ليساكوۆ قالاسىندا تۇراتىن الەكسەي سىچۋگوۆتىڭ ەسىمى بۇگىندە ءبۇتىن قوستاناي وڭىرىنە بەلگىلى. ءتۋابىتتى دەرت دەندەپ اجال اۋزىندا جاتقان ءۇش جاسار بەيتانىس بالاعا باۋىر ەتىن ءبولىپ بەرىپ, ولىمنەن اراشالاپ قالعان جاس جىگىتتىڭ ەرلىگىنە بىلتىر بۇكىل ەل ءسۇيسىنىپ, ەرىكسىز تاڭعالىسقان.
ايتپاقشى, ناۋقاس ءسابيدىڭ دە ەسىمى الەكسەي بولىپ شىقتى. ءوتسىز تۋىلعان شاقالاقتىڭ باۋىرى ءىري باستاعان سوڭ «الاقانداعى ءومىر» جوباسى ارقىلى استانادا تۇركيادان كەلگەن دارىگەرلەر كۇردەلى وتا جاساپ, بالانىڭ باۋىرىن اۋىستىرعان. ول جولى اكەسى دونور بولعان. وسى وتادان كەيىن دە اتا-اناسى بالانى بىرنەشە رەت تۇركياعا اپارىپ كەلدى. بىلىكتى ماماندار قالت ەتپەي باقىلاۋ جۇرگىزىپ, جاڭا باۋىردىڭ ءبىتىپ كەتۋىنە قانشا كۇش سالعانىمەن بولمادى. جەتى ايدان سوڭ تاعى بالانىڭ باۋىرى اسقىنىپ, اكەسى ەكىنشى قايتارا دونور بولا الماعان سوڭ بىلتىر باسقا ادام ىزدەۋگە تۋرا كەلەدى. بالانىڭ باعىنا وراي, بىردەن بىرنەشە دونور تابىلا كەتتى. دارىگەرلەر ولاردىڭ ءبارىن مۇقيات مەديتسينالىق تەكسەرۋدەن وتكىزىپ, ىشىنەن الەكسەي سىچۋگوۆتى تاڭداپ الدى. كوپ كەشىكپەي قوس الەكسەي وپەراتسيا توسەگىنە جاتتى. ابىروي بولعاندا, وتا ءساتتى ءوتىپ, جاڭا باۋىر جاڭا ورنىنا جىلدام بەيىمدەلىپ, جاندانا باستادى.
– بىردە كەشكىلىك الەۋمەتتىك جەلىدە كىشكەنتاي بالاسىنا دونور ىزدەپ الاسۇرعان انانىڭ جانايقايىن كورىپ قالدىم. ءومىرى كورمەسەم دە, ءسابيدىڭ بەينەسى كوز الدىما كولبەڭدەپ تۇرىپ الدى. ەرتەسى ۇيقىدان تۇرا سالىپ, ويلانباستان حابارلامادا كورسەتىلگەن تەلەفونعا قوڭىراۋ شالدىم. ودان كەيىن دارىگەرلەرگە سانسىز اناليز تاپسىرىپ, تەكسەرۋلەردەن ءوتتىم. اقىرى باۋىرىم اۋىستىرۋعا جارايدى دەگەن قورىتىندى شىقتى. ودان كەيىن دارىگەرلەر وتادان كەيىن بىردەن ءولىپ كەتۋىم مۇمكىن ەكەنىن ەسكەرتىپ, باستاپقى ويىمنان باس تارتۋعا ءالى دە كەش ەمەس ەكەنىن ەسكەرتتى. مەن ويلاناتىن تۇگى جوق ەكەنىن ايتىپ, دارىگەر پىشاعى قانداي جاعدايعا دۋشار ەتسە دە, ەشكىمگە كىنا ارتپايتىنىم تۋرالى قۇجات تولتىرىپ, قول قويىپ بەردىم. وتا انكارادا وتە ءساتتى ءوتتى. سودان بەرى ەكى جىلعا تاياۋ ۋاقىت ءوتتى, ءوزىمدى وتە جاقسى سەزىنەمىن, – دەدى ا.سىچۋگوۆ.
