وسكەمەن قالاسىندا جاڭا ينفەكتسيالىق گوسپيتال اشىلماق, دەپ حابارلايدى Egemen.kz
شقو وڭىرلىك كوممۋنيكاتسيالار قىزمەتىندە وتكەن ءباسپاسوز كونفەرەنتسياسى بارىسىندا وبلىستىق دەنساۋلىق ساقتاۋ باسقارماسىنىڭ وكىلى اسقار حوروشاش COVID-19 ينفەكتسياسىنىڭ تارالۋ قاۋپىن ازايتۋ جانە قاۋىپتى دەرتتى جۇقتىرعاندارمەن بايلانىستا بولعانداردى ۋاقتىلى ىزدەۋ, سونداي-اق ولاردى وقشاۋلاۋ ءۇشىن مەديتسينالىق-ەپيدەميالىق بريگادالار قۇرىلعانىن ايتتى.
"بۇگىندە ءوڭىر بويىنششا 40 ينفەكتسيالىق ستاتسيونار دايىندالعان. تولىقتاي جابدىقتالعان 6 مىڭنان استام توسەك-ورىن ۇيىمداستىرىلدى, ونىڭ 399-ءى رەانيماتسيالىق. ينفەكتسيالىق ستاتسيونارلارعا بارلىعى 696 پاتسيەنت جاتقىزىلدى, ولاردىڭ 76-سى اۋىر, قالعاندارى ورتاشا اۋىر حالدە. كارانتين ستاتسيونارلارىندا 19 ادام جاتىر", دەدى ول.
وسكەمەندە ءۇشىنشى دەڭگەيدەگى ينفەكتسيالىق توسەك-ورىن سانىن ارتتىرۋ ءۇشىن وسى اپتادا 150 توسەكتىك جاڭا ينفەكتسيالىق گوسپيتال اشۋ جوسپارلانىپ وتىر. بۇل عيماراتقا جاقىندا كۇردەلى جوندەۋ جۇرگىزىلگەن.
"ناۋقاستاردى ورنالاستىرۋ ءۇشىن ستاتسيونارلار جوندەۋدەن ءوتتى. بۇدان بولەك, وسكەمەندەگى وبلىستىق مامانداندىرىلعان مەديتسينالىق ورتالىقتا جانە №4 قالالىق اۋرۋحانادا, سەمەيدەگى جۇقپالى اۋرۋلار اۋرۋحاناسىندا, جارما, كاتونقاراعاي, ۇلان, گلۋبوكوە, كۇرشىم جانە تارباعاتاي اۋداندارىنىڭ اۋرۋحانالارىندا جوندەۋ جۇمىستارى جۇرگىزىلدى", دەيدى اسقار حوروشاش.