ىزگىلىككە بىلتە سۋارعان قازاقتىڭ دارا داناسى اباي اتامىز وتىز توعىزىنشى قاراسوزىندە «بۇرىنعى ءبىزدىڭ اتا-بابالارىمىزدىڭ بۇل زامانداعىلاردان ءبىلىمى, كۇتىمى, سىپايىلىعى, تازالىعى تومەن بولسا دا, ارتىق ەكى مىنەزى بار» دەپ الىستان سەرمەي كەلىپ, «ول ەكى مىنەزى قايسى دەسەڭ, اۋەلى – ول زاماندا ەل باسى, توپ باسى دەگەن كىسىلەر بولعان. كوش قوڭدى بولسا, داۋ جانجالدى بولسا, بيلىك سولاردا بولادى. ەكىنشى مىنەزى – نامىسقورلىق ەكەن. ات اتالىپ, ارۋاق شاقىرىلعان جەردە اعايىنعا وكپە-ارازدىققا قاراماي, جانىن سالىسادى», دەپ ساۋلەلى ءسوزىنىڭ تۇبىنە شامشىراعىن تۇسىرەدى.
ابىز اقىن بۇل جەردە ەلدىكتىڭ بەلگىسىن, بىرلىكتىڭ ۇلگىسىن ايتىپ وتىر. ءوز ىرقى وزىنەن كەتىپ, ەلدىگىنەن اجىراعان كەي اعايىننىڭ ات قۇيرىعىن كەسىسكەندەي ارا ءبولىپ, ايارلىق اقپارعا قانىعىپ جۇرگەن زاماندا ىنتىماق پەن ىمىراعا قازىق بايلاۋدىڭ جولىن كورسەتتى. بەس جاسار بالاسىنان جەر بەسىككە تاياپ قالعان قارتىنا دەيىن ادالدىقتى دارىپتەي بىلگەن حالىقتىڭ ەڭ باستى ۇستانىمى اۋىزبىرشىلىك ەكەنىن شەگەلەدى. كەشەگى بابالاردىڭ ەرلىگى مەن ەلدىك ءداستۇرىن جوعالتپاي, جۇرەكتىڭ تۇبىنە تۇمار ەتىپ تاعۋدى تۇسپالدادى. بۇل – اقىلماننىڭ حالىق عۇمىرىنا ماڭگىلىك ازىق بولار پاراساتتى تولعامى.
راس, قاي كەزەڭدە بولماسىن ەلدىڭ بەرەكەلى بىرلىگىن بەكەمدەۋ ابىزدار مەن الىپتاردىڭ ەڭ باستى پارىزى سانالعان. سوندىقتان سوناۋ كۇلتەگىن جازبالارىندا, بىلگە قاعان وسيەتىندە بەكتى-حالقىنىڭ جاۋلاسقانى, اعالى-ءىنىنىڭ داۋلاسقانى سالدارىنان ەلدىگىنەن ايىرىلعان قاعاناتتىڭ قايعىلى تاريحى باياندالادى. ەل ايىرىلعان تۇستا سىپىرا جىراۋ, اسان قايعى سەكىلدى الىپتارىمىز اتالى ءسوزدىڭ ارداسى, ارلى ماتەلدىڭ جورعاسى وسى تاتۋلىق پەن تەكتىلىكتەن تامىر جاياتىنىن نۇسقادى. بي بابالاردىڭ ءتۇبىن تاۋىپ شەگەلەپ, شەشەندىكتىڭ شەڭبەرىن كەڭەيتكەن بىرلىك حاقىندا ويلى دا ءزىلدى وسيەتنامالارى كوپ. بولۋ نەمەسە بورداي توزۋدىڭ الدىندا تۇرعان كەزەڭدە قالىڭ ەلى قازاعىنىڭ قايعىسى قابىرعاسىنا باتقان دالا ءدىلمارى ابايدىڭ دا «ەدينيتسا بولماسا, نە بولادى وڭشەڭ ءنول» دەۋىنىڭ استارىندا ۇلكەن ءمان جاتىر. حالىق تانىمىنىڭ اسىلىن ارشىپ, ادامزاتتىق وزىق ۇلگىلەرمەن ساباقتاستىرعان دانىشپان تۇلعالارعا سەنىم ارتا سويلەپ, سىن ساعاتتا جۇمىلىپ جۇدىرىق بولۋدى كوزدەيدى.
