قازاقستان پرەزيدەنتى – قارۋلى كۇشتەردىڭ جوعارعى باس قولباسشىسى قاسىم-جومارت توقاەۆ قورعانىس مينيسترلىگىنىڭ كەڭەيتىلگەن القا ماجىلىسىنە قاتىستى, - دەپ حابارلايدى اقوردانىڭ ءباسپاسوز قىزمەتى.
پرەزيدەنت جيىنعا دەيىن قىزمەت بارىسىندا قازا تاپقان اسكەري قىزمەتشىلەرگە ارناپ ورناتىلعان «ماڭگى ەسىمىزدە» مونۋمەنتىنە گۇل قويىپ, تاعزىم ەتتى.
وتىرىستى اشقان جوعارعى باس قولباسشى كەلەر جىلى قاستەرلى تاۋەلسىزدىگىمىزگە 30 جىل تولاتىنىن اتاپ ءوتىپ, وسى جىلدار ىشىندە بەيبىت ءومىرىمىزدىڭ قورعانى بولعان ۇلتتىق اسكەرىمىز تولىق قالىپتاسقانىن, ەلىمىزدىڭ ارمياسى ەگەمەندىگىمىز بەن تۇتاستىعىمىزدىڭ تىرەگىنە اينالعانىن ايتتى.
– مەملەكەتىمىزدىڭ قورعانىس قابىلەتىن ارتتىرۋ ءۇشىن اۋقىمدى جۇمىس اتقارىلدى. بۇل تۇڭعىش پرەزيدەنت, ەلباسى نۇرسۇلتان ءابىش ۇلى نازارباەۆتىڭ قاجىرلى ەڭبەگىنىڭ ارقاسى, – دەدى پرەزيدەنت.
قاسىم-جومارت توقاەۆ قورعانىس مينيسترلىگىنىڭ باسشىلىعىن جاھاندىق ماسشتابتا دا, جەكەلەگەن ايماقتاردا دا كۇرت وزگەرىپ جاتقان الەمدەگى احۋالدى ءجىتى باقىلاپ وتىرۋعا شاقىردى. ونىڭ سوزىنشە, قازىرگى قاۋىپسىزدىك ارحيتەكتۋراسى داعدارىسقا ۇشىراعان.
مەملەكەت باسشىسى ىشكى تولقۋلار, توڭكەرىستەر ەلدىڭ تۇتاستىعىنا ءسوزسىز اسەر ەتەدى دەپ سانايدى. وعان برەست بىتىمىنەن باستاپ قاپ تاۋىنداعى سوڭعى جاعدايلارعا دەيىنگى تاريحتىڭ جاڭا پاراقتارى كۋا.
– مۇنداي جاعدايدا مەملەكەتتىڭ ەگەمەندىگى مەن تۇتاستىعىنىڭ جالعىز كەپىلى – قارۋلى كۇشتەر. ەلىمىزدى سىرتقى قاۋىپ-قاتەردەن قورعاپ تۇرعان اسكەري قىزمەتشىلەردى مەملەكەت ءاردايىم قولدايدى. پرەزيدەنت جانە جوعارعى باس قولباسشى رەتىندە قورعانىس سالاسىنا ەرەكشە كوڭىل ءبولۋدى ءوز جۇمىسىمنىڭ باسىم باعىتى رەتىندە سانايمىن, – دەدى قاسىم-جومارت توقاەۆ.
مەملەكەت باسشىسى قورعانىس مينيسترلىگى سوڭعى جىلدارى اسكەري جوسپارلاۋ قۇجاتتارىن دايىنداۋ بويىنشا اۋقىمدى جۇمىس اتقارعانىن اتاپ ءوتتى. بۇل ارميا مەن مەملەكەتتىك ورگانداردىڭ سىرتقى قاۋىپ-قاتەرگە قارسى ماقساتتى تۇردە دايىندىق جۇرگىزۋىنە مۇمكىندىك بەرگەن.
پرەزيدەنتتىڭ پىكىرىنشە, وسىعان دەيىن قول جەتكەن جەتىستىكتەردى ساقتاۋ ءۇشىن قارۋلى كۇشتەردىڭ قىزمەتىندەگى بىرقاتار باسىمدىققا كوڭىل ءبولۋ قاجەت.
اتاپ ايتقاندا, اسكەردەگى مورالدىق-پسيحولوگيالىق احۋالدى جانە ساربازداردىڭ جاۋىنگەرلىك رۋحىن كوتەرۋ اسا ماڭىزدى.
– قورعانىس مينيسترلىگىنە مۇددەلى ورگاندارمەن بىرلەسىپ, 2021 جىلعى 1 قاراشاعا دەيىن قارۋلى كۇشتەردەگى, باسقا دا اسكەرلەر مەن اسكەري قۇرىلىمدارداعى يدەولوگيالىق جۇمىستاردىڭ تۇجىرىمداماسىن ازىرلەۋدى تاپسىرامىن, – دەدى قاسىم-جومارت توقاەۆ.
سونىمەن قاتار ول اسكەريلەردى الەۋمەتتىك-قۇقىقتىق تۇرعىدان قورعاۋ ماسەلەسىنە توقتالدى. پرەزيدەنت كەلەسى جىلدان باستاپ كۇشتىك قۇرىلىمدارعا ارنالعان ازىق-ت ۇلىككە بولىنەتىن قارجى كولەمى ارتاتىنىن, الداعى 3 جىل ىشىندە اسكەري قىزمەتشىلەرگە بەرىلەتىن قارجىلاي تولەمدى ورتاشا ەسەپپەن 30 پايىزعا كوبەيتۋ تۋرالى شەشىم قابىلدانعانىن حابارلادى.