الايدا الەكسەي وتادان كەيىن بىردەن اياققا تۇرىپ كەتە العان جوق. دارىگەرلەر باۋىرىنىڭ ۇشتەن ءبىرىن, ءوتىن, اياق تامىرىنىڭ ءبىر بولىگىن الىپ تاستادى. قازىر دەنساۋلىعى تولىق قالپىنا كەلگەنىمەن, اۋىر كوتەرۋگە ءالى ەرتەرەك. وتادان كەيىن جاس جىگىت تالاي تاڭدى ۇيقىسىز اتىرىپ, كوپ كۇندەرىن ازاپپەن وتكىزگەنىن جاسىرمايدى.
– ىشىمدە بىردەمە جارىلىپ كەتكەن سياقتى اۋرۋدان باسقا ەشتەڭە سەزبەدىم. نە ۇيىقتاي المايسىڭ, نە تۇرا المايسىڭ, توسەككە تاڭىلىپ جاتىپ ىشكى اعزاڭنىڭ قاتتى اۋىرعانىن سەزىنۋ وتە اۋىر ەكەن. تەك ءىش قۇرىلىسىمنىڭ اۋىرعانى باسىلىپ, الاڭسىز ۇيقىعا كەتۋدى ارماندادىم. ادەتتە, وتادان كەيىن العاشقى ءۇش كۇن بويى دارىگەرلەر دونورلارعا مورفين سالادى ەكەن. مەنىڭ اللەرگيام بار بولعاندىقتان, ونى دا سالمادى. قازىر ءبارى ۇمىتىلدى عوي, – دەپ جىميدى الەكسەي.
بىلتىر تۇڭعىش پرەزيدەنت كۇنى قارساڭىندا ايماق باسشىسى ارحيمەد مۇحامبەتوۆ «قوستاناي وبلىسىنىڭ التىن كىتابىنا» ەنگەن 11 جاس ورەندى ماراپاتتادى. سپورت, ونەر, عىلىم, بيزنەس سالاسىندا تولايىم تابىسقا قول جەتكىزگەن كىلەڭ دۇلدۇلدەر. جەڭىس تۇعىرىندا ليساكوۆ قالاسىنداعى كەن ورنىندا ماشينيست كومەكشىسى بولىپ جۇمىس ىستەيتىن الەكسەي سىچۋگوۆ تا جۇيرىكتەرمەن يىق تەڭەستىرىپ تۇردى.
قازىر ەكى الەكسەي ءبىر تۋعانداي بولىپ باۋىر بولىپ كەتتى. ەكەۋى ءجيى كەزدەسىپ تۇرادى. ۇلكەنى ءبىراز كورىنبەي كەتسە, كىشىسى ەلەگىزىپ ىزدەي باستايدى. تۋعالى سولاقاي كىشكەنتاي الەكسەي وتادان كەيىن, استى وڭ قولىمەن جەي باستاعان. اتا-اناسى مۇنى ۇلكەن الەكسەيدىڭ باۋىرى اسەر ەتتى دەپ ىرىمدايدى ەكەن.
ءبىر ءسابيدىڭ ومىرىنە اراشا ءتۇسىپ, كوپشىلىكتىڭ العىسىن العان ا.سىچۋگوۆ ءوز ءىسىن ەرلىك دەپ سانامايدى.
– ادامعا قولۇشىن سوزۋ ادامعا ءتان قاسيەت قوي, بۇل ەرلىك ەمەس. جاقسىلىق جاساساڭ جانىڭ سەمىرەدى. باۋىرىمنىڭ ءبىر بولشەگىن بەرىپ, وزىمە ومىرلىك باۋىر تاپتىم, – دەيدى بەيبىت كۇننىڭ باتىرى.
قوستاناي وبلىسى