دزيۋدودان قازاقستان ەرلەر ۇلتتىق قۇراما كومانداسىنىڭ باس باپكەرى اۋىستى, دەپ حابارلايدى Egemen.kz Olympic.kz سايتىنا سىلتەمە جاساپ.
بۇگىن قازاقستان دزيۋدو فەدەراتسياسىنىڭ كەزەكتەن تىس وتىرىسى ءوتتى. ۇلتتىق فەدەراتسيا باسشىسى قايرات قوجامجاروۆتىڭ جەتەكشىلىگىمەن وتكەن جيىنعا قازاقستان دزيۋدو فەدەراتسياسىنىڭ ۆيتسە-پرەزيدەنى, قر مادەنيەت جانە سپورت ۆيتسە-ءمينيسترى ساكەن مۇسايبەكوۆ, باس حاتشىسى اسحات جيتكەەۆ, دزيۋدودان قازاقستاننىڭ مەملەكەتتىك جاتتىقتىرۋشىسى جاندوس قونىسباەۆ پەن اتقارۋشى ديرەكتورى سامات جىلقىباەۆ قاتىستى. سونداي-اق, فەدەراتسيانىڭ ۆيتسە-پرەزيدەنتتەرى بوستان جاڭبىرباەۆ پەن ەلدوس رامازانوۆ جيىنعا ۆيدەوكونفەرەنتسيا رەجيمىندە قوسىلدى.
جيىن بارىسىندا قازاقستان ۇلتتىق ەرلەر كومانداسىنىڭ جاڭا باس باپكەرى تاعايىندالدى. اتقارۋشى كوميتەتتىڭ ءبىراۋىزدان شەشىمىمەن قازاقستان ۇلتتىق ەرلەر كومانداسىنىڭ باس باپكەرى بولىپ دزيۋدودان قازاقستاننىڭ ەڭبەك سىڭگەن جاتتىقتىرۋشى, «قۇرمەت» وردەنىنىڭ يەگەرى عالىمجان جىلگەلديەۆ سايلاندى.
ايتا كەتەرلىگى, قۇرامانىڭ بۇرىڭعى باپكەرى ايدىن سماعۇلوۆ دەنساۋلىعىنا بايلانىستى قىزمەتىن توقتاتۋ تۋرالى ءوتىنىش ءبىلدىردى. ول قازاقستان ەرلەر ۇلتتىق قۇراماسىنىڭ باس باپكەرى قىزمەتىنە 2018 جىلى كىرىسكەن بولاتىن.