جەل ءۇپ ەتپەسە, ءشوپتىڭ باسى قيمىلداي ما؟ كىم ءبىلسىن, ايتەۋىر سوڭعى ۋاقىتتا شىعىستاعى قۇقىق قورعاۋ قىزمەتكەرلەرىنە قاتىستى شاعىم شاش ەتەكتەن. جەرگىلىكتى بيلىككە دەگەن سەنىمنىڭ جوقتىعى ما, شاعىمدانۋشىلاردىڭ كوبى پرەزيدەنت قاسىم-جومارت توقاەۆتان قولداۋ سۇرايدى.
ەستىگەن قۇلاقتىڭ جازىعى جوق عوي, بىلايعى جۇرت «بالەنباي جەرگە جۇمىسقا ورنالاسۋ ءۇشىن بالەنباي مىڭ, ميلليون تەڭگە ستاۆكا بار» دەسىپ قالىپ جاتادى. ناقتى دالەل, اشىق ايتىلعان پىكىر بولماعان سوڭ ول تاقىرىپ جونىندە اۋىز اشا بەرمەيتىنىمىز شىندىق. بىراق وسى جولى «zhalobi.kz» سايتىنا جاريالاعان سەمەي قالالىق پوليتسيا ءبولىمى باسشىلىعىنىڭ زاڭسىز ارەكەتتەرى جونىندەگى جازباعا كوز جۇما قاراي المادىق. شاعىم اتالمىش سايتقا 16 قازاندا, ورىس تىلىندە جازىلىپتى. قازاقستان رەسپۋبليكاسىنىڭ پرەزيدەنتى ق.توقاەۆتىڭ, سىبايلاس جەمقورلىققا قارسى قىزمەتتىڭ باسشىسى اشپەكباەۆتىڭ, ۇقك توراعاسى ك.ءماسىموۆتىڭ اتىنا جازىلعان شاعىمدى وقىپ شىعىپ, قازاقشالادىق.
«شىعىس قازاقستان وبلىسى سەمەي قالاسى پوليتسيا ءبولىمىنىڭ باستىعى, پوليتسيا پولكوۆنيگى ماقسات امانتاي ۇلى زەكەنوۆكە جانە ونىڭ «قورعاۋشىسى» شىعىس قازاقستان وبلىستىق پوليتسيا دەپارتامەنتىنىڭ كريمينالدىق پوليتسيا باسقارماسىنىڭ باستىعى ت.ك.يساەۆقا قاتىستى شارالار قابىلداۋدى سۇرايمىز. ولار قىزمەتكە تاعايىندالعان العاشقى كۇننەن-اق سەمەي قالاسىنىڭ جەكە قۇرامىن بوپسالاۋمەن اينالىسا باستادى. زەكەنوۆ قالالىق پوليتسيا بولىمدەرىنىڭ بارلىق باسشىلارىنان اي سايىن 10 000 دوللاردان, ال بارلىق قىزمەت جەتەكشىلەرىنەن 3000 دوللاردان 7000 دوللارعا دەيىن اقشا جيناۋ كەرەكتىگىن بەلگىلەپ قويعان. وسىلايشا, زەكەنوۆ يساەۆپەن بىرگە پوليتسيا قىزمەتكەرلەرىن جۇمىس ىستەتۋدەن بۇرىن مەتالل قابىلداعىشتاردان, سپيرت جابۋشىلاردان, التىنمەن اينالىسۋشىلاردان, ساۋنالاردان اي سايىن اقشا جيناۋمەن اينالىسۋعا ماجبۇرلەيدى. كورسەتىلگەن ەسەپ-قيساپ قۇر سان عانا, ەشكىم قىلمىس اشۋمەن اينالىسپايدى, كەز كەلگەن ءىس جالعان, ساپاسىز.
زەكەنوۆ پوليتسيا ءبولىمىنىڭ باستىعى لاۋازىمىنا تاعايىندالعانى ءۇشىن وزىنە «قورعان» بولىپ جۇرگەن ازاماتقا 80 000 دوللار بەرگەنى بەلگىلى. ول ءوز ۇلەسىن قالدىرىپ, قالعان 50 000 دوللاردى دەپارتامەنت باستىعى ساعات كەنتاي ۇلى ماديەۆكە بەرگەن. ويتكەنى يساەۆ پەن ماديەۆ وتە جاقىن ەدى. بۇل جاعدايدى سەمەي قالالىق پوليتسيا ءبولىمىنىڭ بارلىق جەكە قۇرامى بىلەدى. وبلىستاعى بارلىق تاعايىنداۋلار ت.يساەۆ ارقىلى وتەدى. ول لاۋازىمدى قىزمەتكەرلەرگە اي سايىن ستاۆكا مولشەرىن قويىپ, بەلگىلەنىپ كەتكەندەردى قامقورلىعىنا الادى.
