قوستاناي قالاسىندا تۇرمىسى تومەن تۇرعىندارعا ارنالعان قايىرىمدىلىق دۇكەنى ءبىر جىلدان بەرى جۇمىس ىستەپ كەلەدى. دۇكەن دەگەن اتى عانا بولماسا, مۇنداعى بۇيىمدار كەلگەن ادامدارعا سۋ تەگىن ۇلەستىرىلەدى.
ۆولونتەرلەردەن قۇرىلعان «پرومەتەي» قوزعالىسىنىڭ بەلسەندىلەرى وسىدان ءبىر جىل بۇرىن ناريمان بازارىنىڭ ماڭىنان عيمارات جالداپ, جوق-جىتىككە جىلۋ جينايتىن ورىن اشقان. سودان بەرى قايىرىمدى قالا تۇرعىندارى وزدەرىنەن ارتىلعان كيىم-كەشەك پەن باسقا دا تۇرمىستىق بۇيىمداردى وسى جەرگە اكەپ تاپسىرۋدى ادەت ەتكەن. مۇنىڭ سىرتىندا, كەيبىر ازاماتتار باسى ارتىق كيىم-كەشەگى, بالاعا ارنالعان ويىنشىعى بار ەكەنىن حابارلاپ قوڭىراۋ شالىپ جاتادى. بەلسەندى ازاماتتار مۇنداي مەكەنجايلارعا وزدەرى بارىپ, بەرگەنىن وسى دۇكەن سورەسىنە اكەلىپ قويادى.
قايىرىمدىلىق دۇكەنىنە تاياۋدا قالاداعى «تەمىرلان» اسكەري-سپورت كلۋبىنىڭ سپورتشىلارى كوپتەگەن كيىم-كەشەك تۇرلەرىن تارتۋ ەتتى.
– 30 جىل بويى بالالارمەن جۇمىس ىستەپ, جاستاردى سپورتقا باۋلىپ كەلەمىن. ءوزىمنىڭ دە بالام مەن نەمەرەم بار. قالامىزدا قايىرىمدىلىق دۇكەنى بار ەكەنىن جاقىندا عانا ەستىدىم. مۇنداي يگى شارادان تىس قالۋعا بولمايدى, بىردەن ءوزىم جاتتىقتىرىپ جۇرگەن بالالاردىڭ اتا-انالارىنا ۇندەۋ تاستادىم. كوپتەگەن جىلى كيىم, جاقسى بۇيىمدار جينالدى. ءتىپتى تاياۋدا عانا ءوزىنىڭ ساۋدا دۇڭگىرشەگىن جاپقان ءبىر اتا-انا جاپ-جاڭا مەكتەپ كيىمدەرىن اكەلىپ تاپسىردى, – دەدى سپورت كلۋبىنىڭ جەتەكشىسى رۋسلان سەكسەنباەۆ.
تەمىرلاندىقتاردىڭ قاتارىنا قوستانايداعى بىرنەشە اسكەري-پاتريوتتىق كلۋب كەلىپ قوسىلدى.
قوستاناي وبلىسى