ماڭعىستاۋ اۋدانىنىڭ ۇشتاعان اۋىلىندا قازاق حالقىنىڭ قولونەرى مەن تۇرمىستا ءجيى قولدانىلاتىن بۇيىمدارىن جاساۋدىڭ ەرەكشە ۇلگىسى دامىپ كەلەدى. اۋىلدىڭ بايىرعى تۇرعىندارى مۇساحان مەن ەلەيحان ەگىزباەۆتار بىلگەندەرىمەن ءبولىسىپ, جاستارعا ۇيرەتىپ ءجۇر.
شەبەرلەردىڭ ايتۋىنشا, كيىز ءۇي جابدىقتارىن توقۋ, كيىز باسۋ مەن قامشى ءورۋ ولار ءۇشىن كۇندەلىكتى جۇمىس. ەسكىرگەن جابدىقتاردى جاڭارتۋعا, ورمەك توقۋ مەن كورپە تىگۋ جۇمىسىنا قىز-كەلىندەرى مەن نەمەرە-جيەندەرى دە قولعابىس ەتەدى. ءبىرى ۇرشىق يىرسە, ءبىرى توقىما توقيدى, ەندى ءبىرى كيىز باسۋ ءۇشىن ءجۇن سابايدى.
«مالدىڭ تەرىسىنەن توسەنىش دايىنداۋ ءۇشىن, الدىمەن تەرىنى دايىنداپ الامىز. اۋەلى سويىلعان مالدىڭ تەرىسىن تۇزداپ الۋ قاجەت. سودان سوڭ كەپتىرەدى. كەيىن ىستىق سۋ جانە ايرانمەن جۋىپ, لاس تەرىسىن الىپ, ءيىسىن كەتىرەمىز. كەۋىپ, جۇپ-جۇمساق تەرى دايىن بولعاندا پايدالانادى. مالدىڭ تەرىسى, ءجۇنى, سۇيەگى, ىشەگى ءبارى پايداعا اسادى. تەرىسىنەن كەزىندە تىماق, ىشىك پىشەتىنبىز. قازىر جۇمساق, ادام اعزاسىنا پايدالى تەرىنى بالالارعا جىلىلىققا توسەيمىن. بۇدان بولەك, تۇيە جۇنىنەن كورپە تىگىپ, قويدىڭ جۇنىنەن كيىز باسامىز. ءجۇندى تازالاپ جۋىپ, ءجىپ ءيىرىپ ش ۇلىق, جەمپىر, ەشكى جۇنىنەن ءتۇبىت ورامال توقيمىز. كەزىندە ىشەگىن دومبىراعا ىشەككە پايدالاناتىنبىز. قازىر بۇل قۇندىلىقتاردى ۇيرەنۋگە نيەتتى جاستار از. وسىنداي قولدان جاسالاتىن تابيعي ءداستۇرلى قولونەر بۇيىمدارىن كەيىنگى ۇرپاققا ۇيرەتۋ ماقساتىمىز», دەيدى ەلەيحان ەگىزباەۆا.
ال وتاعاسى مۇساحان ەگىزباەۆ بولسا قامشى ءورىپ, سۇيەكتەن سابىن جاسايدى.
«الدىمەن تۇيەنىڭ تەرىسىن تۇزداپ, تازارتىپ, ايرانمەن يلەپ, پايداعا اساتىنداي جۇمسارعان سوڭ التى, سەگىز ءتىپتى ون ەكى ورىمگە قاراي تىلىنەدى. جىڭعىل اعاشىن جونىپ, بەس تۇتام ەتىپ دايىنداپ, ءتورت تۇتام باسىنا تەرىدەن قامشى ەتىپ ورەدى دە تارامىسپەن تىگەدى. تارامىس دەگەنىمىز – ءىرى قارانىڭ سىڭىرىنەن الىنعان بەرىك ءجىپ. تارامىس ازىرلەۋ ءۇشىن كۇزدە سوعىمعا سويىلعان ءىرى قارانىڭ جەلكە, جىلىنشىك سىڭىرلەرىن ەتسىز سىلىپ الۋ كەرەك. سىلىنعان سىڭىرلەردى كولەڭكەگە ءىلىپ قويىپ, بابىمەن كەپتىرەدى. ابدەن كەپكەن تارامىستى بالعامەن جۇمسارتادى. قامشى سەكىلدى تەرىدەن جاسالاتىن بۇيىمداردى وسى تارامىسپەن تىگەدى. ال, مالدىڭ سۇيەگىن ابدەن قايناتىپ سابىن دايىندايدى. سۇيەك مايى تولىق قايناعان سوڭ سۇيەكتى الىپ تاستاپ, يتسيگەك ءشوبىن قوسىپ قويۋلانعانشا قايناتىپ, ءارتۇرلى قالىپپەن سابىن جاساۋعا بولادى, دەدى مۇساحان ەگىزباەۆ.
مالدىڭ تەرىسىن لاقتىرا سالماي, كادەگە جاراتىپ جۇرگەن ۇشتاعاندىق وتباسىنىڭ تىرلىگى – كوپكە, اسىرەسە جاستارعا ونەگە.
ماڭعىستاۋ وبلىسى