بۇگىن باس پروكۋرور عيزات نۇرداۋلەتوۆ جۇمىس ساپارىمەن قاراعاندى بولدى, دەپ حابارلايدى Egemen.kz باس پروكۋراتۋرانىڭ ءباسپاسوز قىزمەتىنە سىلتەمە جاساپ.
جۇمىس ساپارى بارىسىندا ول تەمىرتاۋ قالالىق پروكۋراتۋراسى مەن پوليتسيا باسقارماسىندا بولىپ, وندا "جاڭا جاعدايداعى قازاقستان: ءىس-قيمىل كەزەڭى" اتتى پرەزيدەنتتىڭ جولداۋىندا بەرىلگەن تاپسىرمالارىن ىسكە اسىرۋ ماقساتىندا نەگىزگى پروتسەسسۋالدىق شەشىمدەردى كەلىسۋ بويىنشا ەنگىزىلگەن پيلوتتىق جوبانىڭ جۇزەگە اسىرۋ جاعدايىمەن تانىستى.
قاداعالاۋ ورگانىنىڭ باسشىسى تەرگەۋشىلەرمەن جانە قاداعالاۋشى پروكۋرورلارمەن كەزدەستى. ولار پروتسەسسۋالدىق شەشىمدەردى مىندەتتى تۇردە كەلىسۋ ءتارتىبىن ەنگىزگەننەن كەيىن تەرگەۋ ورگاندارىنىڭ جۇمىسىنىڭ جەڭىلدەۋىن, سوتقا دەيىنگى تەرگەپ-تەكسەرۋ ساپاسىنىڭ ارتۋىن جانە پروكۋرورلىق قاداعالاۋدىڭ ۇيىمداستىرۋ ماسەلەلەرىنىڭ جاقسارۋىن اتاپ ءوتتى.
سونداي-اق, وبلىس اكىمىنىڭ, ىشكى ىستەر ءمينيسترى ورىنباسارىنىڭ, پوليتسيا, سىبايلاس جەمقورلىققا قارسى ءىس-قيمىل اگەنتتىگى مەن ەكونوميكالىق تەرگەۋ قىزمەتى دەپارتامەنتتەرىنىڭ باسشىلارىنىڭ قاتىسۋىمەن ايماقتاعى زاڭدىلىق, قۇقىق قورعاۋ ورگاندارىنىڭ ءوزارا ارەكەتتەستىگى جانە قىلمىستىق پروتسەستەگى كاسىپكەرلىكتى قورعاۋ ماسەلەلەرى تالقىلاندى.
ساپار ناتيجەسىندە باس پروكۋرور جوبانى جۇزەگە اسىرۋ بويىنشا بىرقاتار تاپسىرمالار بەردى.