قوستانايدا وبلىستىق ءىح ازاماتتىق فورۋم وتىرىسى ءوتتى. جيىنعا وبلىس اكىمىنىڭ ورىنباسارى باقىت ەسىموۆا, وبلىستىق باسقارما باسشىلارى, قوعامدىق بىرلەستىك وكىلدەرى مەن قالا, اۋدان اكىمدەرى قاتىستى.
جيىندى ۇيىمداستىرۋشى «قوستاناي وبلىسىنىڭ ازاماتتىق اليانسى» قوعامدىق قورىنىڭ ءتورايىمى دينارا وتەباەۆانىڭ ايتۋىنشا, جىل باسىنان بەرى ايماقتا ۇكىمەتتىك ەمەس ۇيىمداردىڭ مۇرىندىق بولۋىمەن وتىزدان استام قايىرىمدىلىق اكتسياسى, ەلۋدىڭ ۇستىندە ونلاين پىكىرتالقى شارالارى ءوتىپ, قوعامدىق بىرلەستىكتەر مەن ءتۇرلى مەكەمەلەردىڭ جانە بيزنەس قاۋىمداستىعىنىڭ ءوزارا بايلانىسى نىعايا تۇسكەن. بۇل ءوز كەزەگىندە «حالىق ۇنىنە قۇلاق اساتىن مەملەكەت» قاعيداتتارىن ءتيىمدى ەنگىزۋگە جانە مەملەكەت پەن بيزنەستىڭ جانە ۇكىمەتتىك ەمەس ۇيىمداردىڭ ءوزارا ءتيىمدى ارىپتەستىگىنىڭ ءىلىپ الار ۇلگىسى بولىپ وتىر.
مەملەكەتتىك ورگاندار مەن ۇكىمەتتىك ەمەس ۇيىمداردىڭ بىرلەسىپ جۇمىلا اتقارعان جۇمىستارى ناتيجەسىز ەمەس. ماسەلەن, بۇگىندە ازاماتتىق قوعام ينستيتۋتتارىمەن بىرلەسە وتىرىپ جۇمىس جۇرگىزۋدىڭ تۇرلەرى مەن پلاتفورمالارى قالىپتاستى, ۇەۇ-نى مەملەكەتتىك قولداۋدىڭ تەتىكتەرى كوبەيدى. قوعامدىق بىرلەستىكتەرگە مەملەكەتتەن كەلىپ تۇسەتىن الەۋمەتتىك تاپسىرىستار, گرانتتار مەن سىياقىلاردىڭ كولەمى ۇلعايدى. مەملەكەتتىك ورگانداردىڭ جانىنان قوعامدىق كەڭەستەر اشىلىپ, «اشىق ۇكىمەت» قالىپتاستىرۋدىڭ قۇقىقتىق نەگىزى قالاندى.
فورۋم جۇمىسى بارىسىندا قوستاناي وبلىسى كاسىپوداق ورتالىعىنىڭ ءتورايىمى ەكاتەرينا سمىشلياەۆا, وبلىستىق ءماسليحاتتىڭ دەپۋتاتى گۇلميرا قاپەنوۆا, قازاقستان پرەزيدەنتى جانىنداعى مەملەكەتتىك باسقارۋ اكادەمياسىنىڭ دوتسەنتى تاتيانا زۋەۆا, «ەل ەرتەڭى» جاستار قوعامدىق بىرلەستىگىنىڭ توراعاسى بولات قاليەۆ سياقتى شەشەندەر ازاماتتىق سەكتوردى قولداۋ مەن دامىتۋدىڭ وزەكتى ماسەلەلەرى تۋرالى ءوز ويلارىن ورتاعا سالدى.
سونىمەن قاتار وبلىستىق فورۋمدا ۇەۇ وكىلدەرى مەن سالالىق باسقارمالاردىڭ قىزمەتكەرلەرى كەزدەسىپ, ايماقتا مەملەكەتتىك تاپسىرىستى جۇزەگە اسىرۋ بارىسىندا كولدەنەڭ شىعاتىن كەيبىر ماسەلەلەردى تالقىلادى.
