قازاقستاننىڭ ەكولوگيا ءمينيسترى ماعزۇم مىرزاعاليەۆ ۆەنگريا كومپانيالاكرىن جەر قويناۋىن زەرتتەۋ سالاسى بويىنشا بىرلەسكەن جوبالاردى جۇزەگە اسىرۋعا شاقىردى. بۇل جونىندە ول ۆەنگريانىڭ قازاقستانداعى توتەنشە جانە وكىلەتتى ەلشىسى ميحايا گالوشفايمەن كەزدەسۋدە ايتتى.
ء«بىز گەولوگيا سالاسىنداعى قازاق-ۆەنگەر قاتىناسىن كۇشەيتۋگە مۇددەلىمىز. بۇگىندە قازاقستاندا مينەرالدىق رەسۋرستاردىڭ تۇرلەرى بويىنشا اۋماقتاردىڭ پەرسپەكتيۆاسىن باعالاۋعا قاتىستى گەولوگيالىق بارلاۋ جۇمىسىن ءتيىمدى وتكىزۋگە باسقا تاۋ-كەن زاڭنامالارىمەن سالىستىرعاندا قولايلى جاعداي جاسالعان»,- دەدى قر ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ.
مينيستر سونىمەن بىرگە بيىل گەولوگيالىق بارلاۋدىڭ 2021 – 2025 جىلدارعا ارنالعان مەملەكەتتىك باعدارلاماسىن ازىرلەنگەنىن, ول قازاقستانداعى گەولوگيالىق بارلاۋ جۇمىستارىنىڭ بارلىق كەزەڭىنە ينۆەستيتسيا سالۋعا نيەت بىلدىرگەن ينۆەستورلارعا اشىق بولاتىنىن اتاپ ءوتتى. بۇدان بولەك 2021 جىلدىڭ ورتاسىنا قاراي «مينەرالدى رەسۋرستاردىڭ ۇلتتىق بانكى» اقپاراتتىق جۇيەسى ىسكە قوسىلماق. ونىڭ ماقساتتارىنىڭ ءبىرى – ينۆەستورلارعا جەر قويناۋىن پايدالانۋ پروتسەستەرى تۋرالى اقپارات ۇسىنۋدى جەڭىلدەتەتىن ء«بىر تەرەزە» قاعيداتىن ەنگىزۋ. جۇيە بىرىڭعاي بازاعا گەولوگيالىق ەسەپتەر, پايدالى قازبالار قورى بالانسى, كەن ورىندارىنىڭ پاسپورتى, اۋماقتاردىڭ زەرتتەلۋى تۋرالى جانە تاعى دا باسقا مالىمەتتەردى جيناۋعا مۇمكىندىك بەرەدى.
ء«بىز سونىمەن بىرگە «قازگەولوگيا» اكتسيونەرلىك قوعامى مەن MECKEKERG ۆەنگەر مەملەكەتتىك كاسىپورنىنىڭ ارىپتەستىگى تۋرالى ۇسىنىستى قولدايمىز”, - دەدى م.مىرزاعاليەۆ.
كەزدەسۋدە سونىمەن قاتار ەكى ەلدىڭ سۋ رەسۋرستارى سالاسىنداعى قالىپتاسقان ارىپتەستىگىن نىعايتۋ ماسەلەسى ءسوز بولدى. ەسكە سالساق, قازاقستان مەن ۆەنگريا اراسىندا سۋ رەسۋرستارى سالاسىنداعى ارىپتەسىك بويىنشا ءوزارا تۇسىنىستىك تۋرالى مەموراندۋمعا قول قويىلىپ, بىرلەسكەن ساراپشىلىق توپ قۇرۋ جايىندا كەلىسىمگە قول جەتكىزىلگەن.
«وسىعان بايلانىستى پاندەمياعا قاراماستان بىزگە وسى باعىتتاعى ارىپتەستىكتى تەرەڭدەتىپ, جاقىن ارالىقتا بىرلەسكەن ساراپشىلىق توپتى قۇرۋ كەرەك. سونىمەن قوسا, ۆەنگريا تاراپىنا قازاقستاننىڭ ترانسشەكارالىق سۋ اعىندارى مەن حالىقارالىق كولدەردى قورعاۋ بويىنشا كونۆەنتسياعا توراعالىق ەتۋى مەن «ترانسشەكارالىق كونتەكستە سۋ رەسۋرستارىن ءبولۋ» جانە «ەكولوگيالىق اعىن – ەكولوگيالىق جۇيەنى ساقتاۋدىڭ نەگىزى» جوبالارىنا ساراپشىلىق قولداۋ كورسەتكەنى ءۇشىن العىس بىلدىرگىمىز كەلەدى», - دەدى مينيستر.
جۇزدەسۋ بارىسىندا ماعزۇم مىرزاعاليەۆ ۆەنگەر كومپانيالارىن اقتوبە وبلىسىنداعى اتموسفەرالىق اۋانىڭ لاستانۋى, قاراعاندى وبلىسىنداعى بالقاش كولى مەن ماڭعىستاۋ وبلىسىنداعى قوشقار اتا قالدىق قويماسى پروبلەمالارىن شەشۋگە باعىتتالعان جوبالارعا قاتىسۋعا دا شاقىردى.
اتاپ وتەيىك, الەمدەگى پاندەميا جاعدايىنا قاراماستان, قازاق-ۆەنگەر ساۋدا-ەكونوميكالىق قاتىناستارى تۇراقتى تۇردە دامىپ كەلەدى. ەكى مەملەكەت اراسىنداعى ساۋدا اينالىمى 2020 جىلى بىلتىرمەن سالىستىرعاندا 12,2%-عا ارتىپ, 84,9 ملن. اقش دوللارىن قۇرادى.