سايلاۋشىلار تىزىمىندەگى سايكەسسىزدىكتەر رەتكە كەلتىرىلەدى

"ازاماتتاردىڭ ءبىرى كوشەدى, ەندى بىرەۋى تىركەۋدەن شىقسا, كەلەسىسى تىركەلىپ جاتادى. سوندىقتان جەكە تۇلعالاردىڭ دەرەك بازاسى بويىنشا ونلاين جۇمىس جۇرگىزىلىپ جاتىر. ساعات سايىن وزگەرىستەر ەنگىزىلىپ وتىرادى. سول سەبەپتى قازىردەن باستاپ سايلاۋشىلار تىزىمدەرىنە مۇقيات قاراپ, مالىمەتتەردى تەكسەرىپ وتىرمىز. سايلاۋعا 20 كۇن قالعان كەزدە جەرگىلىكتى اتقارۋشى ورگاندار سايلاۋشىلاردىڭ ءتىزىمىن تاپسىرادى. سول ۋاقىتقا دەيىن ولار ءتىزىمدى سايكەستەندىرىپ, ناقتىلاۋى ءتيىس. بىراق بۇل تەك مەملەكەتتىك ورگانداردىڭ عانا جۇمىسى ەمەس. بۇل − سايلاۋشىنىڭ دا مىندەتى. سايلاۋشى call-ورتالىققا نەمەسە جەرگىلىكتى اتقارۋشى ورگانعا وتىنىشپەن جۇگىنىپ, تىزىمدە بار-جوعىن, مالىمەتتەرىنىڭ دۇرىستىعىن تەكسەرۋگە قۇقىلى. سول سەبەپتى قازىرگى تاڭدا ايىرماشىلىقتار بولعانىمەن ۋاقىتىندا ورنىنا كەلەدى", دەدى ەرلان داۋىلباەۆ.

سونداي-اق ول, داۋىس بەرۋگە 5 كۇن قالعاندا ورتالىق سايلاۋ كوميسسياسى سايلاۋشىلاردىڭ مالىمەتتەرىنىڭ ءبارىن قايتادان تەكسەرىپ شىعادى. ايتا كەتەيىك, بۇگىن ورتالىق سايلاۋ كوميسسياسىنىڭ وتىرىسىندا وسك توراعاسىنىڭ ورىنباسارى كونستانتين پەتروۆ سايلاۋشىلار تىزىمىنە كىرگىزىلگەن ازاماتتاردىڭ سانى 11 820 318 ادام بولعانىن ايتتى.

ال ىشكى ىستەر ءمينيسترىنىڭ ءبىرىنشى ورىنباسارى مارات قوجاەۆتىڭ مالىمەتىنشە, ەلىمىزدە 18 جاسقا تولعان 11 733 944 ازامات تۇرعىلىقتى جەرى بويىنشا تىركەلگەن.