قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەرباەۆتىڭ توراعالىعىمەن مەملەكەتتىك رامىزدەر مەن ۆەدومستۆولىق جانە ولارعا تەڭەستىرىلگەن وزگە دە ناگرادالار گەرالديكاسى ماسەلەلەرى جونىندەگى رەسپۋبليكالىق كوميسسيانىڭ كەزەكتى وتىرىسى ءوتتى.
كوميسسيا جۇمىسىنا پارلامەنت دەپۋتاتتارى, ورتالىق جانە جەرگىلىكتى اتقارۋشى ورگانداردىڭ باسشىلارى, بەلگىلى قوعام قايراتكەرلەرى مەن عالىمدار قاتىستى. كوميسسيا وتىرىسىنىڭ جۇمىسى سەلەكتورلىق بايلانىس ارقىلى ۇيىمداستىرىلدى.
وتىرىستى اشقان قىرىمبەك كوشەرباەۆ مەملەكەتتىك رامىزدەردىڭ قازاقستاندىق بىرەگەيلىكتى, وتانسۇيگىشتىك سەزىم مەن حالىق بىرلىگىن قالىپتاستىرۋداعى ماڭىزىنىڭ ارتا تۇسكەنىنە توقتالدى.
– وتاندى قاستەرلەۋ مەملەكەتتiك رامiزدەرگە دەگەن قۇرمەتتەن باستالادى. مەملەكەتتىك رامىزدەر – ەل ىشىندەگى تۇراقتىلىقتىڭ نىشانى, ۇلتتىق رۋح پەن قوعامدىق كەلىسىمنىڭ جانە پاتريوتتىق تاربيەنىڭ اسا ماڭىزدى قۇرالى, – دەپ اتاپ ءوتتى قىرىمبەك كوشەرباەۆ.
جيىندا قازاقستان پرەزيدەنتىنىڭ تاپسىرماسىنا سايكەس مەملەكەتتىك رامىزدەر سالاسىنداعى زاڭنامالارعا وزگەرىستەر مەن تولىقتىرۋلار ەنگىزۋ, جاڭادان قۇرىلعان گەرالديكالىق ورتالىقتىڭ جۇمىسى, سونىمەن قاتار, قازاقستان رەسپۋبليكاسى ىشكى ىستەر مينيسترلىگىندەگى مەملەكەتتىك رامىزدەردى دارىپتەۋ جانە قولدانۋ سالاسى بويىنشا جۇمىستاردىڭ جاي-كۇيى تالقىلاندى. سونداي-اق رەسپۋبليكالىق كوميسسيانىڭ 2021 جىلعا ارنالعان جۇمىس جوسپارى بەكىتىلدى.
كوميسسيا وتىرىسىنىڭ قورىتىندىسى بويىنشا مەملەكەتتىك حاتشى قىرىمبەك كوشەرباەۆ ورتالىق جانە جەرگىلىكتى مەملەكەتتىك ورگاندارعا بىرقاتار ناقتى تاپسىرما بەردى.