سوڭعى جىلدارى سانامىزعا ۆولونتەر دەگەن ۇعىم مىقتاپ ورنىقتى. XVIII-XIX عاسىرلاردا باتىستا ءوز ەركىمەن اسكەر ساپىنا كەلگەن سايىپقىران جاستار وسىلاي اتالعان ەكەن. ۋاقىت وتە بۇل ءسوزدىڭ ماعىناسى كەڭەيىپ, ءوز جۇرەك قالاۋىمەن اقىسىز-پۇلسىز قوعام يگىلىگىنە قىزمەت ەتۋشى ەرىكتى جاستار دەگەن ۇعىمدى بىلدىرەتىن بولدى. ءبىزدىڭ قوعامدا ۆولونتەر ۇعىمىنىڭ پايدا بولعانىنا كوپ بولا قويعان جوق. بىراق وسى ۆولونتەرلىك – قازاق بالاسىنىڭ قانىندا ەجەلدەن بار قاسيەت.
مۇنى اتام قازاق اسار, اسار سالۋ دەپ اتاعانى بەلگىلى. ءبىر-بىرىنە جاناشىرلىعى, قايىرىم-جاقسىلىعى, بىرلىك-ۇيىمشىلدىعى جوق حالىق «كوپ تۇكىرسە – كول» دەپ ايتا الماسا كەرەك. وسى يگى ءداستۇردىڭ بۇگىندە جاڭاشا تۇرگە ەنىپ, اۋقىمىن كەڭەيتە تۇسكەنى كوڭىل قۋانتادى.
ماسەلەن, قوستاناي وبلىسىنىڭ امانگەلدى اۋدانىنا قاراستى بايعابىل ەلدى مەكەنىنەن تۇلەپ ۇشقان جاستار بۇگىندە ەلىمىزدىڭ ءار وڭىرىنە تۇراقتاپ, سىرت جەردە ەڭبەك ەتىپ جۇرسە دە, تۋعان اۋىلىنا زاماناۋي سپورت الاڭىن سالىپ بەرىپ, يگى ىسكە ۇيتقى بولىپ وتىر.
جان-جاقتا جۇرگەن بايعابىلدىق جاستاردى جاقسى ىسكە جۇمىلدىرىپ, باستاما كوتەرگەن بولات جۇماعاليەۆ بۇگىندە تالدىقورعان قالاسىندا تۇرادى.
– ءوزىم تالدىقورعان قالاسىنداعى مەشىتتەردىڭ بىرىندە يمامدىق قىزمەت اتقارامىن. وسىدان ءبىر جىل بۇرىن WhatsApp الەۋمەتتىك جەلىسى ارقىلى جەرلەستەردىڭ باسىن بىرىكتىرىپ, «تاۋەكەل!» دەپ اتالاتىن توپ اشتىق. مۇنى العاش اماندىق-ساۋلىق ءبىلىسىپ, قىسىر اڭگىمە, جالاڭ ماقتاۋ, قۇتتىقتاۋ ايتاتىن جەر دەپ ويلاعاندار دا بولدى. كەيىن توپ مۇشەلەرىنە ماقسات-مىندەتىمىزدى ءتۇسىندىرىپ, ءوزىمىز ءوسىپ-ونگەن تۋعان اۋىلىمىزعا پايداسى تيەتىن پەرزەنتتىك بورىشىمىزدى وتەۋىمىز كەرەك دەگەن ۇندەۋ تاستادىق. ابىروي بولعاندا, يگى باستاما كوپشىلىك قولداۋىنا يە بولىپ, اركىم مۇمكىندىگىنشە ءوز قالتاسىنان قارجى قوسىپ, اۋقىمدى ءىستى قولعا الىپ, بايعابىل اۋىلىندا زاماناۋي سپورت الاڭىن اشتىق. وسىلايشا, الەمدى ىندەت جايلاعان كۇردەلى كەزەڭدە اۋىلداعى ارتىمىزدان قاۋلاپ ءوسىپ كەلە جاتقان بالالار ءۇشىن جۇزدەگەن جەرلەس ازامات جيناعان قاراجاتقا اۋىلدا سپورت الاڭى بوي كوتەردى, – دەدى بولات جۇماعاليەۆ.
سپورت الاڭىنىڭ اشىلۋ راسىمىنە امانگەلدى اۋدانى اكىمىنىڭ ورىنباسارى سۇندەت عانيەۆ, اۋدان اكىمدىگىنە قاراستى بىرنەشە ءبولىم باسشىلارى مەن اۋىل تۇرعىندارى قاتىستى. سالتاناتتى جيىندا اكىم ورىنباسارى بايعابىلدىقتاردى جاڭا سپورت نىسانىنىنىڭ اشىلۋىمەن قۇتتىقتاپ, فۋتبول الاڭىنىڭ سالىنۋىنا ەرەكشە اتسالىسىپ, جاستاردى ۇيىمداستىرا بىلگەن باعلان ەرعازين مەن بولات جۇماعاليەۆكە اۋدان اكىمىنىڭ العىس حاتىن تاپسىردى.
