تارازدا كوروناۆيرۋسپەن كۇرەسۋشىلەرگە ارنالىپ مونۋمەنت ورناتىلدى

وبلىس ورتالىعىنان ورىن تەپكەن ەرەكشە كومپوزيتسيا جەر شارى تۇرىندە جاسالعان. ال, ونىڭ اينالاسىندا دارىگەرلەر, پوليتسيا قىزمەتكەرلەرى, ەرىكتىلەر, قۇتقارۋشىلار جانە اسكەريلەر سياقتى ءتۇرلى ماماندىق يەلەرىنىڭ بەينەلەرى ورناتىلعان. ەسكەرتكىشتىڭ جوعارعى جاعىندا ەلىمىزدەگى بەيبىتشىلىك پەن كەلىسىم قۇندىلىعىن بەينەلەيتىن قارلىعاشتارمەن قورشالعان شاڭىراق ورنالاسقان. مونۋمەنتتىڭ اشىلۋ سالتاناتىنا جامبىل وبلىسىنىڭ اكىمى بەردىبەك ساپارباەۆ ارنايى قاتىستى.

 «اشارشىلىق, سوعىس جانە قۋعىن-سۇرگىن كەزىندە اتا-بابالارىمىز ءتۇرلى ۇلت وكىلدەرىنە قۇشاق اشىپ, قولۇشىن سوزدى. سونداعى حالىقتىڭ بىرلىگى قيىن كەزەڭدەردى وتكەرۋگە كومەكتەستى. بيىلعى جىل ءبارىمىز ءۇشىن اۋىر بولدى. بۇل كەزەڭدە دە حالقىمىز ءوزىنىڭ ەڭ جاقسى قاسيەتتەرى – بىرلىك پەن ىنتىماعىنان تايعان جوق. وسى ەسكەرتكىشتە كورىنىس تاپقان ماماندىق يەلەرىنىڭ كۇشىمەن ءبىز جاعدايدى تۇراقتاندىرا الدىق. بۇل اسىرەسە ءوز دەنساۋلىعىنا تونگەن قاۋىپكە قاراماي كۇندىز-ءتۇنى جۇمىس ىستەگەن دارىگەرلەرگە قاتىستى. وكىنىشكە قاراي, ءبىز ولاردىڭ كەيبىرىنەن ايىرىلىپ قالدىق. سونداي-اق, مۇقتاج جاندارعا كومەكتەسىپ جۇرگەن ەرىكتىلەر تۋرالى دا ايرىقشا اتاپ وتكىم كەلەدى. وسىنداي جاستارىمىز بار كەزدە, ءبىز ەرتەڭگى كۇنگە سەنىممەن قاراي الامىز», دەدى بەردىبەك ساپارباەۆ. سونداي-اق, ول «Biz birgemiz» مونۋمەنتىنىڭ ورنالاسقان جەرىنىڭ تاڭدالۋى دا تەگىن ەمەس ەكەنىن, جاقىندا ەسكەرتكىشتىڭ جانىنان بىرنەشە مەديتسينالىق مەكەمەلەردىڭ بوي كوتەرەتىنىن اتاپ ءوتتى. سونىمەن قاتار, مونۋمەنتتىڭ ءوزى تاراز قالاسىنىڭ كورىكتى جەرلەرىنىڭ بىرىنە جانە شاھار تۇرعىندارىنىڭ سۇيىكتى دەمالىس ورنىنا اينالاتىنىن جەتكىزدى. ءوز سوزىندە وبلىستىق «جاس وتان» جاستار قاناتىنىڭ توراعاسى ءۋاليحان بولاتبەك پاندەميا ادامداردىڭ ءبىر-بىرىنە كومەكتەسۋ جولىنداعى بەرىك بىرلىگىن كورسەتكەنىن ايتتى. ء«بىز, ۆولونتەرلار, وبلىس جاستارى وسىنداي سىن ساتتە شەتتە قالا المادىق. كاسىپكەرلەردىڭ قولداۋىمەن مۇقتاج جاندارعا ازىق-ت ۇلىك, ءدارى-دارمەكتەر جەتكىزدىك. ءبىز ول ءۇشىن ەشكىمنەن ەشقانداي قايىرىم كۇتپەيمىز. جالعىز عانا «راحمەت» دەگەن قاراپايىم ءسوز ءبىزدى شابىتتاندىرادى», دەدى ول.

ەرلىك پەن ەلدىكتىڭ شەجىرەسىندەي بولعان «Biz birgemiz» مونۋمەنتىن تاراز تۇرعىندارى دا قىزىعا تاماشالاۋدا. وبلىس ورتالىعىندا ورنالاسقان ەرەكشە ەسكەرتكىش ەرلىك پەن ەڭبەكتىڭ جىرىن بولاشاققا قاراي جالعاپ تۇراتىن التىن كوپىر بولىپ قالا بەرمەك.