«ورتالىق ازيا - كورەيا رەسپۋبليكاسى» سىرتقى ىستەر مينيسترلەرىنىڭ ىنتىماقتاستىق فورۋمىنىڭ 13-ءشى وتىرىسىنا قاتىسۋ شەڭبەرىندە قازاقستاننىڭ سىرتقى ساياسي ۆەدومستۆوسىنىڭ باسشىسى مۇحتار تىلەۋبەردى كورەيا رەسپۋبليكاسىنىڭ سىرتقى ىستەر ءمينيسترى كان گەن حۆامەن كەلىسسوزدەر جۇرگىزدى, دەپ حابارلايدى Egemen.kz.
كەزدەسۋ بارىسىندا تاراپتار ەكىجاقتى ستراتەگيالىق ارىپتەستىكتى ودان ءارى دامىتۋدىڭ جاي-كۇيى مەن پەرسپەكتيۆالارىن تالقىلادى. COVID-19 پاندەمياسىنا قاراماستان, تۇراقتى ساياسي ديالوگ جوعارى دەڭگەيدە, سونداي-اق كوروناۆيرۋستىڭ تارالۋ سالدارىن تەزىرەك ەڭسەرۋ كونتەكستىندەگى ءوزارا ءىس-قيمىلدىڭ جوعارى قارقىنى ساقتالىپ وتىرعانى اتاپ ءوتىلدى.
تاراپتار قر پرەزيدەنتى قاسىم-جومارت توقاەۆتىڭ 2021 جىلى كورەيا رەسپۋبليكاسىنا جوسپارلانعان مەملەكەتتىك ساپارىنىڭ مازمۇندىق اسپەكتىلەرىن تالقىلادى.
مينيستر سەۋلگە جۇمىس ساپارى اياسىندا كورەيا رەسپۋبليكاسىنىڭ پرەمەر-ءمينيسترى چون سە گيۋن جانە كورەيا رەسپۋبليكاسى ۇلتتىق اسسامبلەياسىنىڭ سپيكەرى پاك بەن سوكپەن كەزدەستى.
مينيستر ەكىجاقتى ساياسي ديالوگتى, پارلامەنتارالىق بايلانىستاردى دامىتۋدىڭ ماڭىزدىلىعىن اتاپ ءوتىپ, كورەيا رەسپۋبليكاسىمەن ساۋدا-ەكونوميكالىق ىنتىماقتاستىقتى ودان ءارى نىعايتۋعا سەنىم ءبىلدىردى.