ەلوردا دارىگەرلەرى سيرەك دەرتكە شالدىققان قىزعا كۇردەلى وتا جاسادى

اۋرۋ ايتىپ كەلمەيتىنى بەلگىلى. دەگەنمەن توميريستە 2 پاتولوگيا, ياعني پروتەيا سيندرومى مەن ەكى تابانىنىڭ الىپتىلىعى, سونداي-اق ىشەكتىڭ تامىرلى بۇزىلۋى قاتار ۇيلەسىپ كەلگەن ەكەن.

"پروتەيا سيندرومى بۇل سيرەك تۋا بىتكەن اۋرۋ. ول تەرىنىڭ, سۇيەكتەردىڭ, بۇلشىقەتتەردىڭ, ماي تىندەرىنىڭ, سونداي-اق قان مەن ليمفا تامىرلارىنىڭ شامادان تىس وسۋىمەن سيپاتتالادى. اۋرۋدىڭ وسى ءتۇرى وتە سيرەك كەزدەسەدى جانە الەمدە ءدال وسىنداي 200 جاعداي تىركەلگەن. بالا اياعىنىڭ مولشەرى ۇلكەن, ول دەنە سالماعى مەن مولشەرىنىڭ جارتىسىن قۇرايدى. ساۋساعىنىڭ اينالاسىندا سوزىلمالى وستەوميەليت وشاقتارى بار", دەيدى اۋرۋحانانىڭ ورتوپەديا جانە وڭالتۋ بولىمشەسىنىڭ مەڭگەرۋشىسى اعابەك چينكيباەۆ.

دارىگەردىڭ ايتۋىنشا, توميريستە اياق مولشەرىنىڭ ۇلعايۋىنان باسقا, ول ىشەكتىڭ ليمفوانگيوماتوزىمەن اۋىرعان. ىشەكتەن ءجيى قان كەتۋ سالدارىنان اۋىر انەميانىڭ دامۋىنا الىپ كەلگەن. سونىڭ ناتيجەسىندە ونى تۇزەتۋ ءۇشىن ايىنا 2-3 رەت قان قۇيۋ قاجەت بولعان. اعىمداعى جىلدىڭ باسىندا قىز جوسپارلى تۇردە اۋرۋحانانىڭ ورتوپەديا جانە وڭالتۋ بولىمىنە جاتقىزىلعان.

ال №2 بالالار اۋرۋحاناسىنىڭ حيرۋرگتەرى ءساۋىر ايىندا ىشەككە وتا جاسادى. بۇل قايتا-قايتا قان كەتۋدى توقتاتۋعا مۇمكىندىك بەردى. اتالعان وپەراتسيادان كەيىن بالاعا ءجيى قان مەن ونىڭ كومپونەنتتەرىن قۇيۋدىڭ قاجەتى بولمايدى. قازىرگى تاڭدا ءتوميريستىڭ دەنساۋلىعى جاقسارىپ, سالماق قوسا باستاپتى.

"قۇرامىندا ورتوپەدتەر, حيرۋرگتار مەن انەستەزيولوگتار بار مۋلتيتارتىپتىك توپ ونىڭ سول اياعىنىڭ تابانىنا رەكونسترۋكتيۆتى وتانى ءساتتى جاساپ شىقتى. الداعى جىلى ەمدەۋدىڭ 3 كەزەڭىنە ءوتىپ, اياقتارى مەن ىشەگىنە دە بىرنەشە وپەراتسيا جاساۋ جوسپاردا بار. وڭ اياعىنا جاسالعان وپەراتسيادان كەيىن بالانىڭ دەنساۋلىعى ودان ءارى جاقسارا تۇسەتىنە سەنىمىمىز مول", دەپ ءتۇسىندىردى اعابەك چينكيباەۆ.

ايتا كەتەيىك, قىزدىڭ اناسى وتا جاساۋعا قاتىسقان بارلىق دارىگەرلەرگە ۇلكەن العىسىن جەتكىزدى.