قارۋلى كۇشتەردەگى جاڭا وقۋ جىلى " ۇلى دالا اسكەرى – تاۋەلسىزدىك تىرەگى!" ۇرانىمەن وتەدى. اسكەري بولىمدەر مەن مەكەمەلەردىڭ ءبىرىنشى باسشىلارى وتكىزگەن مەملەكەتتىك-قۇقىقتىق دايىندىق جاڭا وقۋ كەزەڭىنىڭ العاشقى ساباعى بولدى, دەپ حابارلايدى Egemen.kz قورعانىس مينيسترلىگىنىڭ ءباسپاسوز قىزمەتىنە سىلتەمە جاساپ.
بارلىق ساناتتاعى اسكەري قىزمەتشىلەرگە ارميانىڭ وتكەن جىلدىق قورىتىندىلارى مەن جەتىستىكتەرى جەتكىزىلدى, سونداي-اق جاڭا وقۋ جىلىنا مىندەتتەر قويىلدى. ولاردىڭ اراسىندا اسكەرلەردىڭ جوعارى جاۋىنگەرلىك ازىرلىگىن قولداۋ, جاۋىنگەرلىك دايارلىق پەن جەكە قۇرامنىڭ دالالىق داعدىسىن جەتىلدىرۋ, بىتىمگەرشىلىك قىزمەتتى قامتاماسىز ەتۋ, اسكەري قىزمەتشىلەردىڭ مورالدىق-پسيحولوگيالىق جاي-كۇيىن نىعايتۋ جانە باسقا دا بىرقاتار الەۋمەتتىك اسپەكتىلەر بويىنشا ماسەلەلەر بار.
اپتا بويى بارلىق اسكەري بولىمدەر مەن مەكەمەلەردە وتكىزىلەتىن تاكتيكالىق-ارنايى ساباقتار اقپاراتتاندىرۋ جۇيەسىنىڭ ساپاسىن, شتابتاردىڭ ۇيلەسىمدى جۇمىسىن تەكسەرۋگە, باسقارۋ ورگاندارىنىڭ, قۇرامالار مەن اسكەري بولىمدەردىڭ ءوزارا ءىس-قيمىل دەڭگەيىن جەتىلدىرۋگە باعىتتالادى.
قارۋلى كۇشتەردىڭ باسشىلىعى وقۋ جىلىنىڭ باستالۋىندا بارلىق ماسەلەلەردى تولىق پىسىقتاۋ قاجەتتىگى تۋرالى نۇسقاۋلار بەردى. پاندەميامەن جانە كارانتيندىك ءىس-شارالارمەن بايلانىستى شەكتەۋلەر جاعدايىندا بولىمشەلەردىڭ قىزمەتىنە باسا نازار اۋدارۋ كەرەك.