قر پارلامەنتى ءماجىلىسى سارسەنبىدەگى پلەنارلىق وتىرىستا جاڭا ەكولوگيالىق كودەكس جوباسىن ەكىنشى وقىلىمدا ماقۇلدادى. جوبا سەناتتىڭ قاراۋىنا جىبەرىلدى.
ەكىنشى وقىلىمدا ءماجىلىس دەپۋتاتتارى رەداكتسيالىق جانە ناقتىلاۋ مانىندەگى بىرقاتار وزگەرىستەر ەنگىزگەن. سونىمەن بىرگە, ەڭ ۇزدىك قولجەتىمدى تەحنولوگيالاردى ەنگىزۋ بويىنشا ۇلتتىق انىقتامالاردى جاساۋ ەرەجەلەرىنىڭ نورمالارى كۇشەيتىلدى. ەندى مۇنداي انىقتامالار ۇلتتىق ستاندارت تۇرىندە ەمەس, ۇكىمەت دەڭگەيىندە بەكىتىلەدى.
وسىعان قوسا, ەكولوگيالىق تيىمدىلىكتى ارتتىرۋ باعدارلاماسىندا تەك ءىس-شارالار كۇنتىزبەسى ەمەس, ەميسسيالاردى كەزەڭ-كەزەڭىمەن تومەندەتۋ كۇنتىزبەسى مەن باعدارلامانىڭ ورىندالۋىن مينيسترلىك تاراپىنان جىل سايىنعى تەكسەرۋ نورمالارى بولۋى ءتيىس. دەي تۇرعانمەن, ءىس-شارالاردىڭ كەي كەزەڭدەرىن 1 جىلعا دەيىنگى مەرزىمگە كەيىنگە قالدىرۋعا مۇمكىندىك بار.
ەكولوگيالىق تيىمدىلىكتى ارتتىرۋ باعدارلاماسىنىڭ وپەراتورى ەرەجە بۇزسا جانە ونى قالپىنا كەلتىرمەسە, رۇقساتى اۆتوماتتى تۇردە توقتاتىلادى. ەكولوگيالىق تيىمدىلىكتى ارتتىرۋ باعدارلاماسىن قايتا قاراۋ پروتسەدۋراسى اشىق بولۋ ءۇشىن مىندەتتى قوعامدىق تىڭداۋ قاراستىرىلعان.
تاۋ-كەن جانە مەتاللۋرگيالىق كاسىپورىندار جۇمىسىنىڭ توقتاپ قالۋ تاۋەكەلىن بولدىرماس ءۇشىن وسىنداي كاسىپورىنداردىڭ بۇرىن سالىنىپ قويعان قالدىقتاردى ورنالاستىرۋ نىساندارىنا كودەكستىڭ كەي نورمالارىن 2036 جىلعا دەيىن قولدانىسقا ەنگىزۋگە رۇقسات بەرىلەدى. دەگەنمەن مۇنداي نىسانداردى كەڭەيتۋگە تەك قورشاعان ورتاعا اسەردى باعالاۋ, ەكولوگيالىق رۇقساتتاما جانە تۇراقتى مونيتورينگ وپەراتورىنىڭ قورشاعان ورتا كومپونەنتتەرىنە اسەردى باعالاۋ پروتسەستەرىنەن وتكەننەن كەيىن عانا مۇمكىندىك تۋادى.
ەميسسيالاردىڭ اۆتوماتتاندىرىلعان مونيتورينگ جۇيەسىن ەنگىزۋ 2023 جىلعا دەيىن كەيىنگە قالدىرىلىپ وتىر.
الدىندا قر ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ ەكولوگيالىق كودەكس جوباسىندا لاستاۋدىڭ الدىن الىپ, باقىلاۋ جۇرگىزۋگە باعىتتالعان «لاستاۋشى تولەيدى» ءپرينتسيپى بار ەكەنىن ايتقان.
«ەكولوگياعا زيان كەلگەن جاعدايدا تابيعات پايدالانۋشى قورشاعان ورتانى باستاپقى قالپىنا قالتا كەلتىرۋگە مىندەتتى», - دەگەن ول.
ەكولوگيالىق كودەكستىڭ ماڭىزدى نورمالارىنىڭ ءبىرى – ءىرى كاسىپورىنداردىڭ ەڭ وزىق قولجەتىمدى تەحنولوگيالاردى ەنگىزۋگە مىندەتتەلۋى.
سونىمەن قاتار زاڭ جوباسىندا جەرگىلىكتى اتقارۋشى ورگاندار ەكولوگيالىق تولەمدەردى 100% كولەمىندە تابيعاتتى قورعاۋ ءىس-شارالارىنا جۇمسايتىنى جازىلعان.ءماجىلىس ەكىنشى وقىلىمدا كودەكسپەن قاتار, بىرنەشە ىلەسپە زاڭداردى دا ماقۇلدادى. ىلەسپە زاڭ جوباسى حالىقتىڭ دەنساۋلىعى مەن ومىرىنە قاۋىپ توندىرەتىن ارەكەتتەردى جويۋ ءۇشىن الدىن الا ەسكەرتۋسىز تەكسەرۋگە شىعۋعا مۇمكىندىك بەرەتىن وزگەرىستەردى, قاۋىپتى قالدىقتاردى قايتا وڭدەۋ, ۋتيليزاتسيالاۋ جانە كوزىن جويۋ قىزمەتىنىڭ ليتسەنزيالاۋ ەرەجەسىن ەنگىزۋدى كوزدەيدى. قالدىقتاردى تاسىمالداۋ بويىنشا ەسكەرتۋ ءتارتىبى ەنگىزىلەدى.
ەڭ ۇزدىك قولجەتىمدى تەحنولوگيالاردى ەنگىزۋگە كەشەندى ەكولوگيالىق رۇقسات العان جاڭا نىسانداردى ەميسسيا تولەمدەرىنەن بوساتۋ نورمالارى دا قاراستىرىلعان. وسىعان ۇقساس مەحانيزم جۇمىس ىستەپ تۇرعان كاسىپورىندار ءۇشىن دە كوزدەلىپ وتىر. ولار ەميسسيا تولەمدەرىنەن بوساۋ ءۇشىن ەكولوگيالىق تيىمدىلىك باعدارلاماسىن جۇزەگە اسىرىپ, ەڭ ۇزدىك قولجەتىمدى تەحنولوگيالاردى ەنگىزۋلەرى ءتيىس.