مۇگەدەك بالالاردىڭ مۇددەسىن كىم قورعايدى؟

ۆولونتەرلەر جىلى اشىلعان قورعا جىل باسىنان بەرى مەملەكەت بيۋدجەتىنەن ءبولىنىپ كەلگەن قارجى جارتى جىلدان سوڭ توقتاپ قالعان. ويتكەنى, اقىلى قىزمەت كورسەتۋمەن اينالىساتىن باسقا ورتالىق نارازىلىق ءبىلدىرىپ, سوت ۇكىمى «مەملەكەتتىك تاپسىرىس زاڭسىز» دەگەندەي سەبەپپەن ورتالىقتىڭ جۇمىسىن توقتاتقان. بىراق, زاڭگەر ۆلاديسلاۆ جيۆوتياگين ورتالىقتىڭ قۇجاتتارى دۇرىس ەكەنىن ايتادى. ال مەملەكەت قارجى ءبولۋدى توقتاتقاننان بەرى ورتالىقتىڭ جەتەكشىسى دارىن ساعدولدين عيماراتتىڭ ارەنداسى مەن مامانداردىڭ جالاقىسىن ءوز قالتاسىنان تولەپ وتىر.    

- ورتالىعىمىز ەرەكشە قاراۋدى قاجەت ەتەتىن 27 بالاعا تەگىن قىزمەت كورسەتىپ كەلەدى. سوت جۇمىسىمىزدى توقتاتقانىمەن, ءوزىمىز جۇمىستى جالعاستىرىپ كەلەمىز. ويتكەنى بالالارعا باستالعان ەم-دومدى ورتا جولدا قالدىرۋعا بولمايدى. مۇندا بالالارمەن دەفەكتولوگ, لوگوپەد, پسيحولوگ, ماسساجيست ماماندار جۇمىس ىستەيدى. ءبارى ءبىلىمدى, بىلىكتى. باسسەينگە دەيىن اپارادى. ال بالالاردىڭ اتا-انالارى جۇمىس ىستەمەگەندىكتەن, باسقا اقىلى ورتالىقتارعا بارۋعا شامالارى كەلمەيدى, - دەيدى دارىن ساعدولدين.

بىلىكتى مامانداردىڭ ايتۋىنشا, دتسپ دەرتكە, اۋتيزمگە شالدىققان بالالاردى ەمدەۋگە بولادى. وسكەمەننەن ءبىر بالا سانكت-پەتەربۋرگتە ەمدەلىپ, دەنساۋلىعىن 50-60 پايىزعا جاقسارتىپ كەلگەن. ونى بايقاعان ورتالىق جەتەكشىسى مۇگەدەك بالالاردىڭ شىعىندانىپ, شەتەلگە سابىلماۋى ءۇشىن مەملەكەتتەن ۇتىپ الىنعان 5 ملن تەڭگە گرانتتىڭ قارجىسىنا ارنايى قۇرىلعى ساتىپ الۋدى كوزدەپ وتىر. بۇعان اتا-انالار قۋانعانىمەن, كوڭىلدەرىندە الاڭداۋشىلىق باسىم.

- مەنىڭ بالام دتسپ, ەپيلەپسياعا شالدىققان. مۇندا ءبىلىمدى مامانداردىڭ جۇمىس ىستەيتىنىنە كوزىمىز جەتتى. قىزمەتتىڭ بارلىق ءتۇرى تەگىن كورسەتىلەدى. ەرەكشە بالالارعا قاراپ وتىرعان اتا-انا ءۇشىن ۇلكەن كومەك ەدى, - دەيدى اتا-انا دامير نۇرمۇحانبەت.   

كوزدەرى جاۋدىرەگەن ەرەكشە بالالاردىڭ ساۋىعىپ كەتۋى ءۇشىن جۇمىس ىستەپ تۇرعان ارنايى ورتالىقتىڭ ەرتەڭى ب ۇلىڭعىر. جابىلىپ قالسا, مۇنداعى اتا-انالاردىڭ اقىلى ورتالىقتا ەم الۋعا قالتالارى كوتەرە بەرمەيدى. قالتالارى كوتەرگەن كۇننىڭ وزىندە, ەرەكشە بالالاردىڭ وزگە ورتاعا بەيىمدەلىپ كەتۋى قيىن.

وسكەمەن