سەنات توراعاسىنىڭ ورىنباسارى اسقار شاكىروۆ پەن سەناتور نۇرتورە ءجۇسىپ پرەمەر-ءمينيستردىڭ اتىنا دەپۋتاتتىق ساۋال جولدادى. ولاردىڭ ايتۋىنشا, ازاماتتاردىڭ ءوز قۇقىقتارىن قورعاۋ ماسەلەلەرىن تولىق بىلمەۋى قۇقىقتىق تەتىكتەردى قولدانۋعا مۇمكىندىك بەرمەيدى. بۇل تۋرالى سەناتتىڭ ءباسپاسوز قىزمەتى حابارلادى.
«جىل سايىن بالالارعا قاتىستى قىلمىس سانى كوبەيىپ وتىر. باس پروكۋراتۋرانىڭ مالىمەتىنە سۇيەنسەك, بيىل ەلىمىزدە مۇنداي جاعداي 8 پايىزعا وسكەن. وعان كامەلەتكە تولماعاندارعا قاتىستى سەكسۋالدىق سيپاتتاعى فاكتىلەردى جاسىرعانى ءۇشىن قىلمىستىق جاۋاپكەرشىلىكتىڭ ەنگىزىلۋى دە سەبەپ بولدى. جالپى, 70 پايىزدان استام جاعدايدا كامەلەتكە تولماعاندارعا قاتىستى قىلمىستاردى جاقىن, تۋىس ادامدار جاسايتىنى الاڭداتادى», – دەيدى سەناتورلار.
سوعان سايكەس ولار ادام قۇقىقتارىنىڭ نەگىزدەرىن جالپى ءبىلىم بەرەتىن مەكتەپ باعدارلاماسىنا مىندەتتى ءپان رەتىندە ەنگىزۋدى ۇسىندى.
«قازىر جوعارى سىنىپتاردا «ادام. قوعام. قۇقىق» ءپانى وقىتىلادى. ونىڭ مازمۇنى ادام قۇقىقتارى مەن بوستاندىقتارىنىڭ ءمانى, ولاردى قورعاۋ تاسىلدەرىنە ەمەس, ادام تابيعاتى تۋرالى جالپى پايىمداۋلار توڭىرەگىندە عانا جۇرەدى. قوعامداعى احۋالدى ەسكەرىپ, اتالعان ءپاندى باستاۋىش سىنىپتاردان باستاپ وقىتقان ءجون دەپ ەسەپتەيمىز», – دەدى نۇرتورە ءجۇسىپ.
ساۋال جولداعان دەپۋتاتتاردىڭ سوزىنە سۇيەنسەك, زاڭ اياسىندا جاۋاپكەرشىلىك قاراستىرىلسا دا وڭىرلىك باق-تا زورلىق-زومبىلىققا ۇشىراعان نەمەسە كەلەڭسىز ارەكەت جاساعان بالالاردىڭ سۋرەتتەرى مەن ولار تۋرالى دەرەكتەردى جاريالاۋ ماسەلەسى كەزدەسىپ جاتادى. جەكە ومىرگە قول سۇعۋشىلىقتىڭ سالدارى اۋىر بولۋى مۇمكىن.
«كاسىبي ەتيكانى بۇزۋعا جول بەرمەۋ ءۇشىن جۋرناليستەردىڭ ەتيكالىق كودەكسىن جەتىلدىرۋ قاجەت. وعان جۇرتشىلىق وكىلدەرىن, مۇددەلى ۋاكىلەتتى ورگانداردى, سونداي-اق, پارلامەنت دەپۋتاتتارىن جۇمىلدىرعان ورىندى بولار ەدى», – دەپ اتاپ ءوتتى سەنات دەپۋتاتى.