جاركەنت ءوڭىرىنىڭ داڭقى كەزىندە جۇگەرى وسىرۋمەن شىققان ەدى. قازىر دە اۋدان ديقاندارى ءداستۇرلى داقىلدى كوپتەپ وسىرەدى. بيىلدىڭ وزىندە اۋدان بويىنشا 26 059 گەكتار جەرگە دالا ارۋى ءدانى ەگىلگەن. قازىرگى ۋاقىتتا 24 196 گەكتار القابى جينالىپ الىندى. كۇتىمى كەلىسسە, جۇگەرىنىڭ ءونىمى جوعارى بولادى.
اگرارشىلار وتكەن كۇزدە جۇگەرى ەگىلگەن ءار گەكتاردان ورتاشا ەسەپپەن 64,1 تسەنتنەردەن الىپ وتىر. ال ازىرگە جينالعان ءونىم – 155 133 توننا. الا جازدايعى وسىرىلگەن التىنداي ونىمدەر بۇگىندە زاۋىتتارعا جونەلتىلىپ, ساتىلىمعا جىبەرىلدى. اۋدانداعى «جاركەنت كراحمال-سىرنە» زاۋىتىنا 65 مىڭ توننا, «شامالعان كراحمال-سىرنە» زاۋىتىنا 10 مىڭ توننا, جەكە قوجالىقتار مەن بازارلارعا 2 950 توننا ساۋدالاندى. جاۋاپتى ناۋقانداعى شارۋالار جۇمىسىن كوشپەلى بريفينگتە اۋدان اكىمى بايانداپ بەردى.
– اۋىل شارۋاشىلىعىندا جاڭا تەحنولوگيالاردى قولدانۋ ءونىمدى ەسەلەۋگە مۇمكىندىك بەرەدى. وسى ماقساتتا اكىمدىك تاراپىنان قاجەتتى قولداۋ جاسالىپ جاتىر. جيىن-تەرىن جانە كۇزگى دالا جۇمىستارىنا اۋدانىمىزدا شارۋالارعا ارزانداتىلعان كەپىلدى 380 توننا ديزەل وتىنى بولىنگەن بولاتىن. ونىڭ ىشىندە شىلدە ايىنا – 80 توننا, تامىز ايىنا – 100 توننا جانە قىركۇيەك ايىنا – 100 توننا, قازان ايىنا 100 توننا بەرىلدى. اۋدان بويىنشا بۇگىنگە دەيىن الىنعانى – 360 توننا, – دەيدى پانفيلوۆ اۋدانىنىڭ اكىمى تالعات ومىراليەۆ.
بۇگىندە القاپتاعى جۇمىستار قىزۋ. جۇگەرى جيناۋ ناۋقانى بويىنشا 90 كومباين جۇمىلدىرىلعان. ونىڭ ىشىندە 34 كومباين جۇگەرىنى دانگە تىكەلەي وراتىن, 52 كاماز تاسىمالداۋ ماقساتىندا قولدانىلۋدا. وسىنداي قولداۋ ارقىلى دالا ارۋىنىڭ بيىل ونىمدىلىگى ارتتى. اۋداندا جۇگەرى 2019 جىلى 26 005 گەكتار جەرگە ەگىلسە, بيىل 26 059 گەكتاردى قۇراپ وتىر. بىلتىرعىمەن سالىستىرعاندا 866 توننا ارتىق جۇگەرى ءدانىن جيناۋ جوسپارلانعان. شارۋالار ءونىم جيناۋدى قىركۇيەكتىڭ ورتاسىندا باستاعان. ايتۋلارىنشا, ناۋقان ايدىڭ سوڭىندا تولىق اياقتالادى. پانفيلوۆتان بولەك, ەڭبەكشىقازاق, ۇيعىر, ىلە اۋداندارى قازىرگى كۇنى جۇگەرىنى اۋدانداعى زاۋىتقا وتكىزىپ جاتىر. كۇنىنە 70-78 توننا قابىلدانۋدا.
سوڭعى 9 ايدا جازيرالى وڭىردەگى اۋىل شارۋاشىلىعى سالاسىندا جالپى ءونىم كولەمى 31 ملرد تەڭگەگە جەتىپ وتىر. 14 قازانعا دەيىن بيدايدىڭ 414 گەكتارى ورىلىپ, 946 توننا ءونىم بەرسە, ارپا 567 گەكتاردان – 1 360 توننا, جۇگەرى 17 629 گەكتاردان – 113 مىڭ توننا, كارتوپ 1 345 گەكتاردان – 23,4 مىڭ توننا, كوكونىس 1 202 گەكتاردان – 33 مىڭ توننا, جەمىس-جيدەك 1 677 گەكتاردان 14 مىڭ توننا ءونىم جينالدى. قىسقى مەرزىمگە 183,4 مىڭ توننا ءىرى ساباقتى مال ازىعى دايىندالدى. تۇيىندەي ايتقاندا, جازيرالى جاركەنت جەرىندەگى اۋىل شارۋاشىلىعى ءارى قاراي دا وركەن جايماق.