اسىقتان ساقا شىعارۋعا قۇمار قوعامدا اسىل ىسكە قول سوزۋ, مايەكتى سوزدەردىڭ ءنارلى سولىمەن اۋىزدانۋ اردا تۋعان ازاماتقا پارىز بولسا كەرەك. تانىم مەن ءتۇسىنۋدىڭ اراجىگىن اجىراتا ايتساق, بارىنا مالدانعان, دۇنيەگە الدانعان ۇرپاقتىڭ ءوسىپ كەلە جاتقانىن اڭداعان دانىشپان اقىن, حالىقتىڭ بىرلىكتى بەسىگىندە تەربەتەر تاباندى تاۋ تۇلعالاردىڭ بەكزات بولمىسىنا ءزارۋ ەكەنىن سەزدى. سوندىقتان ونىڭ ءار سوزىندە تاۋ ءمۇجىلىپ تاس بولماسىنا, جاقسىنىڭ ەلگە قاس بولماسىنا سەنەر جۇرتتىڭ ساۋلەسى جارقىراپ تۇر. عاسىردىڭ سۋىق جەلى ەسسە دە, داۋىل بوراپ, بۇرقاسىن بۋلىعىپ جەتسە دە سونبەك ەمەس. سەبەبى وندا كوكىرەكتىڭ كوزى بولىپ سانالار جۇدىرىقتاي ەتكە بەكىنىپ, بەكەم بىرلىككە شاقىرعان, ۇلى دالاعا جارىق شاشقان رۋحاني شام بار. سول شامدى جاققان, ۇلتتىڭ جاڭا بولمىسىن تۇزۋدە ايانباي ەڭبەك ەتكەن الاشتىڭ ارىستارى ەدى. سايىن ساحارادا جانارتاۋداي جارىلعان جالىن جۇرەكتى الاش ارىستارىنىڭ اڭسارى ەل كوسەگەسىن كوگەرتۋمەن استاستى. «الاش تۋى استىندا, كۇن سونگەنشە سونبەيمىز!» دەپ, مۇنارمەن بۇركەلگەن قاراڭعى قوعامدى قىساستىق پەن قۇسالىقتان قۇتقارۋدى ارمانداعان ارىستار ءبىر تۋدىڭ استىنان تابىلىپ, حالىقتىڭ نامىسىن قايراپ, بىرلىككە شاقىردى.
ەجەلدەن ۇلىستى ۇيىستىرىپ, نار نامىسىن وياتقان, ەلدىك بىرلىك پەن مەملەكەت تۇتاستىعىنىڭ باس ءرامىزى تۇعىرلى تۋ, جەلكىلدەگەن ايدىندى بايراق بولعانى بەلگىلى. تەڭگە بۇلت جۇزگەن ءزاۋ جۇزىنەن توگىلگەن التىن ساۋلەگە كوز تاستاساڭىز, وسى ءبىر ىرىستى ىنتىماق پەن ءبۇتىن بىرلىكتىڭ جارقىن كورىنىسى باعزىدان بەرى بايتاق دالانى ەن جايلاعان قايسار حالىقتىڭ بايراعىندا بەينەلەنگەنىن اڭدايسىز. ەل باسىنا ەكىتالاي كۇن تۋسا, اردان دا بيىك تۇراتىن تۇعىرلى تۋدىڭ جىعىلماۋى «جانىم – ارىمنىڭ ساداعاسى» دەپ بىلەتىن حالىقتىڭ ەڭ ۇلى ەرلىگى. بۇگىندە ەل ازاماتتارىنىڭ الەۋمەتتىك جەلىدە سايقىمازاققا قارسى «مەن تۋىمدى ماقتان ەتەمىن» دەپ لەبىز ءبىلدىرۋى – سول اسپان تۇستەس كوك بايراعىنا دەگەن پەرزەنتتىك سەزىمىنىڭ ۇشقىنى ىسپەتتى.
بۇل رەتتە مەملەكەت باسشىسى ق.ك.توقاەۆتىڭ Twitter جەلىسىندە جاستارعا ءۇن قوسىپ, ازاتتىعىمىزدىڭ ايعاعى, تاۋەلسىزدىگىمىزدىڭ تۇمارى بولعان كوك بايراعىمىزدى ءپاتريوتيزمنىڭ كورىنىسى رەتىندە ەركىن قولدانۋعا, ماقتان ەتىپ ءار ءۇيدىڭ تورىنە ىلۋگە مۇمكىندىك بەرۋ تۋرالى تولعانا ايتۋى قوعام تاراپىنان قىزۋ قولداۋ تاپتى. ويتكەنى الاشتىڭ ابىرويىن اسقاقتاتقان اسپان ءتۇستى كوك بايراعى – ۇلتتىق تۇتاستىعىمىز بەن ەلدىك بىرلىگىمىزدىڭ مىزعىماس ايبارى, رۋحىمىزدىڭ اسقاق ايبىنى, ابىز اباي ايتقان اۋىزبىرشىلىك پەن نامىسىمىزدىڭ اسىل قايراعى. سوندىقتان ول ءاربىر ءۇيدىڭ شاڭىراعىندا, ءاربىر مەكەمەنىڭ تورىندە, ءار قالانىڭ ەڭ كورنەكتى جەرىندە جەلبىرەپ تۇرسا, ۇلتتىق رۋحىمىزدىڭ دا اسقاقتاي تۇسەرى انىق.