ساتباەۆ قالاسىنىڭ اكىمدىگىنىڭ مالىمەتى بويىنشا, يتتەر تالاپ قايتىس بولعان 6 جاسار قىزدىڭ وتباسى قامقورشى جانە پوليتسيا ورگاندارىنىڭ ەسەبىندە تۇرعان, دەپ حابارلايدى Egemen.kz
وتباسىندا 6 جاسار قىزدان بولەك ەكى بالا بار. بۇگىندە ولار "قامقور" الەۋمەتتىك وڭالتۋ ورتالىعىنا ۋاقىتشا ورنالاستىرىلدى.
"1993 جىلعى ايەل بىرگە تۇراتىن ادامىمەن جانە ءۇش بالامەن قالا شەتىندەگى ساياجايدا تۇرىپ كەلگەن. قولايسىز وتباسى رەتىندە پوليتسيا ەسەبىندە بولعان. بۇل وتباسى ءبىلىم ءبولىمىنىڭ قورعانشىلىق جانە قامقورشىلىق ءبولىمىنىڭ باقىلاۋىندا. بۇگىندە ەكى بالا "قامقور" الەۋمەتتىك وڭالتۋ ورتالىعىنا ۋاقىتشا ورنالاستىرىلدى. قايعىلى وقيعا بولعان كۇنى بالا اجەسىنىڭ قاراۋىندا بولعان", - دەيدى اكىمدىك وكىلدەرى.
اجەسىمەن بىرگە جۇرگەن قىز كوشەگە جالعىز قىدىرىپ كەتكەن. جەرگىلىكتى اتقارۋشى ورگانداردىڭ مالىمەتىنشە, وقيعا سول ساتتە بولعان.قايعىلى وقيعا بولعاننان كەيىن اكىم ورىنباسارى ءداۋىر جۇنىسبەكوۆ مارقۇمنىڭ وتباسىنا بارىپ قايتقان. قالاداعى ۆەتەرينارلىق ستانتسيا قاڭعىباس جانۋارلاردى اۋلاۋ مەن اتۋدى جۇيەلى تۇردە جۇرگىزىپ جاتقانىن حابارلادى.
ەسكە سالايىق, بۇگىن قاڭعىباس يتتەر 6 جاسار قىزدى تالاپ تاستاعانى جونىندە حابار تارادى. اتا-اناسى قىزدىڭ داۋىسىن ەستىپ كوشەگە شىققان. جەدەل جاردەم قىزمەتكەرلەرى تەز جەتكەنىمەن, كىشكەنتاي قىز قايتىس بولعان.