جىتىقارا تۇرعىنى ەدەننىڭ استىنا ەسىرتكى ساقتاعان

جىتىقارادا 39 جاستاعى جەرگىلىكتى تۇرعىننىڭ ۇيىنەن جارتى كيلوگرامم گەروين تابىلدى. ءتارتىپ ساقشىلارىنىڭ سوزىنشە, ەسىرتكىنىڭ قۇنى 12,5 ملن تەڭگە بولادى ەكەن.  پوليتسەيلەر اتالمىش ۇيدەن گەروينمەن بىرگە,  تارازى جانە 1 ميلليون تەڭگەدەن استام اقشا تاركىلەدى.

«پرەپارات» رەسپۋبليكالىق جەدەل الدىن الۋ ءىس-شاراسى اياسىندا جۇرگىزىلگەن ارنايى وپەراتسيا جونىندە جىتىقارا قالاسى جانە اۋداندىق پوليتسيا ءبولىمى باستىعىنىڭ ورىنباسارى الىبەك شاندالينوۆ ايتىپ بەردى.

- ەسىرتكى تاراتۋشىنى ۇستاۋ شاراسى 2020 جىلدىڭ قازان ايىندا باستالدى. بىزگە قالا اۋماعىندا گەروين پايدا بولدى دەگەن اقپارات كەلدى. جۇرگىزىلگەن جەدەل تەرگەۋ ءىس-ارەكەتتەرى ارقىلى ءبىز ەسىرتكى تاراتۋشىعا شىقتىق. شەكارا قىزمەتى مەن پوليتسيانىڭ ارنايى بولىمشەسىنىڭ كومەگىمەن 39 جاستاعى قالا تۇرعىنى جانارماي قۇيۋ بەكەتىنىڭ جانىندا ۇستالدى, - دەيدى الىبەك شاندالينوۆ.

كۇدىكتىنىڭ ءۇيى مەن گاراجىنا ءتىنتۋ جۇرگىزگەن پوليتسيا جالپى سالماعى 499 گرامم گەرويندى تاركىلەدى. كۇدىكتى ەسىرتكىنى ەدەننىڭ استىنا جاسىرىپ قويعان. تەرگەۋ ارەكەتتەرىن جۇرگىزۋ كەزىندە قىزمەتتىك ىزدەستىرۋ يتتەرى پايدالانىلعان.

قازىر قىلمىستىق كودەكستىڭ «اسا ءىرى مولشەردە ەسىرتكى زاتتارىن وتكىزۋ ماقساتىندا زاڭسىز دايىنداۋ, قايتا وڭدەۋ, ساتىپ الۋ جانە ساقتاۋ, تاسىمالداۋ» بابى بويىنشا سوتقا دەيىنگى تەرگەۋ باستالدى. قىلمىستىق ءىستى تەرگەۋ اياسىندا وبلىسقا ەسىرتكىنىڭ قايدان اكەلىنىپ جاتقانى انىقتالۋدا.

ايتا كەتەيىك, جىل باسىنان بەرى ايماقتا 473 كيلوگرامنان استام ءتۇرلى ەسىرتكى قۇرالدارى, ونىڭ ىشىندە 730 گرامم گەروين جانە 260 گرامم سينتەتيكالىق پسيحوتروپتىق زاتتار تاركىلەندى.

قوستاناي وبلىسى