رۋدنىيداعى كوپسالالى قالالىق اۋرۋحانا ۇجىمى 12 جاس مامانمەن تولىقتى. ەمدەۋ مەكەمەسىن كادرمەن قامتاماسىز ەتۋ ماسەلەسى بوس ورىندار جارمەڭكەسى ارقىلى شەشىلىپ وتىر.
«وبلىس اكىمدىگى بيىل رەزيدەنتۋرادا ءبىلىم العان 100 شاقتى ماماننىڭ وقۋ اقىسىن تولەپ بەردى. ونىڭ وتەۋى رەتىندە جاس ماماندار وبلىسىمىزدىڭ ەمدەۋ مەكەمەلەرىنە كەلىپ ەڭبەك ەتۋى ءتيىس. وسىلايشا, بيىل وقۋ بىتىرگەندەردىڭ ءبىر بولىگى رۋدنىيعا كەلىپ وتىر. ناتيجەسىندە, شتاتىمىز بىردەن 12 مامانمەن تولىقتى. ونىڭ ىشىندە ەكەۋىنىڭ عانا ەڭبەك ءوتىلى بار. ءبىز ءزارۋ بولىپ وتىرعان اكۋشەر-گينەكولوگ, تەراپەۆت, نەۆرولوگ, رەنتگەنولوگ سياقتى ماماندار كەلىپ قۋانىپ قالدىق», دەيدى قالالىق اۋرۋحانانىڭ باس دارىگەرى تالعات قايكەنوۆ.
باس دارىگەردىڭ ايتۋىنشا, الداعى ۋاقىتتا وبلىس اكىمىنىڭ گرانتىمەن وقىپ جاتقان كارديولوگتار دا كەنشىلەر قالاسىنا كەلىپ, جۇمىسقا ورنالاسۋى ءتيىس. ولار بەس-التى ايدىڭ ىشىندە وقۋىن اياقتايدى. رۋدنىيعا كەلگەن ءاربىر جاس دارىگەرگە بىردەن باسپانا بەرىلەدى. مۇنىڭ سىرتىندا جۇمىسقا كىرىسىمەن قولعا تيەتىن 1 ملن تەڭگە كولەمىندەگى كومەك قارجى تاعى بار.
رۋدنىي اۋرۋحاناسىنا تاياۋدا عانا جۇمىسقا تۇرعان جاس ماماننىڭ ءبىرى – ۋدز دارىگەرى گۇلبارشىن باباسوۆا. جاس تا بولسا, قاراعاندى مەديتسينالىق ۋنيۆەرسيتەتى مەن نۇر-سۇلتانداعى ۇلتتىق عىلىمي كارديوحيرۋرگيالىق ورتالىقتىڭ رەزيدەنتۋراسىن ءتامامداپ ۇلگەرگەن. رەزيدەنتۋرادا وقىعان دارىگەرلەر ءبىلىم مەن تاجىريبەنى قاتار الىپ جۇرەتىندىكتەن, وقۋدى بىتىرگەن سوڭ ەكى جىل جۇمىس ءوتىلى قوسىلادى ەكەن. گۇلبارشىن دا – ەكىجىلدىق تاجىريبەسى بار ۋدز دارىگەرى. جاس مامان تەراپەۆت, كارديولوگ, حيرۋرگ, نەۆروپوتولوگ دارىگەرلەردىڭ جولداماسىمەن كەلگەن ناۋقاستاردى زەرتتەيدى.
– ناۋقاستاردى ۋلترادىبىستى دياگنوستيكادان وتكىزىپ, سونىڭ نەگىزىندە قورىتىندى شىعارامىن. دارىگەرلەر ناۋقاستاردى مەن شىعارعان قورىتىندى مەن تالداۋ ناتيجەلەرىنە سۇيەنە وتىرىپ ەمدەيدى, – دەدى گۇلبارشىن.
جۇمىسقا جاڭا كەلگەن جاس ماماننىڭ ءبىرى ينديرا ۇسەنبەك تە – قاراعاندى مەديتسينا ۋنيۆەرسيتەتىنىڭ تۇلەگى. قاراعاندىدا وقۋىن تامامداعان سوڭ الماتىعا بارىپ, قازاقستان-رەسەي مەدۋنيۆەرسيتەتىنىڭ ينتەرناتۋراسى مەن اسفەندياروۆ اتىنداعى مەديتسينا ۋنيۆەرسيتەتىنىڭ رەزيدەنتۋراسىندا ءبىلىمىن جەتىلدىرىپ, تاجىريبە جيناقتادى. قازىر رۋدنىي اۋرۋحاناسىنىڭ نەوناتولوگ-رەانيموتولوگى شالا تۋعان سابيلەرگە دارىگەرلىك كومەك كورسەتەدى.
– باستى مىندەتىم – شالا تۋعان سابيلەرگە العاشقى دارىگەرلىك كومەك كورسەتۋ. سالماعى 500 گرامنان اسىپ تۋعان شاقالاقتارعا دارىگەرلىك كۇتىم قاجەت. مۇنداي سابيلەردى ءبىراز ۋاقىت باقىلاۋدا ۇستاپ, قاجەتتى مەديتسينالىق كومەك كورسەتەمىز, – دەدى جاس مامان.
ينديرا ينتەرناتۋرادا وقي ءجۇرىپ, وڭالتۋ ورتالىعىندا پەدياتور بولىپ جۇمىس ىستەدى. مۇندا جۇيكە جۇيەسىنىڭ دامۋى تەجەلگەن, سال بولىپ تۋعان, اۋتيزممەن اۋىراتىن بالالار ەمدەلەدى. اتا-انالاردىڭ كوبى بالالارىنىڭ ءتۋابىتتى دەرتكە ۇشىراعانىن ايتىپ, جاس دارىگەرگە مۇڭ شاعاتىن.
– وسىدان كەيىن ەگەر مەن نەوناتولوگ-رەانيموتولوگ ماماندىعىن تاڭدايتىن بولسام, كوپتەگەن ءسابيدىڭ جارىق دۇنيەگە امان-ساۋ كەلىپ, ءتورت مۇشەسى تۇگەل, دەنى ساۋ ادام بولىپ وسۋىنە, ازامات بولىپ قالىپتاسۋىنا سەپتىگىمدى تيگىزۋىم مۇمكىن دەگەن وي كەلدى. ءوز ماماندىعىمدى وسىلاي تاڭدادىم. بۇل جاعدايدا كوپ نارسە دارىگەر مەن پەريناتالدىق ورتالىقتىڭ قاجەتتى مەديتسينالىق قۇرىلعىلارمەن جەتكىلىكتى دەڭگەيدە قامتىلۋىنا بايلانىستى. ءبىزدىڭ اۋرۋحانادا وكپەگە جاساندى جولمەن اۋا جىبەرەتىن قۇرىلعى, جاڭا تۋىلعانداردى جەتىلدىرۋگە قاجەت كيۋۆەزدەر بار, قىسقاسى, انا مەن بالاعا, ولارعا كومەك كورسەتەتىن دارىگەرگە قاجەت جاعدايدىڭ ءبارى جاسالعان, – دەيدى ي.ۇسەنبەك.
قوستاناي وبلىسى,
رۋدنىي قالاسى