ەڭبەك جانە حالىقتى الەۋمەتتىك قورعاۋ مينيسترلىگىندە الەۋمەتتىك جۇمىستىڭ باسىم باعىتتارى ماسەلەلەرى جونىندەگى ۆەدومستۆوارالىق كەڭەستىڭ وتىرىسى ءوتتى. كەڭەستە ەڭبەكمينىنىڭ وكىلدەرى بەينەكونفەرەنتسبايلانىس رەجيمىندە قر-دا الەۋمەتتىك قىزمەت كورسەتۋدى ودان ءارى جاڭعىرتۋدىڭ 2025 جىلعا دەيىنگى ۇلتتىق جوسپارىنىڭ جوباسىن, ارناۋلى الەۋمەتتىك قىزمەتتەر سالاسىن جان باسىنا نورماتيۆتىك قارجىلاندىرۋعا كوشۋ تاسىلدەرىن, الەۋمەتتىك قامسىزداندىرۋ كودەكسىنىڭ «الەۋمەتتىك قىزمەتكەرلەردىڭ وڭ مارتەبەسى» ءبولىمىن جۇرتشىلىققا تانىستىردى, دەپ حابارلايدى Egemen.kz.
ءىس-شارا قر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەرلان اۋكەنوۆتىڭ توراعالىعىمەن قر بالا قۇقىقتارى جونىندەگى ۋاكىل ارۋجان ساين, جەرگىلىكتى اتقارۋشى ورگاندار, ەلىمىزدىڭ مەديتسينالىق-الەۋمەتتىك مەكەمەلەرى, الەۋمەتتىك جۇمىستىڭ باسىم باعىتتارى ماسەلەلەرى جونىندەگى ۆەدومستۆوارالىق كەڭەس, ەكونوميكالىق جانە ساپالى جۇمىسپەن قامتۋ, الەۋمەتتىك وڭالتۋ, الەۋمەتتىك قىزمەتتەر جۇيەسىن جەتىلدىرۋ ماسەلەلەرى جونىندەگى ۇيلەستىرۋ كەڭەسى مەن جۇمىس توبى وكىلدەرىنىڭ قاتىسۋىمەن ءوتتى.
ونلاين-كونفەرەنتسيا بارىسىندا ارۋجان ساين قازىر ۇلكەن جۇيەلى وزگەرىستەر بولىپ جاتقانىن, ولاردىڭ ۇلتتىق جوسپاردا كورىنىس تاپقان اتاپ ءوتتى.
ء«بىز بالالاردىڭ مۇگەدەكتىگىن ازايتۋ جونىندەگى جول كارتاسىن – سكرينينگتىك دياگنوستيكا ساتىسىندا قاجەتتى مەديتسينالىق جانە تۇزەتۋ-پەداگوگيكالىق كومەك الۋ ءۇشىن قر-دا مۇمكىندىكتەرى شەكتەۋلى بالالارعا كەشەندى كومەك كورسەتۋدى جەتىلدىرۋ جونىندەگى 2021-2023 جىلدارعا ارنالعان جول كارتاسىن قابىلدادىق. بۇل بالالاردىڭ تولەمدەرگە, تەحنيكالىق وڭالتۋ قۇرالدارىنا جانە الەۋمەتتىك قىزمەتتەرگە مۇقتاج بولۋىن تومەندەتۋگە ىقپال ەتۋگە ءتيىس. جول كارتاسى 3 جىلعا ەسەپتەلگەن, ونى كەلەسى جىلدان ىسكە اسىرا باستايمىز. ءبىز بارلىق مۇددەلى ورگانداردىڭ قولداۋىنا ۇمىتتەنەمىز, ويتكەنى بۇل ءبىزدىڭ ورتاق ءىسىمىز. شەشىلۋى قاجەت ماڭىزدى مىندەتتەردىڭ ءبىرى - الەۋمەتتىك سالا قىزمەتكەرلەرىنىڭ مارتەبەسى مەن جاعدايى. ەگەر ءسىز كاسىبي كادرلاردى تارتپاساڭىز, ادامداردى ءوز جۇمىسىنا ادال بولۋعا ىنتالاندىرماساڭىز, جۇيەدە بىردەڭەنى وزگەرتۋ قيىنعا سوعادى. سوندىقتان مەن الەۋمەتتىك قىزمەتكەرلەردىڭ جالاقىسىن كوتەرۋدى تولىقتاي قۇپتايمىن جانە مۇنىڭ مۇمكىندىگىنشە تەزىرەك بولعانىن قالايمىن», – دەپ اتاپ ءوتتى ارۋجان ساين.
سونداي-اق, كەڭەس بارىسىندا ۇلتتىق جوسپار جوباسىنىڭ تانىستىرىلىمىمەن ەڭبەكمينى الەۋمەتتىك قىزمەتتەر ساياساتىن دامىتۋ دەپارتامەنتىنىڭ ديرەكتورى دامەجان سادۋاقاسوۆا ءسوز سويلەدى.
