«قازاقتەلەكوم» اكتسيونەرلىك قوعامى شىعىس قازاقستان وبلىسىندا تالشىقتى-وپتيكالىق بايلانىس جەلىلەرىنىڭ قۇرىلىسىن اياقتادى. «تسيفرلى قازاقستان» مەملەكەتتىك باعدارلاماسى شەڭبەرىندە ىسكە اسىرىلاتىن اەم توبج (تالشىقتى وپتيكالىق بايلانىس جەلىلەرى) جوباسى قۇرىلىسىنىڭ ارقاسىندا وبلىستىڭ 94 شالعاي اۋىلىندا 308 مەملەكەتتىك مەكەمە مەن بيۋدجەتتىك ۇيىم كەڭجولاقتى ينتەرنەتكە قوسىلدى. جوبانى ىسكە اسىرۋ بارىسىندا جىل باسىنان باستاپ شىعىس قازاقستان وبلىسى بويىنشا جالپى ۇزىندىعى 1795 كيلومەتر قۇبىر جانە 1913 كيلومەتر تالشىقتى-وپتيكالىق كابىل تارتىلدى.
بۇل تۋرالى «شىعىس – ادالدىق الاڭى» جوبالىق كەڭسەسىنىڭ ۇيىمداستىرۋىمەن وتكەن ANTIKOR LIVE جوباسى اياسىندا «قازاقتەلەكوم» اق فيليالى-شىعىس وڭىرلىك تەلەكوممۋنيكاتسيا ديرەكتسياسىنىڭ باس ديرەكتورى ەرمەك قۋانىشبەكوۆ مالىمدەدى.
بۇگىنگى كۇنى جوبا بويىنشا ۇلان اۋدانىنداعى اسۋبۇلاق, تارعىن اۋىلدارىندا جانە كاتونقاراعاي اۋدانىنداعى سولونوۆكا, نوۆوپولياكوۆكا اۋىلدارىندا مەملەكەتتىك مەكەمەلەردى قوسۋ جۇرگىزىلدى. ەندى 10 مىڭنان استام اۋدان تۇرعىنى جوعارى جىلدامدىقتى ينتەرنەتكە قول جەتكىزىپ, زاماناۋي تەلەكوممۋنيكاتسيا قىزمەتتەرىن ەركىن پايدالانا الادى. بۇل اۋدانداردىڭ حالقىن جوعارى جىلدامدىقتى ينتەرنەتكە قوسۋ ءۇشىن ماماندار كۇردەلى گەوگرافيالىق ورتاعا بايلانىستى تەحنيكالىق شەشىمدى بىرنەشە رەت وزگەرتۋگە ءماجبۇر بولدى. ويتكەنى ەكى اۋدان دا تاۋلى رەلەفكە باي جانە شۆەيتساريا تابيعاتىمەن سالىستىرىلاتىن تابيعاتپەن كەڭىنەن تانىمال. بۇل اۋدانداردا تالشىقتى وپتيكالىق جەلىنى تارتۋ جوباسى جەرگىلىكتى شارۋا قوجالىقتارىنا تيەسىلى بيداي داقىلدارى مەن قىمبات تۇقىم سورتتارىن ەگەتىن القاپتارمەن ارقىلى وتەتىنى جانە جەردىڭ تاستى توپىراق بولعانىمەن قيىندادى. شىعىس ءوتد قىزمەتكەرلەرى شارۋالاردىڭ قىزمەتىنە زيان تيگىزبەس ءۇشىن جەلىلەر تراسساسىنىڭ باعىتىن وزگەرتىپ, قوجالىق القاپتارىن اينالىپ وتەتىندەي ەتىپ جاسادى.
«قازاقتەلەكوم» اق فيليالى-شىعىس وڭىرلىك تەلەكوممۋنيكاتسيا ديرەكتسياسىنىڭ باس ديرەكتورى ەرمەك قۋانىشبەكوۆتىڭ ايتۋىنشا, بۇرىندارى تارعىن, سولونوۆكا جانە نوۆوپولياكوۆكا سياقتى ينتەرنەتى جوق اۋىلداردا توبج قۇرىلىسى تۇرعىندارعا كومپانيا قىزمەتتەرىنە قوسىلۋعا مۇمكىندىك بەرەدى. مىسالى, جوعارى جىلدامدىقتى ينتەرنەت, تەلەفون جانە iD TV ساندىق تەلەديدار قىزمەتتەرى.
«باعدارلاما اياسىندا سالىنعان توبج ينفراقۇرىلىمىنىڭ ارقاسىندا اەم-دە ۇيالى بايلانىس وپەراتورلارى تۇرعىندارعا تەلەكوممۋنيكاتسيالىق قىزمەتتەردىڭ بارلىق سپەكترىن ۇسىنۋعا مۇمكىندىك الادى. سونداي-اق بۇل قۇرىلىس تاعى ءبىر جوبا – «250+» ءۇشىن نەگىز بولدى. وسى جوبا شەڭبەرىندە ۇتقىر بايلانىس وپەراتورلارى مەملەكەتتىك مەكەمەلەردى «وپتيكاعا» قوسۋ نۇكتەلەرىنىڭ بازاسىندا وزدەرىنىڭ بازالىق ستانسالارىن ورىستەتۋدە. وسىلايشا, حالقى 250 ادامنان اساتىن اۋىلدىق ەلدى مەكەندەردىڭ اۋماعىن 3G/4G LTE راديوسيگنالدىق جەلىمەن قامتىپ وتىر. جەلىنى بىرلەسىپ سالۋ جانە جيىلىكتەردى پايدالانۋ وپەراتورلاردىڭ شىعىندارىن ازايتىپ قانا قويماي, اۋىلداردى تسيفرلاندىرۋ پروتسەسىن جەدەلدەتەدى. بۇرىن جەرۇستى ارنالارى ارقىلى وتەتىن تۇراقتى سيگنال كوزى بولماسا, ۇيالى بايلانىس وپەراتورلارى ءوز قىزمەتتەرىن جانە ساپالى بايلانىستى تەحنيكالىق تۇردە ۇسىنا المادى. «وپتيكانىڭ» بولۋى ولارعا توبج جوباسىنا قاتىسۋشى اۋىلداردىڭ تۇرعىندارىن عانا ەمەس, ولارعا جاقىن ورنالاسقان ەلدى مەكەندەردى دە جوعارى جىلدامدىقتى ينتەرنەتپەن قامتاماسىز ەتۋگە مۇمكىندىك بەرەدى», دەدى فيليال باسشىسى.
توبج جانە «250+» قۇرىلىس باعدارلامالارىن ىسكە اسىرۋ اۋىلداعى بايلانىستى تولىق جاڭعىرتۋدى قامتاماسىز ەتۋ ءۇشىن جاڭا مۇمكىندىكتەر مەن جاعدايلار تۋعىزادى. بۇل ءوز كەزەگىندە شالعايداعى ەلدى مەكەندەردىڭ تۇرعىندارىنا كەڭجولاقتى ءموبيلدى ينتەرنەتكە قول جەتكىزۋگە, ال ونىمەن بىرگە قالا مەن اۋىل اراسىنداعى «تسيفرلىق تەڭسىزدىك» شەكاراسىن بۇزا وتىرىپ, تەلەمەديتسينا, ونلاين-ءبىلىم بەرۋ جانە ت.ب. سياقتى كورسەتىلەتىن تسيفرلى مەملەكەتتىك قىزمەتتەردى پايدالانۋعا مۇمكىندىك بەرەدى.
شىعىس قازاقستان وبلىسى