سەمەي قالاسىنىڭ پوليتسيا بولىمىنەن قۇپيا ماتەريالدار جانە قۇپيالانعان قىلمىستىق ىستەر جوعالىپ, وعان ۇلتتىق قاۋىپسىزدىك كوميتەتى قىلمىستىق ءىس قوزعاپ, ارتىنشا توقتاتىپ تاستاعان. سويتسەك, يساەۆ 5-ءشى باسقارما باستىعىنا شىعىپ, سەمەيدەن جينالعان اقشامەن ماسەلەنى شەشكەن.
يساەۆ پەن زەكەنوۆ ءبىر-بىرىمەن قۇرداس, ءارى جەرلەس. سول سەبەپتى يساەۆ ونى دەپارتامەنت باسشىلىعىنىڭ الدىندا قورعاشتايدى. ال جاۋاپقا تارتىلمايتىنىن سەزگەن زەكەنوۆ قىلمىسپەن كۇرەستەن گورى جەكە قۇرامنان اقشا جيناپ, وزىنە قىمبات كولىكتەر ساتىپ الۋمەن اينالىسادى. مىسالى, باسشىلىق قىزمەتكە تاعايىندالعان سوڭ اۆتوسالوننان وزىنە «Toyota Hillux», ايەلىنە «Toyota Camry» كولىگىن ساتىپ العان. سونىمەن قاتار قىزمەتكەرلەردەن جينالعان اقشاعا اڭشىلىققا ارنايى جابدىقتالعان «Toyota Prado» كولىگىن تاپسىرىسپەن قۇراستىرتقان. ودان بولەك, الماتىداعى اۆتوسالوننان 2020 جىلى شىعارىلعان «Lexus 570» كولىگىن ساتىپ العان. الايدا تامىز ايىنىڭ سوڭىنا قاراي جوسپارلاعان كەزەكتى ەڭبەك دەمالىسى بولماي قالىپ, سۋ جاڭا كولىگىن جەتكىزە الماعان.
مىنە, وسىنداي جەمقورلاردىڭ كەسىرىنەن ەلىمىز دامىماي وتىر. ءبىر وتباسىعا 10 كولىك, ءۇش كوتتەدج جانە نۇر-سۇلتاننان 5 پاتەر نە ءۇشىن قاجەت؟ ايىنا 350 000 تەڭگە جالاقى الاتىن قاراپايىم پوليتسيا پولكوۆنيگىنە وسىنشاما اقشا قايدان كەلەدى؟ سىزدەردەن وسى باسشىنى جانە ونىڭ قورعانى يساەۆ تالانتتى جۇمىستان بوساتۋلارىڭىزدى سۇرايمىز» دەلىنگەن ەكەن شاعىمدا.
سوڭىنا قاراي شاعىم اۆتورى «Sl.Ashat» دەپ كورسەتىلگەن. دەمەك, حات ءانونيمدى. ال ماسەلەنىڭ اق-قاراسى وبلىس دەڭگەيىندە تەكسەرىلەتىن كورىنەدى.
وبلىستىق پوليتسيا دەپارتامەنتى ءباسپاسوز قىزمەتىنىڭ حابارلاۋىنشا, ءانونيمدى وتىنىشتە كورسەتىلگەن دالەلدەردى قىزمەتتىك تەرگەۋ اياسىندا شىعىس قازاقستان وبلىستىق پوليتسيا دەپارتامەنتىنىڭ وزىندىك قاۋىپسىزدىك باسقارماسى تەكسەرەتىن بولادى. ەڭ باستىسى, بارماق باستى كوز قىستىلىققا جول بەرىلىپ قويماي, ءادىل تەكسەرۋ بولسا بولعانى. ايتپەسە قۇقىق قورعاۋشىلاردىڭ قۇقىعىن كىم قورعايدى؟
شىعىس قازاقستان وبلىسى