جاتاقحانا جايى از ايتىلىپ جۇرگەن جوق. جاتاقحانانىڭ جەتىسپەۋى مەن ىشكى جاعدايلارى تالاي ماقالاعا وزەك بولعانى راس. الايدا جاتاقحانانىڭ باسشىلارى مەن ەسەپشىلەرىنە عانا بەلگىلى, سىرت كوز بايقاي بەرمەيتىن نارسەلەر دە بار ەكەن...
2014 جىلى ماڭعىستاۋ وبلىسى اكىمدىگىنىڭ قولداۋىمەن «جاڭا سەرپىن» باعدارلاماسى جاساقتالىپ, جاستاردىڭ تۇرمىس-تىرلىگىنە قولداۋ كورسەتۋدى مىندەتىنە الدى. ماڭعىستاۋ وڭىرىندە عانا ارەكەت ەتكەن باعدارلاما وڭىردەگى جۇمىسسىز ازاماتتاردى كاسىپتىك وقىتۋ, قايتا دايارلاۋ, بىلىكتىلىگىن ارتتىرۋ جۇمىستارىن ۇيىمداستىرىپ, جۇمىسقا ورنالاسۋىنا ىقپال ەتۋدى ماقسات ەتتى. باعدارلاما بويىنشا ءبىلىم الىپ, جۇمىسقا ورنالاسقان ادامداردى ارنايى جاتاقحانامەن قامتاماسىز ەتۋ ماسەلەسى دە نازاردان تىس قالماي, «جاڭا سەرپىن» قۇرىلعان كەزدە 160 ورىندىق جاتاقحانامەن باستادى. كەيىن ولاردىڭ سانى ارتىپ, 500 ورىندىق كەلەسى جاتاقحانا وسى باعدارلاما ارقىلى وقىپ, جۇمىسپەن قامتىلعان نەمەسە وندىرىستىك تاجىريبەگە جولدانعان ازاماتتارعا بەرىلدى. تاعى 145 ورىندىق جاتاقحانانىڭ 125 ورىنى بويداقتارعا, 20 ورىنى وتباسىلى جاندارعا بولىنگەن بولاتىن. جالپى, وڭىرلىك باعدارلاما قاتىسۋشىلارى جاتاقحانا جاعىنان تاپشىلىق كوردى دەپ ايتا المايمىز.
بىراق جاتاقحاناداعى كوپشىلىك بىلە بەرمەيتىن «كولەڭكەلى» تۇس انىقتالدى. قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگىنىڭ ماڭعىستاۋ وبلىسى بويىنشا دەپارتامەنتىنىڭ قپك-ءنىڭ 200-بابىنىڭ تارتىبىمەن ەنگىزىلگەن ۇسىنىسى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى وتكىزگەن ونلاين جيىندا قارالعان بولاتىن. ونلاين ماجىلىستە وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ «جاڭا سەرپىن» ورتالىعى» كمم-ءنىڭ جاتاقحانا بولمەسىنەن ورىن بەرۋ, جالداۋ جانە تۇرۋ كەزىندە ءتيىستى ەمەس تۇلعالارعا بەرىلگەنى تۋرالى زاڭبۇزۋشىلىق قارالدى. وندا تەرگەپ-تەكسەرۋ بارىسىندا ناقتى كەمشىلىكتەر انىقتالدى. جاتاقحانادا تۇرۋ ءۇشىن «جاڭا سەرپىن» باعدارلاماسىنا جاتپايتىن تۇلعالارعا ورىن بەرىلگەن, سونداي-اق وسى تۇلعالار جاتاقحانادا اقىسىز تۇرىپ, مەملەكەتكە 5 594 330 تەڭگە زيان كەلتىرگەن.
«جاڭا سەرپىن» كمم مەن جاتاقحانا تۇرعىندارىنىڭ اراسىندا بولمەنى جالعا بەرۋ بويىنشا شارتتار بار ەكەن. شارت بويىنشا تۇرعىندارعا بەكىتىلگەن تاريفكە سايكەس اي سايىن تولەماقى تولەۋ مىندەتتەلگەنمەن, بۇل تەك قاعاز جۇزىندە قالىپ, ءىس جۇزىندە كەلىسىمشارت مىندەتتەرى ورىندالماعان. ال تولەم شارتتارىنا سايكەس باسقارما نەمەسە «جاڭا سەرپىن» كمم تاراپىنان تۇرعىندارعا ەشقانداي شارا قولدانىلماعان.
تەرگەپ-تەكسەرۋ بارىسىندا انىقتالعان كەمشىلىكتەر ەسكەرىلە وتىرىپ, ماڭعىستاۋ وبلىستىق سىبايلاس جەمقورلىققا قارسى قىزمەت دەپارتامەنتى تاراپىنان الداعى ۋاقىتتا زاڭ بۇزۋشىلىقتارعا جول بەرمەۋ ءۇشىن وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنا ۇسىنىس بەرىلدى. سونداي-اق دەپارتامەنت تاراپىنان وسى باسقارما مەن وعان قاراستى مەكەمە قىزمەتكەرلەرىنىڭ سىبايلاس جەمقورلىققا قارسى كۇرەس زاڭناماسىنىڭ تالاپتارىن بۇلجىتپاي ورىنداۋىنا الداعى ۋاقىتتا دا كوڭىل بولىنەتىنى ايتىلدى.
سونىمەن, بۇعان دەيىن كەلىسىمشارتتى كادەگە جارىتپاي كەلگەن جاتاقحانا باسشىلىعى ەندى تالاپ شەڭبەرىندە ءجۇرىپ, جاتاقحانا بولمەلەرىن تۇرعىندارعا زاڭعا ساي جالعا بەرەتىن بولادى.
ماڭعىستاۋ وبلىسى