جوعارعى باس قولباسشى ارميانىڭ اسكەري ماشىعىن ۇدايى شىڭداپ وتىرۋ كەرەك ەكەنىن ايتتى. قاسىم-جومارت توقاەۆ بيىل وتكەن اسكەري جاتتىعۋلاردا قازاقستاندىق اسكەريلەر جوعارى دايىندىعىن كورسەتىپ, بىتىمگەرلىك ميسسيالارعا قاتىسۋعا ءازىر ەكەنىن اتاپ ءوتتى. وسىعان وراي قورعانىس مينيسترلىگىنە مۇددەلى مەملەكەتتىك ورگاندارمەن بىرلەسىپ 2021 جىلدىڭ 1 تامىزىنا دەيىن قازاقستان قارۋلى كۇشتەرىنىڭ بۇۇ بىتىمگەرلىك وپەراتسيالارىنا قاتىسۋىن كەڭەيتۋ جونىندەگى جول كارتاسىن ازىرلەۋدى مىندەتتەدى.
مەملەكەت باسشىسى ءوزىنىڭ تاپسىرماسى بويىنشا بەيرۋت پورتىنداعى جارىلىستىڭ سالدارىن جويۋ كەزىندە ليۆان حالقىنا كورسەتكەن كومەكتەرى ءۇشىن قارۋلى كۇشتەردىڭ اسكەري دارىگەرلەرىنە ريزاشىلىعىن ءبىلدىردى. سونداي-اق قاسىم-جومارت توقاەۆ كوروناۆيرۋسپەن كۇرەس كەزىندە وزدەرىنە جۇكتەلگەن جاۋاپتى مىندەتتى ابىرويمەن اتقارعان بارلىق اسكەري قىزمەتشىلەرگە العىس ايتتى.
پرەزيدەنت قازاقستاندىق ارميانى ەڭ وزىق تسيفرلىق تەحنولوگيالارمەن جانە قۇرالدارمەن جابدىقتاۋدىڭ ماڭىزدى ەكەنىن ەسكەرتتى. بۇل ماسەلەنى شەشۋ ءۇشىن مەملەكەت باسشىسى قورعانىس ءمينيسترىنىڭ تسيفرلاندىرۋ جونىندەگى ورىنباسارى قىزمەتىن ەنگىزۋ تۋرالى شەشىم قابىلدادى. بۇدان بولەك قاسىم-جومارت توقاەۆ 2021 جىلدىڭ 1 قاراشاسىنا دەيىن اسكەري باعىتتاعى ءبىرتۇتاس اقپاراتتىق-كوممۋنيكاتسيالىق ينفراقۇرىلىم وپەراتورىن قۇرۋدى تاپسىردى.
مەملەكەت باسشىسى اسكەري قۇرىلىمداردى قازىرگى سىن-قاتەرلەردى ەسكەرە وتىرىپ زاماناۋي قارۋ-جاراقپەن قامتاماسىز ەتۋدىڭ بىرقاتار باسىمدىعىن اتادى. پرەزيدەنت اۋە قورعانىسىن كۇشەيتۋ, اسكەر تۇرلەرى مەن تەكتەرىنىڭ رادويوەلەكتروندى كۇرەس ەلەمەنتتەرىن دامىتۋ, اسكەردىڭ جەدەل ارەكەت ەتۋ الەۋەتىن كوتەرۋ ماقساتىندا اسكەري-ترانسپورتتىق اۆياتسيا پاركىن ارتتىرۋ باعىتتارىنا باسىمدىق بەردى.
قاسىم-جومارت توقاەۆ ارميا مەملەكەتىمىزدىڭ تىرەگى, ەگەمەندىكتىڭ كەپىلى ەكەنىن جانە ءاربىر قازاقستاندىق سارباز بەن ساردار قاستەرلى تاۋەلسىزدىگىمىزدى كۇزەتىپ تۇرعانىن ۇدايى ەسىندە ۇستاۋعا ءتيىس ەكەنىن ايتتى.
القا ماجىلىسىندە قورعانىس ءمينيسترى نۇرلان ەرمەكباەۆ پرەزيدەنتكە قارۋلى كۇشتەردى دامىتۋدىڭ قورىتىندىلارى, سونداي-اق, مينيسترلىكتىڭ ستراتەگيالىق باعىتى جونىندە ەسەپ بەردى.
سونىمەن قاتار «وڭتۇستىك» وڭىرلىك قولباسشىلىعى اسكەرىنىڭ تانك بريگاداسىنىڭ كومانديرى تابىلدى يساليەۆ پەن «وڭتۇستىك» وڭىرلىك قولباسشىلىعى اسكەرى 66597 اسكەري ءبولىمىنىڭ ۆزۆود سەرجانتى ازات شايحى بايانداما جاسادى.
جيىننان كەيىن پرەزيدەنت ەلدىڭ قارۋلى كۇشتەرىنىڭ قۇرامىنداعى راديوەلەكتروندى كۇرەس جۇرگىزۋگە ارنالعان زاماناۋي جوعارى تەحنولوگيالىق قۇرال-جابدىقتاردىڭ ۇلگىلەرىمەن تانىستى.