بۇگىن وڭىرلىك كوممۋنيكاتسيالار قىزمەتىنىڭ اقپارات الاڭىندا تاراز قالالىق پوليتسيا باسقارماسىنىڭ باستىعى اسىلحان زاۋىربەكوۆ ەلىمىزدە كارانتين تالاپتارى ەنگىزىلگەلى تارازدىق پوليتسەيلەر توتەنشە جاعداي رەجىمىن بۇزۋ بويىنشا 442 اكىمشىلىك قۇقىق بۇزۋشىلىقتى انىقتادى, دەپ حابارلايدى Egemen.kz
شاھاردىڭ باس پوليتسەيىنىڭ ايتۋىنشا, كارانتيندىك شارالاردى ساقتاۋ ماقساتىندا 12 ارنايى ءموبيلدى توپ قۇرىلعان. ولار قالاداعى شەكتەۋ شارالارىن بۇزۋ بويىنشا 83 اكىمشىلىك حاتتاما تولتىرىپ, ونىڭ 41-ىنە 9 ميلليون تەڭگەدەن استام ايىپپۇل سالعان.
جيىن بارىسىندا اسىلحان زاۋىربەكوۆ تاراز قالاسىنداعى قىلمىستىق احۋالدىڭ جايىنا دا توقتالدى. ول ءوز سوزىندە قالادا تىركەلگەن قىلمىستاردىڭ اشىلۋى 58 پايىزعا دەيىن ارتقانىن جەتكىزدى. وتكەن جىلى بۇل كورسەتكىش 51,1 پايىز بولعان. ال, اعىمداعى جىلدىڭ 10 ايىندا وبلىس ورتالىعىندا قىلمىستىق قۇقىق بۇزۋشىلىقتار مەن تەرىس قىلىقتاردىڭ تىركەلۋى 35,2 پايىزعا, ياعني 1564 دەرەككە ازايعان.
وتكەن جىلى بۇل كورسەتكىش 4437 دەرەك بولسا, بيىل 2873-كە تومەندەگەن. تارازدىڭ باس پوليتسەيى ەسەپتىك كەزەڭدە جاسوسپىرىمدەر قىلمىسى 26,0 پايىزعا تومەندەگەنىن, بىلتىر 77 دەرەك تىركەلسە, بيىل 57 دەرەك تىركەلگەنىن ايتتى. كامەلەتكە تولماعاندارعا قاتىستى جىنىستىق سيپاتتاعى كۇش قولدانۋ ارەكەتى بىلتىرعى جىلعا قاراعاندا نەبارى 4,8 پايىز تومەندەگەن. سونداي-اق, سۋيتسيد بويىنشا بىلتىر 7 دەرەك بولسا, بيىل مۇلدە جوق ەكەن.
سونىمەن قاتار, ول تاراز قالاسىندا بيىل جول-كولىك وقيعالارىنان 22 ادام قايتىس بولعانىن, دەگەنمەن وتكەن جىلمەن سالىستىرعاندا جول اپاتى 432-دەن 311-گە دەيىن تومەندەگەنىن, جارالانعانداردىڭ سانى 592-دان 439-عا دەيىن ازايعانىن مالىمدەدى.