ايماقتاردى دامىتۋ باعدارلاماسىنا وراي, قوستاناي ءوڭىرىن گازداندىرۋ جۇمىستارى قارقىندى جۇرگىزىلۋدە. ورتالىقتان الىستا ورنالاسقان قامىستى اۋىلىنا دا كوگىلدىر وتىن جەتەتىن بولدى.
بىلتىر بۇل اۋداندى گازبەن قامتاماسىز ەتۋدىڭ ەكىنشى ساتىسى شەڭبەرىندە 270 ملن تەڭگە يگەرىلسە, بيىل اتالعان قاراجات كولەمى 800 ملن تەڭگەگە جەتتى. كەلەر جىلعا تاعى 750 ملن تەڭگە قاراستىرىلعان. بۇل قاراجاتقا قامىستى-التىنسارين جوعارى قىسىمدى گاز قۇبىرى تارتىلماق. قۇبىردىڭ جالپى ۇزىندىعى – 60 شاقىرىم. جوبا تولىق جۇزەگە اسقاندا 3000-عا جۋىق حالىق كومىر مەن قي جاعۋدىڭ الەگىنەن قۇتىلادى.
– كوگىلدىر وتىن قۇبىرىنا جاقىن ماڭداعى بەستوبە جانە اداەۆ اۋىلدارى قوسىلادى. بۇل جوبا ءبىزدىڭ اۋدان حالقى ءۇشىن وتە ماڭىزدى, – دەيدى اۋدان اكىمى عازيز بەكمۇحامبەتوۆ.
الداعى ۋاقىتتا اۋداندا ىسكە اسىرىلاتىن تىڭ جوبالار مەن جۇمىستار كوپ. باستى مىندەت – ەكونوميكانىڭ السىرەۋىنە جول بەرمەۋ. ەكسپورتتىق الەۋەتتى ارتتىرۋ ءۇشىن قۇراما جەم دايىندايتىن تسەح سالىنباق. اۋدان ەكونوميكاسىنداعى وڭ وزگەرىستەر ءبىرىنشى كەزەكتە جەرگىلىكتى تۇرعىنداردىڭ تۇرمىس ساپاسىن جاقسارتۋعا اسەر ەتۋدە.