بەيىمبەت مايلين اۋدانىندا اۋىل تۇرعىنىن الداپ, اقشاسىن الىپ كەتكەن الاياقتاردىڭ ارەكەتى بەينەكامەرانىڭ كومەگىمەن اشكەرە بولدى. اۋداندىق پوليتسيا ءبولىمىنىڭ قىزمەتكەرلەرى قارجىلىق الاياقتىق قىلمىستى ءىزىن سۋىتپاي اشىپ وتىر.
تەرگەۋ ءبولىمىنىڭ قىزمەتكەرى الىشەر بايقانوۆتىڭ ايتۋىنشا, پوليتسيا بولىمىنە 3-قاراشا كۇنى شاعىم تۇسىرگەن نيكولاەۆ اۋىلىنىڭ تۇرعىنى ەكى بەلگىسىز ايەلدى جاۋاپقا تارتۋدى وتىنەدى. بەيتانىس ايەلدەر ءتۇرلى تاۋارلار ساتىپ الۋدى ۇسىنىپ, ەر ادامنىڭ ۇيىنە كىرگەن. اڭگىمە بارىسىندا الاياقتار جابىرلەنۋشىدەن ءبۇتىن 10 مىڭ تەڭگەنى ۇساق اقشاعا ايىرباستاپ بەرۋىن سۇراپ, قولدارىنا اقشا تيگەن سوڭ تايىپ تۇرعان. ەر ادام ءبىراز ۋاقىتتان كەيىن عانا قولىنداعىنىڭ جالعان اقشا ەكەنىن بىلەدى.
ابىروي بولعاندا, قاسكۇنەمدەردىڭ جەكە باسىن انىقتاۋعا جابىرلەنۋشىنىڭ قىراعى كورشىلەرىنىڭ كومەگى تيگەن. ولار وقيعا بولعان ۋاقىت شاماسىندا جابىرلەنۋشىنىڭ ەسىك الدىندا رەسەيلىك ءنومىرلى كولىكتى كورگەندەرىن ايتادى. وسىعان ۇقساس اۆتوكولىك بۇعان دەيىن پاترۋلدىك پوليتسيا قىزمەتكەرلەرىنە دە كەزىككەن. ولار سول كۇنى شەتەل كولىگىن قۇجات تەكسەرۋ ماقساتىندا توقتاتقان. ەلدى مەكەندەردە ورنالاسقان بەينەباقىلاۋ كامەرالارى ارقىلى پوليتسەيلەر بۇل كولىكتىڭ الدىمەن اۋدان ورتالىعىنا, سودان كەيىن توبىل كەنتىنە بارعانىن انىقتادى.
وسىلايشا, قىسقا مەرزىمدە سۇر ءتۇستى ءاۆتوموبيلدىڭ قوزعالىسى مەن تۇرعان جەرى تولىق انىقتالادى. كولىك ىشىندە وتىرعاندار جابىرلەنۋشى سيپاتتاعان ايەلدەر بولىپ شىقتى.
- قىلمىستىق ءىس قر قك-ءنىڭ 190-بابىنىڭ 2-ءبولىمى بويىنشا تىركەلدى. قازىر سوتقا دەيىنگى تەرگەۋ اياقتالىپ, ماتەريالدار سوت قاراۋىنا جىبەرىلدى, - دەدى تەرگەۋشى الىشەر بايقانوۆ.
قوستاناي وبلىسى