الماتى وبلىسىندا جاستار سىيلىعىنىڭ لاۋرەاتتارى انىقتالدى

اماندىق باتالوۆ الدىمەن جينالعانداردى تۇڭعىش پرەزيدەنت كۇنىمەن قۇتتىقتاپ, قوعام دامۋىنداعى جاستاردىڭ ءرولى ەرەكشە ەكەنىن اتاپ ءوتتى.

"جاستار وبلىستىڭ الەۋمەتتىك-ەكونوميكالىق دامۋىنا زور ۇلەس قوسۋدا. ءبىز 15 جىلدان بەرى وڭىرىمىزدە قوعامنىڭ ءار ءتۇرلى سالالارىندا بەلسەندى ەڭبەك ەتىپ, تابىسقا جەتكەن جاس قىزدار مەن جىگىتتەرىمىزگە وسى سىيلىقتى تابىستاپ كەلەمىز.  جاستار سىيلىعىنا يە بولۋ – بۇل ۇلكەن جەتىستىك. وبلىسىمىزدا وزدەرىڭىزدەي جان-جاقتى دامىعان, ماقساتى ايقىن جاستاردىڭ بولعانى ءبىز ءۇشىن قۋانىش. ءبىز ءوز تاراپىمىزدان مەملەكەت قولداۋىمەن جاستارعا بارلىق قاجەتتى جاعدايلاردى جاساپ كەلەمىز. ماسەلەن, اۋدانداردا 9 دەنە شىنىقتىرۋ-ساۋىقتىرۋ كەشەنىن اشتىق, تاعى 7-ەۋىن سالىپ جاتىرمىز. ودان بولەك بۇقارالىق سپورتتى دامىتۋعا جارتى ميلليارد تەڭگەدەي قارجى بولدىك. ءاربىر ادامنىڭ سپورتپەن كاسىبي تۇردە دە, دەنساۋلىعى ءۇشىن دە اينالىسۋىنا بارلىق جاعداي بار. جەڭىمپازداردى جەڭىستى جولىمەن تاعى ءبىر مارتە قۇتتىقتاي وتىرىپ, تابىستان تابىسقا جەتە بەرۋلەرىڭە تىلەكتەسپىن. وتانىمىز قازاقستان جاستارىمەن ماقتاناتىنداي ارقاشان ادال, ءادىل, ەڭبەكقور بولىڭدار. سەندەر – ءبىزدىڭ بولاشاعىمىزسىڭدار", - دەدى ا.باتالوۆ.

بۇل كۇنى ەسكەلدى اۋداندىق اۋرۋحاناسىنا «ديپلوممەن - اۋىلعا» باعدارلاماسىمەن كەلىپ, جۇمىس ىستەپ جاتقان اسەل ومىربەكوۆا «ۇزدىك جاس دارىگەر» اتانسا, دامير نۇركەجانوۆ «ۇزدىك جاس كاسىپكەر»  اتالىمىنا يە بولدى, ول - «Future-IT» روبوتوتەحنيكا مەكتەبىنىڭ نەگىزىن سالۋشى جانە جەتەكشىسى, تۇڭعىش پرەزيدەنتتىڭ «ەل ءۇمىتى» سىيلىعىنىڭ لاۋرەاتى, جاس كوشباسشىلاردىڭ «CAYLA» ورتا ازيا اكادەمياسىنىڭ ستۋدەنتى. ايگۇل امانگەلديەۆا «ۇزدىك اۋىل شارۋاشىلىعى مامانى» اتاعىنا قول جەتكىزدى, ول شەتەلدىك جۋرنالدا جاريالانعان اوك سالاسىنداعى 7 عىلىمي ماقالانىڭ اۆتورى. «ۇزدىك ستۋدەنت» اتالىمىندا مادينا تۇرداش جەڭىمپاز بولدى, ول ءى.جانسۇگىروۆ اتىنداعى جەتىسۋ ۋنيۆەرسيتەتىنىڭ ستۋدەنتى, «پاراساتتىلىق ەلشىسى» جاستار قوزعالىسىنىڭ جانە جاستار ورتالىعىنىڭ ۇيلەستىرۋشىسى, «قوعامدىق جۇمىستاعى بەلسەندىلىگى ءۇشىن» توسبەلگىسىمەن ناگرادتالعان. جالپى سانى 20 جاس ءتۇرلى نوميناتسيالار بويىنشا ماراپاتتالىپ, ولاردىڭ ارقايسىسىنا ارنايى ستاتۋەتكالار مەن اقشالاي سىيلىق سەرتيفيكاتتارى بەرىلدى.

جەڭىمپازداردىڭ اتىنان «ۇزدىك ادەبيەتشى» اتالىمىنىڭ جەڭىمپازى, جازۋشى, ادەبي سىنشى, «دارىن» جاستار سىيلىعىنىڭ لاۋرەاتى, كوپتەگەن حالىقارالىق جانە رەسپۋبليكالىق كونكۋرستاردىڭ جەڭىمپازى, 4 پروزالىق كىتاپتىڭ جانە 10 ادەبي-تاريحي زەرتتەۋ كىتابىنىڭ اۆتورى ەلدوس توقتارباي ءسوز الدى.

«تۇڭعىش پرەزيدەنتىمىز – ۇلت كوشباسشىسى نۇرسۇلتان ءابىش ۇلى نازارباەۆتىڭ كورەگەن جانە ساليقالى ساياساتىنىڭ ارقاسىندا جاستاردىڭ ءوزىن-ءوزى جان-جاقتى دامىتۋىنا بارلىق مۇمكىندىكتەر جاسالعان. بۇگىنگى كۇنى پرەزيدەنتىمىز قاسىم-جومارت توقاەۆ تا جاستارعا قولداۋ كورسەتىپ كەلەدى. ءبىز وزىمىزگە ارتىلعان سەنىمدى اقتاپ, ەلدىڭ لايىقتى ازاماتى بولۋعا بار كۇش-جىگەرىمىزدى ارنايمىز دەپ سەندىرەمىن. وسى ءساتتى پايدالانىپ, ء بىزدىڭ ەڭبەگىمىزدى ەلەپ, قۇرمەت كورسەتكەن وبلىس باسشىلىعىنا دا ريزاشىلىعىمدى بىلدىرەمىن. بارشا جەڭىمپازداردى شىن جۇرەكتەن قۇتتىقتاپ, ەڭبەكتەرىنە جەمىس تىلەيمىن», - دەدى ە.توقتارباي.

شارا سوڭىندا وبلىس ونەرپازدارىنىڭ شاعىن كونتسەرتى ۇسىنىلدى.