«ارسەلورميتتال تەمىرتاۋ» اق كومىر دەپارتامەنتىنە قاراستى لەنين اتىنداعى شاحتا جىلدىق جوسپاردى مەرزىمىنەن بۇرىن ورىندادى, دەپ حابارلايدى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ.
بيىل اتالعان كاسىپورىن 1 ملن 450 مىڭ توننا كومىر ءوندىردى. وسى قۋانىشتى ساتكە بايلانىستى, قاجەتتى كولەمگە قول جەتكىزگەن بريگادانى جەر بەتىندە سالتاناتتى جاعدايدا قارسى الۋ ءراسىمى ۇيىمداستىرىلدى.
«ارسەلورميتتال تەمىرتاۋ» اق كومىر دەپارتامەنتىنىڭ ءوندىرىس جونىندەگى ديرەكتورى سەرگەي وگاي مۇنداي جەتىستىكتىڭ ۇجىمنىڭ ەرەن ەڭبەگى ارقاسىندا مۇمكىن بولعانىن ايتادى.
– اي سايىن, جىل بويى شاحتا جوسپاردى ورىندايدى جانە تۇراقتى جۇمىس ىستەپ كەلەدى. قارقىننىڭ تومەندەمەۋىن تىلەيمىن, – دەدى ول كەنشىلەردى تابىسىمەن قۇتتىقتاپ تۇرىپ.
ايتا كەتەتىن ءبىر جايت, بيىل لەنين اتىنداعى شاحتادا «اباي» شاحتاسىنىڭ كەنشىلەرى دە جۇمىس ىستەدى. قازىر ولار وزدەرىنىڭ كاسىپورنىنا ورالعان.
لەنين اتىنداعى شاحتانىڭ ءوندىرىس جونىندەگى ديرەكتورىنىڭ ورىنباسارى جاقسىباي بەيسەمباەۆ ءوندىرۋ بويىنشا جىلدىق بيزنەس-جوسپاردى مەرزىمىنەن بۇرىن ورىنداۋدىڭ وڭاي بولماعانىن اتاپ ءوتتى.
– بارلىق قيىندىقتارعا قاراماستان, ءبىز ءوندىرۋ بويىنشا جىلدىق بيزنەس-جوسپاردى مەرزىمىنەن بۇرىن ورىنداي الدىق. جىل بويى بىزدە ەكى لاۆا جۇمىس ىستەدى. وندىرىستىك تاپسىرمانى ورىنداۋدا كاسىپورىننىڭ بارلىق ۋچاسكەلەرى ەڭبەك ەتتى, – دەدى ج.بەيسەمباەۆ.
قاراعاندى وبلىسى