استانادا سپورت جانە دەنەشىنىقتىرۋ ىستەرى اگەنتتىگىنىڭ ۇيىمداستىرۋىمەن «قوعامنىڭ يندۋستريالىق-يننوۆاتسيالىق دامۋ جاعدايىنداعى دەنە تاربيەسى مەن جالپىعا بىردەي سپورتتىق باسىمدىقتارى مەن بولاشاعى» اتتى حالىقارالىق عىلىمي-پراكتيكالىق كونفەرەنتسيا ءوتتى.
استانادا سپورت جانە دەنەشىنىقتىرۋ ىستەرى اگەنتتىگىنىڭ ۇيىمداستىرۋىمەن «قوعامنىڭ يندۋستريالىق-يننوۆاتسيالىق دامۋ جاعدايىنداعى دەنە تاربيەسى مەن جالپىعا بىردەي سپورتتىق باسىمدىقتارى مەن بولاشاعى» اتتى حالىقارالىق عىلىمي-پراكتيكالىق كونفەرەنتسيا ءوتتى.
جيىندا نەگىزگى باياندامانى اگەنتتىكتىڭ دەنە-شىنىقتىرۋ دەپارتامەنتىنىڭ ديرەكتورى قانات قازبەكوۆ جاساپ, ەلىمىزدە بۇقارالىق, جوعارى جەتىستىكتەگى سپورت جانە دەنەشىنىقتىرۋ سالاسىن دامىتۋدا ىستەلىنىپ جاتقان جۇمىستار تۋرالى كەڭىنەن اڭگىمەلەپ بەردى. بايانداماشى بۇگىنگى تاڭدا «مەملەكەتتىڭ يننوۆاتسيالىق قىزمەتتى قولداۋى» تۋرالى زاڭعا سايكەس, ەلىمىزدە سپورت سالاسىنا يننوۆاتسيالىق تەحنولوگيالاردى ەنگىزۋ ماسەلەسىنىڭ جاقسى جولعا قويىلعانىن, سپورت مەكەمەلەرىنە يننوۆاتسيالىق گرانتتار بەرىلىپ, يننوۆاتسيالىق جوبالاردى ىسكە اسىرۋعا قولداۋ كورسەتىلىپ جاتقانىن اتاپ ءوتتى. سونىمەن بىرگە, ول ەلباسىنىڭ تاپسىرماسىنا سايكەس, 2020 جىلعا دەيىن ەلىمىزدە بۇقارالىق سپورتپەن اينالىسۋشىلاردىڭ سانىن 30 پايىزعا جەتكىزۋ ءۇشىن بارلىق جۇمىستاردىڭ جاسالىپ جاتقانىن, وسىعان بايلانىستى «دەنەشىنىقتىرۋ جانە سپورت» تۋرالى زاڭعا وزگەرىستەر مەن تولىقتىرۋلاردىڭ ەنگىزىلەتىنىن ايتتى.
بۇدان كەيىن رەسەي سپورتتىق مەنەدجمەنت فەدەراتسياسىنىڭ اتقارۋشى ديرەكتورى سۆەتلانا يزااك «عىلىمي-تەحنيكالىق جوبا: جاستار, جاسوسپىرىمدەر مەن بالالاردىڭ دەنە ءتاربيەسىمەن اينالىسۋىنا, دەنە بىتىمىنە مونيتورينگ جاساۋ» اتتى تاقىرىپتا بايانداما جاسادى. ۇلتتىق وليمپيادا كوميتەتىنىڭ ۆيتسە-پرەزيدەنتى ءاناتولى قۇلنازاروۆ «قازاقستان رەسپۋبليكاسىنداعى 2022 جىلعا دەيىنگى دەنەشىنىقتىرۋ – سپورت جۇيەسىن جاڭارتۋ» تاقىرىبىندا ءوز ويلارىن ورتاعا سالدى. ول ءوز سوزىندە ەل سپورتىنىڭ قازىرگى دامۋ دەڭگەيى مەن كەشەگى كسرو كەزىندەگى سپورتتاعى جەتىستىكتەرىمىزگە تالداۋ جاساپ, ەكى كەزەڭدى سالىستىرىپ, ءوز باعاسىن بەردى. وندا ول قازىرگى سپورت جۇيەسىنىڭ بۇرىنعى كەزدەن السىرەپ قالعانىن, دەگەنمەن, مەملەكەت تاراپىنان دەنەشىنىقتىرۋ مەن سپورتتى قولداۋعا قولدا بار مۇمكىندىكتىڭ ءبارى جاسالىپ جاتقانىن ايتتى. سونىمەن بىرگە, ول الداعى ون جىلدا سپورتتى دامىتۋعا بەرىلەتىن باسىمدىقتار تۋرالى ءسوز قوزعادى. وسى جەردە ا.قۇلنازاروۆ سپورتتى عىلىممەن ۇشتاستىرۋ, جاتتىقتىرۋشىلاردىڭ ءبىلىمى مەن بىلىكتىلىگىن ارتتىرۋ, سپورتتىق مەديتسينانى دامىتۋ, قازاقتىڭ «ايكۋنە» گيمناستيكاسىمەن اينالىسۋ سياقتى جۇمىستاردىڭ ماڭىزدىلىعىن اتاپ ءوتتى.
كونفەرەنتسيادا بۇكىلرەسەيلىك الەۋمەتتەندىرۋ مەن ءبىلىم عزي-نىڭ عىلىمي حاتشىسى ولگا رۋمنىڭ «ەستەتيكالىق گيمناستيكا – جاستار اراسىنداعى بولاشاقتاعى بۇقارالىق سپورت ءتۇرى» اتتى بايانداماسىندا گيمناستيكانىڭ بۇل ءتۇرىنىڭ دەنساۋلىق پەن دەنە سىمباتتىلىعىن ساقتاۋداعى ارتىقشىلىقتارىن ايتىپ بەردى.
جيىننىڭ قورىتىندى پلەنارلىق وتىرىسىندا قارار قابىلداندى.
داستان كەنجالين,
«ەگەمەن قازاقستان».