قوستانايعا قاشىقتان وقىپ جاتقان وقۋشىلارعا ارنالعان 3 مىڭ كومپيۋتەر جەتكىزىلدى. وقۋ قۇرىلعىلارى دارىندى بالالارعا ارنالعان ء«بىلىم-يننوۆاتسيا» ليتسەي-ينتەرناتى عيماراتىنا ءتۇسىرىلىپ, باق وكىلدەرىنىڭ كوزىنشە تەكسەرىلىپ, تۇگەندەلىپ, قابىلدانىپ الىندى.
– بيىل قاشىقتان وقىتۋدىڭ ساپاسىن قامتاماسىز ەتۋ ماقساتىندا ۇكىمەت قورىنان 2,4 ملرد تەڭگە ءبولىنىپ, 15 222 كومپيۋتەر قۇرىلعىسى ساتىپ الىنعان ەدى. ونىڭ ىشىندە 1584 كومپيۋتەر, 11586 نوۋتبۋك, 2050 پلانشەت بار. بۇعان دەيىن كەلگەن كومپيۋتەرلەردىڭ بارلىعى 20 اۋدانداعى مەكتەپتەرگە تاراتىلدى. بۇگىن 2 مىڭ 982 نوۋتبۋك قابىلداپ الىپ وتىرمىز. قازىر ماماندار ءار نوۋتبۋكتى قوسىپ كورىپ, تەحنيكالىق سايكەستىگىن تەكسەرىپ جاتىر. قاراشا ايىنىڭ سوڭىنا دەيىن قالعان 6 مىڭ 856 نوۋتبۋك جەتكىزىلەدى, – دەدى وبلىستىق ءبىلىم باسقارماسىنا قاراستى اقپاراتتاندىرۋ جانە ءبىلىم ساپاسى ورتالىعىنىڭ ديرەكتورى ولگا كوزليۋك.
وقۋ جىلى باستالعالى ءبىلىم باسقارماسى وبلىس وقۋشىلارىنا 12 مىڭ 500 كومپيۋتەر بەرگەن. ال جاڭادان قابىلدانىپ الىنعان كومپيۋتەرلىك قۇرىلعىلار ءار اۋدانعا جىبەرىلىپ, ەپيدەميالىق جاعداي ۋشىعىپ بارا جاتسا, قاشىقتان وقۋعا جىبەرىلگەن بالالارعا بەرىلەدى. ءبىرىنشى توقساندا وبلىس بويىنشا 22 مىڭنان استام بالا سىنىپتا ءبىلىم الدى, بۇل بالالاردىڭ دەنى اۋىل مەكتەپتەرىندە وقيدى.
ورتالىق ديرەكتورىنىڭ ايتۋىنشا, كەلىپ جاتقان كومپيۋتەرلەردىڭ ىشىندە اقاۋى بار قۇرىلعىلار دا كەزدەسىپ قالادى. مۇنداي جاعدايدا زاۋىت وكىلى جارامسىز كومپيۋتەردى قايتىپ الىپ, ورنىنا باسقا كومپيۋتەر جەتكىزىپ بەرەدى.
– قازىر قاشىقتان ءبىلىم الىپ جاتقان بالالاردىڭ كوبى ءوز ۇيىندەگى كومپيۋتەر, نوۋتبۋك, پلانشەتتەرىن پايدالانادى. بىزگە كەلگەن كومپيۋتەرلەر كوبىنە كومپيۋتەرلىك قۇرىلعى ساتىپ الۋعا مۇمكىندىگى جوق مۇقتاج بالالارعا بەرىلىپ جاتىر. مەكتەپ پەن اتا-انانىڭ اراسىندا كەلىسىمشارت جاسالادى دا, اتا-انا مەكتەپ دۇنيەسىنىڭ بۇتىندىگىنە جاۋاپتىمىن دەپ قول قويىپ بەرەدى. ۇيدە ساباققا پايدالانىپ, كەيىن جاعداي تۇزەلگەن سوڭ, كومپيۋتەردى مەكتەپكە قايتارىپ بەرەدى, – دەدى اقپاراتتاندىرۋ جانە ءبىلىم ساپاسى ورتالىعى ديرەكتورىنىڭ ورىنباسارى مەيرامعالي تايپوۆ.
ليتسەي-ينتەرنات عيماراتىنا تۇسىرىلگەن 3 مىڭعا جۋىق قۇرىلعىنى جيىرما شاقتى باعدارلاماشى مامان تەكسەرۋدەن وتكىزىپ, تىركەۋگە قويىپ جاتتى. كومپيۋتەرلەردى قوستانايعا جەتكىزىپ بەرگەن زاۋىت وكىلى دە وسىندا. ماماندار قانداي دا ءبىر اقاۋ تاپقان كومپيۋتەردى بىردەن قايتارىپ الىپ, ءبىر اپتانىڭ ىشىندە ونىڭ ورنىنا باسقاسىن اكەلىپ تاپسىرادى. باعدارلاماشىلاردىڭ ايتۋىنشا, ەشبىر تەحنيكالىق قۇرىلعىدان اقاۋ تابىلماعان.
– ءار نوۋتبۋكتىڭ تەحنيكالىق ەرەكشەلىكتەرىن تەكسەرىپ, قاشىقتان وقۋ بارىسىندا قاجەت پايدالانىلاتىن باعدارلامالاردىڭ بار-جوعىن قارايمىز. ۆيندوۋسى دۇرىس اشىلىپ, دۇرىس جۇمىس ىستەي مە, قۇرىلعىنىڭ پاسپورتى بويىنشا سايكەس كەلە مە, سونىڭ ءبارىن مۇقيات قاراپ شىعىپ, دۇرىس بولماسا, قايتارىپ بەرەمىز. وقۋشىلار «Zoom» قوسىمشاسى ارقىلى وقىعان كەزدە ۆەب-كامەرا جۇمىس ىستەپ تۇرۋ كەرەك. دىبىسىنا دەيىن تەكسەرىپ جاتىرمىز, ەكى ديناميك تە جۇمىس ىستەپ تۇرۋى كەرەك. بۇگىنشە 100 شاقتى نوۋتبۋكتى تەكسەرىپ شىقتىم, اقاۋى بار تەحنيكا كەزدەسپەدى, ءبارى جاقسى, ساپالى قۇرىلعىلار, – دەيدى ينجەنەر-تەحنيك شىڭعىس كەنجەبەكوۆ.
جاڭا كومپيۋتەرلەردىڭ وتاندىق كاسىپورىندا جاسالعانىن ايتا كەتۋ كەرەك. پەتروپاۆل قالاسىنداعى كومپيۋتەر زاۋىتى مەكتەپتەردى كومپيۋتەرمەن قامتۋ باعدارلاماسى اياسىندا قاشىقتان وقيتىن وقۋشىلاردى كومپيۋتەر قۇرىلعىلارىمەن تولىق قامتاماسىز ەتۋدى ءوز مىندەتىنە العان. زاۋىت شىعارىپ جاتقان ونىمگە قاجەت بولشەكتىڭ 30 پايىزى قازاقستاندا جاسالعان.
قوستاناي وبلىسى