– قازاقستان رەسپۋبليكاسىندا قازىرگى كەزدە قوعامدىق باقىلاۋ ينستيتۋتىن بەلسەندى جۇزەگە اسىرۋىن قامتاماسىز ەتەتىن ءتيىمدى ينستيتۋتسيونالدىق-قۇقىقتىق نەگىز تولىق قالىپتاسىپ بولدى. بۇل ورايدا, ەلباسىنىڭ «100 ناقتى قادام – ۇلتتىق جوسپارى», اتاپ ايتقاندا, ترانسپارەنتتى جانە ەسەپ بەرەتىن مەملەكەت قالىپتاستىرۋعا باعىتتالعان بەسىنشى رەفورما شەشۋشى ءرول اتقارادى. مەملەكەتتىك باسقارۋ ورگاندارىنىڭ جۇمىسىن باعالاۋدىڭ بۇرىن-سوڭدى بولماعان جاڭا جۇيەسى ەنگىزىلدى. بۇل جۇيە سىرتقى تاۋەلسىز اۋديت مىندەتتەمەلەرىنىڭ قاعيداتتارىنا, كوپشىلىككە اشىق, قوعاممەن تىعىز بايلانىستا بولۋعا, باسشىلاردىڭ جەكە باسىنىڭ جاۋاپكەرشىلىگىنە نەگىزدەلەدى, – دەدى گۇلميرا قاپەنوۆا.
ەلىمىزدە بىرنەشە ينستيتۋتسيونالدىق قۇرىلىمداردىڭ تابىستى جۇمىس ىستەپ كەلە جاتقانىن تىلگە تيەك ەتكەن گۇلميرا قاپەنوۆا بۇگىندە كوپتەگەن ماڭىزدى شەشىمدەردىڭ قابىلدانۋىنا حالىقتىڭ تىكەلەي قاتىسۋىن قامتاماسىز ەتىپ, ازاماتتاردىڭ قۇقىقتارىن قورعاۋعا بەلسەندى اتسالىسىپ وتىرعان قوعامدىق كەڭەستەردىڭ, ومبۋدسمەندەردىڭ, اقىلداستار كەڭەسى مەن كوميسسيالاردىڭ, سونداي-اق ۆەدومستۆوارالىق مونيتورينگتىك توپتاردىڭ ازاماتتىق قوعام قالىپتاستىرۋعا ايتارلىقتاي ۇلەس قوسىپ وتىرعانىنا توقتالدى.
وتىرىسقا قاتىسۋشىلاردىڭ پىكىرىنشە, ايماقتا قوعامدىق بىرلەستىكتەردىڭ بەلسەندىلىگى جىل ساناپ ءوسىپ كەلە جاتقانىمەن, قوعامدىق باقىلاۋ تەتىكتەرى مەملەكەتتىك ينستيتۋتتار مەن جەرگىلىكتى اتقارۋشى ورگاندار قىزمەتىنىڭ تيىمدىلىگىن ارتتىرۋعا ءالى دە بولسا جەتكىلىكتى مولشەردە ىقپال ەتە الماي وتىر. ەلىمىزدە قالىپتاسقان قوعامدىق باقىلاۋ ىقپالىنىڭ دەڭگەيى مەن سيپاتى ۋاقىت پەن حالىقارالىق تاجىريبە قولدانىسىنداعى ستاندارتتاردىڭ تالابىنا سايكەس كەلە بەرمەيدى. بۇل بەلگىلى ءبىر دەڭگەيدە قوعامدىق باقىلاۋ سۋبەكتىلەرى قىزمەتىنىڭ ءبۇتىن ءبىر جۇيە رەتىندە قالىپتاسا قويماعاندىعىمەن بايلانىستى. جۇيەلى ءارى ىقپالدى قوعامدىق باقىلاۋ قالىپتاسۋ ءۇشىن مۇنداي قۇرىلىمعا نەگىز بولاتىن ارنايى زاڭ قابىلدانىپ, ونىڭ قىزمەتى مەن مىندەتىنە, ماقسات-مۇددەسىنە زاڭنامالىق تۇرعىدا ناقتى اينىقتاما بەرىلىپ, رەتتەلۋى ءتيىس.
– بۇگىنگى فورۋمداعى ەڭ نەگىزگى ءارى باستى ماسەلەنىڭ ءبىرى ۆولونتەرلىق تاقىرىبى دەپ بىلەمىن. «ۆولونتەر جىلى» اياقتالىپ كەلەدى, الايدا فورۋم بارىسىندا ۆولونتەرلەردىڭ الدىندا ءالى دە قىرۋار ءىس كۇتىپ تۇرعانى ايتىلدى. بۇگىن ۇكىمەتتىك ەمەس ۇيىمدارمەن تاجىريبە الماسا وتىرىپ, ازاماتتاردىڭ قوعامدىق بەلسەندىلىگىن ارتتىرۋ جولدارى, جۇمىستى ۇيىمداستىرۋ, ناقتى ءبىر ماسەلە بويىنشا بەلگىلى ءبىر ناتيجەگە قالاي قول جەتكىزۋگە بولاتىنى تۋرالى پايدالى اقپارات الدىق, – دەدى «ەل ەرتەڭى» جاستار قوعامدىق بىرلەستىگىنىڭ توراعاسى بولات قاليەۆ.
قوستاناي وبلىسى