زاڭ جوباسىنا قارسى دەمونستراتسيالار كەزىندە ونداعان نارازىلىق ءبىلدىرۋشى پوليتسيامەن قاقتىعىسىپ قالدى.
پوليتسيا نارازىلىق بىلدىرۋشىلەر دۇكەن سورەلەرىن قيراتىپ, بىرنەشە كولىكتى ورتەگەننەن كەيىن كوزدەن جاس شىعاراتىن گاز قولدانعان. سەنبىدە بۇكىل ەل بويىنشا 100-گە جۋىق ميتينگى جوسپارلانعان بولاتىن. تۇرعىندار پوليتسيا قىزمەتكەرلەرىن سۋرەتكە تۇسىرۋگە تىيىم سالاتىن زاڭ جوباسىنا نارازىلىق تانىتىپ وتىر. قارسىلاستار بۇل زاڭ ءباسپاسوزدىڭ پوليتسيا قاتىگەزدىگىن دايەكتەۋدە بوستاندىعىن شەكتەيدى دەيدى. بۇل ماسەلە ءۇش پوليتسەيدىڭ قارا ءناسىلدى مۋزىكالىق پروديۋسەردى ۇرىپ جاتقان سۋرەتتەرى تاراعاننان كەيىن ۋشىعا ءتۇستى. تەكەتىرەس بىرنەشە اپتادا جالپىحالىقتىق سيپات الىپ, دەمونستراتسيالار فرانتسيانىڭ بوردو, ليلل, مونپەلە, نانتا جانە باسقا قالالارىندا دا ءوتتى. الايدا ۇكىمەت بۇل زاڭ جوباسى وفيتسەرلەردى ينتەرنەتتەگى قىسىمنان قورعاۋعا كومەكتەسەدى دەيدى.
سەنبى كۇنى مىڭداعان ادام مەن «سارى جەيدەلەر» قوزعالىسى قاتىسقان پاريجدەگى بەيبىت شەرۋلەردىڭ ءبىرى قاقتىعىسقا ۇلاسقان. نارازىلىق بىلدىرۋشىلەردىڭ قاتارىندا قارا كيىم كيىپ, بەتىن تۇمشالاعان ءبىر توپ پوليتسياعا جارىلاتىن قۇرىلعىلار لاقتىرا باستاعان. پاريج پوليتسياسى نارازىلىققا شىققاندار قاتارىندا 500-گە جۋىق ب ۇلىكشى بولعانىن ايتقان. ىشكى ىستەر ءمينيسترى دجەرالد دارمانين بۇل وقيعاعا بايلانىستى 22 ادام ۇستالعانىن حابارلادى.