ۇمىتكەرلەر مەن حالىقارالىق بايقاۋشىلار تىركەلدى

وتىرىستى اشقان قازاقستان رەسپۋبليكاسى ورتالىق سايلاۋ كوميسسياسىنىڭ توراعاسى بەرىك يماشەۆ ءماجىلىس دەپۋتات­تى­عىنا كانديداتتاردىڭ پار­تيالىق تىزىمدەرىن ۇسىنۋ مەر­زىمى 30 قاراشا ساعات 18.00-دە اياق­تالعانىن ەسكە سالدى. ور­تالىق سايلاۋ كوميسسياسىنا تىزىم­دەرىن بەس ساياسي پارتيا ۇسىن­عان. ساياسي پارتيالاردىڭ, باس پرو­كۋراتۋرانىڭ, ادىلەت, ىشكى ىستەر جانە قارجى مينيستر­لىك­تەرىنىڭ, اۋماقتىق سايلاۋ كوميس­سيالارىنىڭ قاتىسۋىمەن جيىندا ەكى ماسەلە قارالدى.

كۇن تارتىبىندەگى ءبىرىنشى ما­سەلە بويىنشا بايانداعان ورتا­لىق سايلاۋ كوميسسياسىنىڭ مۇشەسى اسىلبەك سماعۇلوۆ  «ساي­لاۋ تۋرالى» كونستيتۋتسيالىق زاڭ­نىڭ 89-بابىنا سايكەس ءبىر سايا­سي پارتيادان تىزىمگە ەنگىزىلگەن ادامداردىڭ سانى ساياسي پارتيالار اراسىندا بولىنەتىن دەپۋتاتتىق مانداتتاردىڭ بەل­گىلەنگەن سانىنان وتىز پايىزعا اس­پايتىن ءبىر عانا ءتىزىمدى تىر­كەۋگە بولاتىنىن ايتتى.

«پارتيالىق تىزىمدە ايەل­دەر مەن 29 جاسقا تولماعان ادام­داردىڭ سانى وعان ەنگىزىلگەن ادامداردىڭ جالپى سانىنىڭ كەمىندە 30 پايىزىن قۇراۋعا ءتيىس. Nur Otan پارتياسىنىڭ پارتيالىق تىزىمىندە 126 ادام بار. 40 ايەل جانە 29 جاسقا تول­ماعان ادامدار ەنگىزىلگەن. بۇل – تىزىمگە ەنگىزىلگەندەردىڭ جال­پى سانىنىڭ 31,7 پايىزى. ۋاكىلەتتى ورگاندار ۇسىنعان مالىمەتتەر نەگىزىندە ورتالىق سايلاۋ كوميسسياسى ءماجىلىس دەپۋتاتى بولىپ سايلانۋ ءۇشىن پارتيالىق تىزىمگە ەنگىزىلگەن ادامداردىڭ كونستيتۋتسيا مەن «سايلاۋ تۋرالى» زاڭنىڭ تالاپتارىنا سايكەستىگىنە تەكسەرۋ جۇرگىزدى. پارتيالىق تىزىمگە ەنگىزىلگەن بارلىق ۇمىتكەر تالاپتارعا سايكەس كەلەدى», دەدى ا.سماعۇلوۆ.

وسىعان بايلانىستى ورتا­لىق سايلاۋ كوميسسياسىنىڭ مۇشە­لەرى «2021 جىلعى 10 قاڭ­تارعا تاعايىندالعان قازاقستان رەس­پۋبليكاسى پارلا­مەنتى ءما­جىلىسى دەپۋتاتتارىنىڭ كەزەكتى سايلاۋىنا Nur Otan پارتياسىنىڭ ءتىزىمىن تىركەۋ تۋرالى» قاۋلى قابىلدادى.

ءماجىلىس دەپۋتاتى بولىپ سايلانۋ ءۇشىن كانديدات قازاق­ستان رەسپۋبليكاسىنىڭ ازاماتى بولۋعا, قازاقستان رەسپۋب­ليكاسىنىڭ اۋماعىندا سوڭعى 10 جىلدا تۇرۋعا, 25 جاستان كىشى بولماۋعا جانە سايلاۋ قۇقىعىنا يە بولۋعا ءتيىس.

ودان بولەك كوميسسيا مۇشەسى اناستاسيا ششەگورتسوۆا حالىق­ارالىق بايقاۋشىلاردى تىركەۋ ماسەلەسىنە توقتالدى. ونىڭ ايتۋىنشا, «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭ­نىڭ 20-2-بابىنا سايكەس شەت مەملەكەتتەردىڭ, حالىقارالىق ۇيىمداردىڭ بايقاۋشىلارىن اككرەديتتەۋدى ورتالىق سايلاۋ كوميسسياسى سىرتقى ىستەر مينيسترلىگىنىڭ ۇسىنۋى بويىنشا جۇزەگە اسىرادى. 2020 جىلعى 20 قاراشادا سىرتقى ىستەر مينيسترلىگىنىڭ ۇسىنۋى بو­يىنشا ورتالىق سايلاۋ كوميسسياسى تمد پارلامەنتارالىق اسسام­بلەياسىنان 29 بايقاۋ­شىنى اككرەديتتەگەن ەدى. 25 جانە 26 قاراشادا سىرتقى ىستەر مينيسترلىگىنەن تاعى 10 باي­قاۋشىنى تىركەۋ تۋرالى ۇسى­نىس كەلىپ تۇسكەن. ولار­دىڭ ىشىندە 6 بايقاۋشى تمد باي­قاۋ­شىلار ميسسياسى قۇرا­مى­نان, 4 بايقاۋشى يسلام ىن­تىماق­تاستىعى ۇيىمى ميسسياسىنان اككرەديتتەلەدى.

وسىعان بايلانىستى ورتا­­لىق سايلاۋ كوميسسياسى «2021 جىلعى 10 قاڭتارعا تاعا­يىندالعان قازاقستان رەس­پۋب­ليكاسى پارلامەنتىنىڭ ءماجى­لىسى جانە ءماسليحاتتارى دەپۋتات­تارىنىڭ كەزەكتى سايلاۋىنا حالىقارالىق ۇيىمداردىڭ باي­قاۋشىلارىن اككرەديتتەۋ تۋرالى» قاۋلى قابىلدادى.

ا.ششەگورتسوۆا اككرەديتتەۋگە ۇسىنىستاردىڭ كەلىپ تۇسۋىنە قاراي بايقاۋشىلار بويىنشا دەرەكتەر جاڭارتىلىپ وتىراتىنىن اتاپ ءوتتى. وسك حالىقارا­لىق بايقاۋشىلاردى 2021 جىلعى 4 قاڭتار ساعات 18.00-گە دەيىن تىركەيدى.