قوستاناي وبلىسىندا 12 سانيتارلىق بەكەت جۇمىس ىستەي باستادى. ونىڭ تورتەۋى رەسەيمەن شەكتەسىپ جاتقان قارابالىق, ۇزىنكول, بەيىمبەت مايلين اۋداندارىنداعى شەكارا بەكەتتەرىنە, ۇشەۋى وبلىس ورتالىعىنا كىرەتىن جولدارعا, تورتەۋى قوستاناي اۋدانىنا, ال بىرەۋى جىتىقارا قالاسىنىڭ كىرەبەرىسىنە قويىلدى.
9 قاراشاعا قاراعان ءتۇنى ايماق باسشىسى ارحيمەد مۇحامبەتوۆ پەن وبلىستىق پوليتسيا دەپارتامەنتىنىڭ باستىعى بەكەت ايماعامبەتوۆ قوستاناي قالاسىنىڭ ماڭىنداعى 3 سانيتارلىق بەكەتتە بولىپ, كەزەكشىلىككە شىققان قىزمەتكەرلەردىڭ جۇمىس جاعدايىمەن تانىستى.
– سانيتارلىق بەكەتتەردە 24 مەديتسينا قىزمەتكەرى, 94 پوليتسەي جانە 13 اۆتوپاترۋل كەزەكشىلىك ەتىپ جاتىر. بارلىعى قاجەتتى قورعانىس قۇرالدارىمەن جابدىقتالعان. بەكەت قىزمەتكەرلەرى 12 ساعات سايىن اۋىسىپ وتىرادى. قالاعا كىرىپ-شىعىپ جاتقان جولاۋشىلارعا مۇقيات باقىلاۋ جۇرگىزۋدى, سونداي-اق كەزەكشىلىكتەگى بارلىق قىزمەتكەرلەردى كەرەك-جاراقپەن قامتاماسىز ەتۋدى تاپسىردىم, – دەدى وبلىس اكىمى.
بەكەت ايماعامبەتوۆ پوليتسيا مەن مونيتورينگ توپتىڭ مۇشەلەرى بىرلەسىپ, كارانتين ءتارتىبىن بۇزۋشىلاردى تەزگە سالۋ شارالارىن كۇشەيتىپ جاتقانىن ايتتى.
– كەيىنگى كۇننىڭ ىشىندە عانا كارانتين رەجىمىن بۇزعان 232 ادام انىقتالىپ وتىر. الدىن الا ايتىلعان ەسكەرتۋلەرگە قاراماستان, وبلىس تۇرعىندارى تۋعان كۇن, ۇيلەنۋ تويى, اس بەرۋ سياقتى جيىنداردى جاسىرىن وتكىزۋدى دوعارار ەمەس. مۇنداي جيىندارعا 50-دەن 200-گە دەيىن ادام جينالىپ, سانيتارلىق نورمالار ورەسكەل بۇزىلىپ, ىندەتتىڭ ەتەك الا تۇسۋىنە سەبەپ بولىپ جاتىر, – دەدى دەپارتامەنت باستىعى.
سانيتارلىق تالاپتاردىڭ ساقتالۋىنا قامتاماسىز ەتۋ ماقساتىندا كۇندەلىكتى رەيد شارالارىنا شىعىپ وتىراتىن مونيتورينگ توبىنىڭ تەكسەرىس ناتيجەلەرىنە جۇگىنسەك, 7 قاراشادا وبلىس ورتالىعىنداعى «ەۆرازيا» مەيرامحاناسىندا 100-گە جۋىق ادام قاتىسقان ۇيلەنۋ تويى, «ديار» ءدامحاناسىندا 35 ادام باس قوسقان قۇدالىق, بىرنەشە جالدامالى كوتتەدجدەردە 30-دان اسا ادام جينالعان تۋعان كۇن, قىز ۇزاتۋ وتكەن. سونداي-اق «تاندىر» ءدامحاناسىندا 30-دان اسا ادام وتباسىلىق مەرەكەگە باس قوسىپ, «رەلاكس», «لەد» دەگەن ساۋنالاردىڭ تىيىم سالىنعان ۋاقىت ىشىندە جۇمىس ىستەگەنى انىقتالىپ وتىر.
ساۋدا ورىندارىندا سانيتارلىق تالاپقا سالعىرت قارايتىن ساتۋشىلاردىڭ كوپتىگى دە الاڭداتادى. ماسەلەن, ءبىر كۇننىڭ ىشىندە تاۋاردى تارازى باسىنان قولعاپسىز, ماسكاسىز جىبەرگەن 70-تەن اسا ساتۋشى انىقتالدى. مونيتورينگ توپتىڭ مالىمەتىنشە, 7 قاراشا كۇنى تەك قاراسۋ مەن ۇزىنكول اۋداندارىندا عانا بىردە-ءبىر سانيتارلىق تالاپتاردىڭ بۇزىلۋ فاكتىسى تىركەلمەگەن.
قوستاناي وبلىسى