ەل استاناسىنىڭ الداعى ءۇش جىلدىق بيۋدجەتى بەلگىلى بولدى

قالالىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى قايسار ماڭقاراەۆتىڭ ايتۋىنشا, ءۇش جىلدىق بيۋدجەتتىڭ پارامەترلەرى اعىمداعى جاعدايدى جانە 2025 جىلعا دەيىنگى كەزەڭگە ارنالعان ەلوردانىڭ بولجامدى كورسەتكىشتەرىن ەسكەرە وتىرىپ قالىپتاستىرىلدى.

"2021-2023 جىلدارى جەتكىزىلگەن ليميتتەرگە سايكەس, جەكە كىرىستەردىڭ ءتۇسىمى 1 ترلن 1 ملرد 376 ملن تەڭگەنى قۇرايدى. ونىڭ ىشىندە 2021 جىلى 319,7 ملرد تەڭگە, 2022 جىلى – 332,2 ملرد جانە 2023 جىلى - 349,3 ملرد تەڭگە. 2021 جىلى جەكە كىرىس كولەمى 319,7 ملرد تەڭگە سوماسىندا باعالانىپ وتىر, بۇل تۇرعىدا 5 پايىز ءوسىم قامتىلدى", دەدى باسقارما باسشىسى بيۋدجەت, ەكونوميكا, ونەركاسىپ جانە كاسىپكەرلىك ماسەلەلەرى جونىندەگى تۇراقتى كوميسسيا وتىرىسىندا.

ونىڭ ىشىندە سالىق تۇسىمدەرى 315,9 ملرد تەڭگە, سالىقتىق ەمەس تۇسىمدەر 1,1 ملرد تەڭگە, سونداي-اق نەگىزگى كاپيتالدى ساتۋدان كەلەتىن ءتۇسىم 2,7 ملرد تەڭگە بولدى. الداعى ءۇش جىلدا سالىق تۇسىمدەرى ەلوردانىڭ جەكە كىرىستەرىنىڭ جالپى كولەمىنىڭ 98 پايىزعا جۋىعىن قامتاماسىز ەتەدى.

ق. مانقاراەۆتىڭ سوزىنە قاراعاندا, جەرگىلىكتى ءۇش جىلدىق بيۋدجەتتىڭ شىعىسى 1 ترلن 1 ملرد 376 ملن تەڭگە سوماسىندا جوسپارلانعان. سايكەسىنشە, ونىڭ ىشىندە 2021 جىلى 319,7 ملرد تەڭگە, 2022 جىلى – 332,2 ملرد, 2023 جىلى 349,3 ملرد تەڭگە جۇمسالماق.