23-27 قاراشا ارالىعىندا قر ەڭبەك جانە حالىقتى الەۋمەتتىك قورعاۋ مينيسترلىگى الەۋمەتتىك قىزمەت كورسەتۋ ساپاسىن ارتتىرۋ ماقساتىندا الەۋمەتتىك قىزمەتكەرلەردى, سونداي-اق مەديتسينالىق-الەۋمەتتىك مەكەمەلەردىڭ ديرەكتورلارىن, جۇمىسپەن قامتۋ ورتالىقتارىنىڭ ديرەكتورلارىن, ۇيدە الەۋمەتتىك كومەك كورسەتۋ بولىمشەلەرىنىڭ مەڭگەرۋشىلەرىن تەستىلەۋدەن وتكىزەدى. جالپى العاندا 12 مىڭنان استام ادامدى تەستىلەۋ جوسپارلانۋدا.
تەستىلەۋ زاڭنامالىق اكتىلەردى, حالىقتى الەۋمەتتىك قورعاۋ سالاسىنداعى ارناۋلى الەۋمەتتىك قىزمەتتەردى كورسەتۋ ستاندارتتارىن, الەۋمەتتىك قىزمەتكەرلەردىڭ ەتيكاسىنا قويىلاتىن تالاپتاردى ءبىلۋ دەڭگەيىن انىقتاۋعا باعىتتالعان.
تەستىلەۋدەن وتۋشىلەرگە نەگىزگى بلوكتا زاڭنامانى, ەتيكالىق تالاپتاردى بىلۋگە جانە پراكتيكالىق مىندەتتەردى شەشۋگە ارنالعان سۇراقتار قويىلادى.
سونداي-اق, الەۋمەتتىك قىزمەتكەردىڭ فۋنكتسيالارىن جۇزەگە اسىرۋ ءۇشىن قاجەتتى ساپالاردىڭ بولۋى مەن دەڭگەيىن انىقتاۋ ءۇشىن پسيحولوگيالىق تەست ارقىلى جەكە سيپاتتامالاردى ولشەۋ قاراستىرىلعان.
وسىعان بايلانىستى, مۇنداي تەستىلەۋ ەل اۋقىمىندا العاش رەت وتكىزىلىپ وتىرعاندىقتان, قر ەڭبەكمينى شەكتى بالل جيناي الماعان ادامدارعا قاتىستى سانكتسيالار قولدانبايدى. شەكتى بالل الا الماعاندار ءۇشىن وقىتۋ سەمينارلارى مەن قايتا تەستىلەۋ ۇيىمداستىرىلادى. جوعارى ناتيجەلەرمەن ەرەكشەلەنەتىندەردى كەيىننەن لاۋازىمىن جوعارىلاتۋ, رەسپۋبليكالىق جانە وبلىستىق ماڭىزى بار جوبالارعا قاتىسۋ ءۇشىن ساراپشىلار رەتىندە تارتۋ ءۇشىن كادر رەزەرۆىنە قوسۋ جوسپارلانۋدا. سونداي-اق ولاردىڭ كانديداتۋرالارى قر ەڭبەكمينى جانىنداعى الەۋمەتتىك جۇمىس جونىندەگى ساراپتامالىق كەڭەسكە جانە وزگە دە جاۋاپتى قوعامدىق قىزمەتتەرگە ەنگىزۋ ءۇشىن ۇسىنىلاتىن بولادى.
سونىمەن قاتار, تەستىلەۋ قورىتىندىسى بويىنشا جوعارى ناتيجەلەرگە قول جەتكىزگەن ادامدار ءۇشىن الەۋمەتتىك جۇمىستىڭ وزىق تەحنولوگيالارى بويىنشا ارنايى سەمينارلار ۇيىمداستىرۋ جوسپارلانۋدا.
بۇل جوبانى قر ەڭبەك جانە حالىقتى الەۋمەتتىك قورعاۋ مينيسترلىگى قر تۇڭعىش پرەزيدەنتى – ەلباسى قورىنىڭ جانە Unicef Kazakhstan قولداۋىمەن ىسكە اسىرۋدا.