«مەملەكەت باسشىسىنىڭ وتكەن جىلعى 2 قىركۇيەكتەگى «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىن ورىنداۋ اياسىندا «وتباسى جانە بالا ينستيتۋتىن قولداۋ, ينكليۋزيۆتى قوعام قۇرۋ» باعىتى بەلگىلەنگەنىن اتاپ وتكىم كەلەدى. وسى جۇمىس شەڭبەرىندە بىزدە الەۋمەتتىك جۇمىس ماسەلەلەرى جونىندەگى ۆەدومستۆوارالىق كەڭەس جۇمىس ىستەيدى, الەۋمەتتىك جۇمىس جونىندەگى ۇلتتىق رەسۋرستىق ورتالىق قۇرىلدى, الەۋمەتتىك قىزمەتتەر پورتالى ەنگىزىلدى جانە بارلىق وڭىرلەردە وتباسىن قولداۋ ورتالىقتارى قۇرىلدى», – دەدى سپيكەر.
جان باسىنا شاققانداعى نورماتيۆتىك قارجىلاندىرۋعا كوشۋگە قاتىستى دامەجان سادۋاقاسوۆا مۇنداي مودەل بالاباقشالاردا, مەكتەپتەردە, ەمحانالاردا جانە ت. ب. ىسكە اسىرىلعانداي «اقشا كليەنتتىڭ سوڭىنان ەرەدى» قاعيداتىن ىسكە اسىرۋعا مۇمكىندىك بەرەتىنىن ايتتى.
ونىڭ ايتۋىنشا, ناتيجەسىندە ەلىمىزدىڭ مەديتسينالىق-الەۋمەتتىك مەكەمەلەرىندە باسەكەلەستىك پايدا بولادى, سودان الەۋمەتتىك قىزمەتتەردىڭ جاڭا تۇرلەرى ەنگىزىلەدى. بۇدان باسقا, مۇنداي ءتاسىل قولدا بار ماتەريالدىق-تەحنيكالىق, كادرلىق جانە قارجىلىق رەسۋرستاردى وڭتايلاندىرۋعا جانە الەۋمەتتىك قىزمەتتەردى الۋشىلاردىڭ, ءونىم بەرۋشىلەر مەن مەملەكەتتىڭ مۇددەلەرىن بىرىكتىرۋگە مۇمكىندىك بەرەدى.
سونىمەن قاتار, الەۋمەتتىك قامسىزداندىرۋ كودەكسىنىڭ «الەۋمەتتىك قىزمەتكەرلەردىڭ وڭ مارتەبەسى» تاراۋىنىڭ تانىستىرىلىمىمەن ەڭبەكمينى الەۋمەتتىك كومەك ساياساتىن دامىتۋ دەپارتامەنتىنىڭ ديرەكتورى اسقار نيازوۆ ءسوز سويلەدى. ول الەۋمەتتىك قىزمەتكەر مارتەبەسىن ارتتىرۋ ءۇشىن مىناداي شارالار قابىلداناتىنىن اتاپ ءوتتى: «الەۋمەتتىك قىزمەتكەر» ۇعىمى ايقىندالىپ, مارتەبەسى زاڭنامالىق تۇردە بەكىتىلەتىن, تىركەۋ جانە اتتەستاتتاۋ ارقىلى الەۋمەتتىك قىزمەتكەرلەردى ەسەپكە الۋ جولعا قويىلاتىن, بىلىكتىلىك ساناتتارىن بەرۋگە قويىلاتىن تالاپتار ارتتىرىلاتىن, كادرلاردى دايارلاۋ جانە ۇزدىكسىز ءبىلىم بەرۋ دەڭگەيى جەتىلدىرىلەتىن بولادى.
ايتا كەتەيىك, قازىرگى ۋاقىتتا ەلىمىزدە الەۋمەتتىك قىزمەتكەرلەر تەستىلەۋدەن وتۋدە. اعىمداعى جىلدىڭ 5 جەلتوقسانىنا دەيىن شامامەن 12 مىڭ ادامدى سىناقتان وتكىزۋ جوسپارلانۋدا. تەستىلەۋ الەۋمەتتىك قىزمەتكەرلەردىڭ بازالىق ءبىلىم دەڭگەيىن انىقتاۋ ءۇشىن وتكىزىلەدى, سودان كەيىن ولاردى وقىتۋ جۇرگىزىلەدى. بۇل قازاقستان رەسپۋبليكاسىندا الەۋمەتتىك قىزمەت كورسەتۋدى ودان ءارى جاڭعىرتۋدىڭ 2025 جىلعا دەيىنگى ۇلتتىق جوسپارىنىڭ جوباسىندا قاراستىرىلعان.