الماتىداعى كىز-كەلىنشەكتەر مەن كوپبالالى انالار اراسىنداعى كاسىپكەرلىكتى دامىتۋ ءۇشىن قولعا الىنعان «باقىتتى وتباسى» باستاماسى بۇدان بىلاي باسقا باعىتتا جۇمىس ىستەۋى بەك مۇمكىن. الماتى قالاسىنىڭ اكىمى باقىتجان ساعىنتاەۆ تاعدىر تالكەگىنە تاپ بولعان ايەلدەردى الەۋمەتتىك قولداۋ ورتالىقتارىنا بارعان كەزىندە وسىنداي شەشىم قابىلدادى.
قالا بيلىگى ءۇشىن وتكەن جىلى الماتىنىڭ ءار اۋدانىندا «باقىتتى وتباسى» الەۋمەتتىك قولداۋ ورتالىقتارىن اشۋ باستى ماقسات بولسا, بيىل ونىڭ تيىمدىلىگى الدىڭعى قاتارعا شىعىپ وتىر. مۇنداي ورتالىقتار ايەلدەردىڭ, اسىرەسە كوپبالالى انالاردىڭ ىسكەرلىك بەلسەندىلىگىن ارتتىرۋعا سەپتىگىن تيگىزۋدە.
– «Isker Ana» باعدارلاماسى ارقىلى بيزنەس داعدىلارىنا ۇيرەتۋدى باستاپ, يننوۆاتسيالىق جوبالاردى ىسكە قوسۋ ءۇشىن گرانتتار ۇسىندىق. اقمارال باسيروۆا قۇرعان الاتاۋ اۋدانىنىڭ «باقىتتى وتباسى» ورتالىعى ءبىر جىلدىڭ ىشىندە الماتىنىڭ وزگە اۋداندارى ءۇشىن عانا ەمەس, ەلىمىزدىڭ باسقا وڭىرلەرى ءۇشىن دە ۇلگى بولا ءبىلدى», دەيدى ورتالىقتاردىڭ تىرشىلىگىمەن تانىسقان شاھار باسشىسى.
اكىمنىڭ ايتۋىنشا, مۇندا ايەلدەرگە كەڭەس بەرىلىپ قانا قويمايدى. قيىن جاعدايعا تاپ بولعان ايەلدەردىڭ وزدەرىنە قايتا سەنۋىنە, وزدەرىنە ۇنايتىن نارسەنى تاڭداپ, ءومىر سالتىن تولىعىمەن وزگەرتۋلەرىنە كومەكتەسەدى. انالار بالالارعا ءوز ەڭبەگىمەن اقشا تابۋعا بولاتىنىن كورسەتەدى. كۇن سايىن مۇندا 150-گە جۋىق ايەل كەلەدى. ءبىر جىلدىڭ ىشىندە 25 مىڭ ايەل ادام 31 باعىت بويىنشا ءتۇرلى كۋرستاردا ءبىلىم الدى.
الماتى اكىمى ءبىر جىل بۇرىن ورتالىققا باپكەر رەتىندە كەلگەن ءمولدىر جۇنىسبەكوۆانىڭ ءومىرىن مىسالعا كەلتىردى. ول 500-گە جۋىق ايەلدى وقىتسا, سونىڭ 200-ءى بۇگىن جۇمىس تاپتى. ءتىپتى ول جاڭا جۇمىس ورىندارىن قۇرۋدا. «بيزنەستىڭ جول كارتاسى-2025» بويىنشا 2,5 ملن تەڭگە كولەمىندە گرانتقا يە بولعان ءمولدىر 10 ايەل ەڭبەك ەتە الاتىن تىگىن تسەحىنا ارنالعان جابدىقتى ساتىپ الدى.
باستاعان ءىسىن باياندى ەتىپ وتىرعان مولدىرگە شاھار باسشىسى: «ساتتىلىك سەرىگىڭىز بولسىن! جاقسىلىققا سەنىڭىز! ءبىزدىڭ تاراپىمىزدان ءاردايىم قولداۋ مەن كومەك بولادى», دەپ دەمەۋ ءبىلدىردى.
جىل باسىنان بەرى الاتاۋ اۋدانىنىڭ «باقىتتى وتباسى» ورتالىعىندا 27 مىڭ ايەلگە «ىسكەر انا» باعدارلاماسى بويىنشا اقپاراتتىق-كونسۋلتاتسيالىق-رەسۋرستىق قولداۋ كورسەتىلدى. ترەنينگتەر مەن كۋرستاردا 25 مىڭ ادام وقىدى.
سونىمەن قاتار «بيزنەس باستاۋ» جوباسى بويىنشا 537 ايەل ءبىلىمىن جەتىلدىردى, ولاردىڭ 300-ءى گرانت الىپ, كيىم جوندەۋ, كونديتەر, شاشتاراز, مانيكيۋر سالوندارىن اشتى, بالالاردىڭ دامۋ كىتاپتارىن جاساپ, اۆتوكولىك مۇقابالارىن تىگىپ جانە باسقا دا سالالار بويىنشا وزدەرىنىڭ كاسىپتەرىن باستادى.
ەكى ايەل «بيزنەستىڭ جول كارتاسى-2025» اياسىندا يننوۆاتسيالىق جوبالاردى ىسكە اسىرۋعا 2-دەن 5 ملن تەڭگەگە دەيىن مەملەكەتتىك گرانت الدى. ءوندىرىس شەبەرحانالارىن اشۋ ءۇشىن الاڭدار بەرىلىپ, ال ونىمدەرىن ساتۋ ءۇشىن بازارلاردان 50-گە جۋىق ورىن بولىنگەن.
الماتى