ءابۋ ناسىر ءال-ءفارابيدىڭ 1150 جىلدىعىنا وراي رمك "عىلىم ورداسى" سيرەك كەزدەسەتىن كىتاپتار مۋزەيى جانە قمقك "الماتى قالاسىنىڭ مۋزەيلەر بىرلەستىگى" الماتى مۋزەيىمەن بىرلەسە ۇيىمداستىرعان ء"ال-فارابي – رۋحانيات شىڭى" تاقىرىبىندا دوڭگەلەك ۇستەل جانە "عاسىرلاردىڭ عۇلاماسى" ەكسپوزيتسيالىق كورمەسىن وتكىزدى, دەپ حابارلايدى Egemen.kz.
ءال-ءفارابيدىڭ شىعارماشىلىق مۇراسى وراسان زور. عالىمنىڭ ەڭبەكتەرى ورتاعاسىرلىق ءبىلىمنىڭ بارلىق سالالارىن قامتيدى. ءال-فارابي اريستوتەل, پلاتون جانە باسقا دا ەجەلگى ويشىلداردىڭ شىعارمالارىنا كوپتەگەن تۇسىندىرمەلەردىڭ اۆتورى رەتىندە تانىمال بولدى. "الەمنىڭ ەكىنشى ۇستازى" اتانعان ۇلى ويشىل ەڭبەكتەرىنىڭ كوپشىلىگى تاقىرىپ جاعىنان دا, مازمۇنى جاعىنان دا ءار الۋان. "اريستوتەلدىڭ "ەتيكا" كىتابىنا كىرىسپە", "عىلىمدار كلاسسيفيكاتسياسى", "اقىل كىتابى", "باقىتتى تابۋ" جانە "باقىتقا جەتۋ جولدارىن كورسەتۋ", "ىزگى قالا تۇرعىندارىنىڭ كوزقاراستارى" تاعى باسقا ەڭبەكتەرى سونىڭ كۋاسىندەي. ءال-فارابي فيلوسوفياسى ادامنىڭ ىزگىلىگى مەن پاراساتىنا دەگەن شەكسىز سەنىممەن سۋسىنداعان. سوندىقتان ءوز داۋىرىندەگى بارلىق دانالىقتى بويىنا سىڭىرگەن ءال-ءفارابيدىڭ مۇراسى عىلىم مەن مادەنيەت تاريحىندا زور ماڭىزعا يە.
دوڭگەلەك ۇستەلدى فيلولوگيا عىلىمدارىنىڭ كانديداتى ءا.قايىربەكوۆ جۇرگىزىپ, الماتى قالاسى مۋزەيلەر بىرلەستىگىنىڭ ديرەكتورى ءا.ۇمبەتاليەۆ, قازۇۋ ءال-فارابي ورتالىعىنىڭ ديرەكتورى, فيلولوگيا عىلىمدارىنىڭ كانديداتى ب.مەيىرباەۆ, قازۇۋ فيلولوگيا عىلىمدارىنىڭ دوكتورى, پروفەسسور ج.اتاباەۆ, "عىلىم ورداسى" رمك باس ديرەكتورىنىڭ مىندەتىن اتقارۋشى, تاريح عىلىمدارىنىڭ كانديداتى ن.سەيدىن ءسوز سويلەپ, "عاسىرلاردىڭ عۇلاماسى" ەكسپوزيتسيالىق كورمەسى جادىگەرلەرىمەن سيرەك كەزدەسەتىن كىتاپتار مۋزەيىنىڭ قىزمەتكەرى, ءال-فارابي اتىنداعى قازۇۋ PhD دوكتورانتى ءو.تۇياقباەۆ تانىستىردى.