– امانگەلدى اۋدانىندا سالاماتتى ءومىر سالتىن, بۇقارالىق سپورتتى دامىتۋ باعىتىندا كوپتەگەن تىندىرىمدى ىستەر اتقارىلدى. بايعابىل اۋىلدىق وكرۋگىندەگى فۋتبول الاڭىنىڭ اشىلۋى – سونىڭ ءبىر دالەلى. جالپى, بۇقارالىق سپورتتى دامىتۋ وبلىس اكىمى ارحيمەد مۇحامبەتوۆتىڭ تىكەلەي تاپسىرماسى. ءوڭىر باسشىسى شالعاي اۋىلدارداعى الەۋمەتتىك سالانىڭ دامۋىن قاداعالاپ وتىرادى. اۋدانىمىزدا مۇنداي شارالاردىڭ ءجيى ءوتىپ جاتقانى قۋانتادى. مىسالى, كۇنى كەشە عانا اقساي اۋىلىندا كۇردەلى جوندەۋدەن وتكەن سپورت زالى اشىلدى, – دەدى سۇندەت عانيەۆ.
اۋدان باسشىلارى بايعابىل اۋىلىنىڭ جاس فۋتبولشىلارىنا ويىن دوپتارىن سىيعا تارتتى. ودان كەيىن ءسوز العان بولات جۇماعاليەۆ الەۋمەتتىك شاراعا بەلسەنە اتسالىسقان اۋىل ازاماتتارىنا العىس حاتتار مەن باعالى سىيلىقتارىن تابىس ەتتى.
– تۋعان جەردى كوركەيتۋ نيەتىمەن جاسالعان قايىرىمدى ىسكە «تاۋەكەل, جەرلەستەر!» توبىنداعى ازاماتتار كوپ ەڭبەك ءسىڭىردى. اۋدان باسشىلىعىنان العان ماراپاتتى وسى الەۋمەتتىك جەلىدەگى توپتىڭ جەتىستىگى دەپ قابىلداڭىزدار. الدەبىرەۋدىڭ ەڭبەگىن بولە-جارا ايتۋدىڭ ءوزى ارتىق ەتەدى. اركىمنىڭ ءوز نەسىبەسى بار. شىنى كەرەك, بايعابىلدىڭ بارى دا, باعى دا – مەكتەپ. اۋىلعا ات باسىن بۇرىپ كەلگەندەردى قوناق قىلىپ, الەك بولاتىن دا سول مەكتەپتىڭ ۇجىمى. وسى جولى دا ءۇردىس جالعاستى. مۇعالىمى مەن وقۋشىسى, باسشىسى مەن كۇزەتشىسىنە دەيىن وسى قۋانىشتىڭ باسى-قاسىندا ءجۇردى. كەز كەلگەن يگى باستامانىڭ ءتارتىبى مەن تالىمىنە جاۋاپتى قۋاندىق باقىت ۇلى باستاعان پەداگوگتەر قاۋىمىنا العىسىمىز شەكسىز. ونى بۇكىل اۋىل ادامى كوردى. سوناۋ الماتى وبلىسىنان سەرىك ەسىمدى امبەباپ ماماندى شاقىرتىپ, سپورت الاڭىنىڭ ساپالى سالىنۋىنا جاعداي جاسادىق. ول كىسىنى اۋىل ادامدارى قوناق قىلىپ, قازاقى داستۇرمەن لايىقتى شىعارىپ سالدى. جەرلەستەر ريزا, ويىن بالاسىنىڭ قۋانىشىندا شەك جوق. كوپتەن كۇتكەن سپورت نىسانى بوي كوتەردى. مىنە, بىزگە بۇدان ارتىقتىڭ قاجەتى جوق, – دەدى بولات ساعىنعالي ۇلى.
اۋىل سپورتىنىڭ كەشەگىسى مەن بۇگىنىن جاقسى بىلەتىن ارداگەر سپورتشى ايتمۇحامبەت بيعابىلوۆتىڭ سوزىنشە, جاساندى جامىلعىسى بار فۋتبول الاڭىنىڭ ساپاسى جاقسى. قۇرىلىسى تەز ارادا اياقتالسا دا, جۇمىستار جيناقى, تياناقتى ىستەلگەن.
– «ۋاتساپتا» اشىلعان توپتىڭ باستى ماقساتى – تۋعان اۋىلدىڭ كەم-كەتىگىن تۇزەپ, گۇلدەنۋىنە اتسالىسۋ. وسى ماقساتتا الداعى جىلدارى جاڭا جوبالارعا جول اشىلادى. ونى قولداۋ – اۋىلدىڭ ءار ازاماتىنىڭ ابىرويى. بولات, قۋاندىق, باعلان سياقتى بەلسەندى جاستار جوسپارلارىمەن بولىسە جاتار, – دەيدى «تاۋەكەل, جەرلەستەر» توبىنىڭ مۇشەسى مۇرات نۇرجانوۆ.
بايعابىلدىق ۆولونتەرلەر الداعى ۋاقىتتا اۋىل ورتالىعىنان ساياباق اشىپ, اۋىل ماڭىنداعى وزەن جاعاسىن اباتتاندىرۋدى كوزدەپ وتىر.
قوستاناي وبلىسى
امانگەلدى اۋدانى
بايعابىل اۋىلى